Mitcaw Khuahmu le Mitvang Khuahmulo (sim tu Rev. Fr. David Mangte), November 16, 2020.

“Mitcaw Khuahmu le Mitvang Khuahmulo”

Thuthangtha sim tu Rev. Fr. David Mangte

November 16, 2020

Siarding: Rev. 1:1-4, 2:1-5; Ps 1:1-4, 6; Lk 18:35-43.

          RVA ihsin thuthangtha a rak ngaitu hmun tin ih um mi duhdawt mi nulepa ulenau pawl, kan Bawipa Jesuh Khrihih zangfahnak, Pa Pathianih duhdawtnak le ThiangThlarauih pawlkomnak cu nan hnen ah a thar in thlenghramseh tiah hmaisa bikah cibai ka run lo buk hai a si.Tui tum cu “Mitcaw Khuahmu le Mitvang Khua hmulo” timi thu luu thawn hlawmawknak run neih ka duh a si. Tuini November 16 tlawngkaini 1 ih kan siar mi Cathianghlim pawl cu: a voikhatsiarnak ah Rev. 1:1-4, 2:1-5; Ps 1:1-4, 6; Gospel siarnak ah Lk 18:35-43 sung ta an si. Hi kansiar mi Cathianghlim pawl lak ihsin Gospel sungih kan siar mi ‘Mitcaw Kutdawh’ pa kan Bawipaih a dam ternak thu kha thuk deuhih ruah khawm ka duh mi a si.

           Hi mitcawpaih hmin cu Bartimaeus a si tiah Mk 10:46-50 sungah fiangzet in kan hmu. KanBawipa in hi mitcawpa a dam tertikah a tongmi cu “Na zumnak in a lo dam ter zo” ti a si. Mirang tong cun, your faith has saved you ti’n a hmangih kan laitong cun na zumnak in a lo run zotiih leh ding awm tak a si. Greek ih a hman mi cu ‘sozo’ ti a siih sullam tampi nei mi a si-ih ruangpumdamnak men silo in thlarau runnak tiangin a sawhkhih mi tongfang a si. Curuangah kan Bawipa in Bartimaeushnenih na zumnak in a lo run zo a ti mi in a mit vangsalnak lawng silo in rundamnak khal a co ngah timi a khih hmuh. Kan Bawipa in mina pawl a dam ter tikah an zumnak ruangih a dam ter mi khal an um; midangih zumnak ruangih a dam ter mi khal an um; cule, zo a si ti hman a thei lo tu pawl khal a zangfahnak liolio ruangih a dam ter mi khal an um. Mihrek khat pawl hnenih ‘nazumnak in a lo dam terzo’ a silo le ‘na zumnak in a lo run zo’ a ti tikah damnak an ngah le runnak an co mi hi an zumnak ruangah a si ti a fiang. Kan Bawipa in minung tampi a dam ter nan, a damter mi hmuahhmuah in ‘na zumnak in a lo run zo’ a ti lo. Zumnak thawn a hnen a pan taktak tu pawl hnen lawngah a tong mi a si.

           Leitlunih thil umtu daan kan zoh tikah zumtu pawl le Pathian lam ih a zuam zettu pawl hnakih Pathian ziangih siar lole zumnak nei lemlo pawl in hlawh tlinnak le Pathian thluasuah Dangdang tampi an ngah sawn can tampi hmuh ding a um. Cutivek caan ah hrek khat zumtu pawl cun beidon nakah hmangin Pathian hnenah thusuhduhnak le mawhthluk duhnak thinlung tla kan nei theu. Cutivek thinlung kan vun neih le vete’n zumtu an sinakih hlawknak khal a hlo cihmai a si. Zumtu kansi nakih hlawknak taktak cu hi leilung thilri, lei thluasuah ah si hlah khaw. JesuhKhrihsungin kan co mi rundamnak sawn hi a si. Cui hrundamnak cu zumlo tu cun ziangtikhman ah a hmuthei dah lo ding; zumlotu le zumtu pawl ih kan danawknak khal cu hihi a si: kannihzumtu pawl cu lei thluasuah kan ngahkhal le cuih thluasuah par lawngah silo in cuihthluasuah in petu in rundamtu JesuhKhrih hnen in a ra mi a si ti kan theihnak in lungawinak in pe. Cuihlungawinak cu kan lei thluasuah a cem khal le a hlo thei cuang lo. Zumlotu pawl ih lungawinak cu lei thluasuah a cem cun a hlo cih ve, ziangah tile cuih thluasuah par lawngah a thum aw. Minung hnakih in duhdawttu le rundamtu Pathian kanneih mi parah lungawithul hnak an thiam lo in le cui hlungawinak midang pawl hnen ah tawm thei lo ih lei par thilri lawngah kan buaikengkeng ringring a siahcun zumlotu pawl thawn kendang lamnak a um hrimhrim lo a si. Hi lei thluasuah men cu a duhduh hnen ah a pek mi cu; cuvek men daw rero dingah Amah a zumtu nang le kei in siang lo.

           Tuini kansiar misungih mitcaw paih dinhmun kanzoh tikah a zumnak hi ziangtin a lang ti a si le, JesuhKhrih a kawhtikah, “Maw David FapaJesuh, i zangfahhramaw” a ti a si. A kiangkapih mipi pawl hnenih zo a ra tiih a suh lai ah an sim mi cu “Nazareth mi Jesuh” ti a sinain, anih cun “David Fapa Jesuh” ti’n a ko cih mai. Ziangruangah tile, Jesuh cu Israel mi pawl runnak pe dingah a ralai ding tiih an hngahhlap zet mi Messiah a si ti a rak zum cia zo. Amah vekih vansang beidong mi pawl runnak petheitu a si ti le mi zangfahthiam mi a si ti khal a zum. Curuangah au lo dingih an kawk hman ah thanau lo te’n a au sinsinnak a si. Kandungih Lk 18:1-8 sungih kansiar mi kanBawipaih nuhmeinu le thuthentu tahthimnak a pek mi sungih nuhmeinu vek hi a si mai.

           Kan Bawipa khal in amah rori ih a kamcia vekin zumnak thawn a au rero tu mitcawpa cu a lan ta men hrimhrim lo. A hnen ah a koih ‘ziangti sak ding so na duh’ ti’n a sut a si. Himite in Pathian hnenih thlacamih dilnak tuah a tul zia in sim fiang. Kan Bawipa in a tul mi le a duhmi a theih sak tuk ko nan, amaih dilnak tongkamte theih a duh thotho. Culawng silo in hi tiih amah te’n a duhmi a tongter mi in tangdornak nun khal in zirh a si. Mihrek khat cun zumnak nei ngaingai vekin Pathian cu ziangkim theitu a siih ka tul mi khal amah a theih cia ruangah thlacam ih dil tul lo in amah te’n i pethei tizawngin thlacampaih lo tla kan um phah theu. Cuvek hi a ngaingai ah cun Pathianhnenih kanzumnak a fek ruangah si  lo in kan puar thaunak le zangzelnak ruangih kan tong mi a rak si sawn theu. Amah kan Bawipa Jesuh Khrih rori hman a Pa hnen ah thla a cam theu timi Bible sungah fiangzet in kan hmu thei ko.

           Maw unau, tuiniih kan Bawipaih damnak le runnak a pek mi Bartimaeus hi mitcaw khua hmu a si. Ziangah tile, a mit in khua a hmu lo nan, a thinlung in Bawipa a hmu; khat lei lam zawngih kansim a sile, a zumnak mit in Bawipa a hmu a si. Cule cuih zumnakruangah rundamnak khal a co ngah. A kiangih feh luailo tu mipi pawl lakah mitcaw lo nain, khua a hmu lo tu tampi an rak um ko. Cupawl cu kanBawipaih David Fapa Messiah a sinak a pomduh lotu pawl le mangbangza a tuah mi hmuh duh men ih thluntu pawl hi an si. Cuvek pawl cun, kan Bawipaih pek a duh taktak mi rundamnak hi an co thei hrimhrim lo. Nang le keiteh, mitcaw lo nain, khuahmu thei lo mi ah kantel lai pang maw? Pathian kanbiak le thlakan cam rero mi hi leilung thluasuah duh men ah a si pang maw timi hi thate’n ruatsal cio uh si.

           Cule kan Bawipa in ‘na zumnak in a lo run zo’ tiih Bartimaeus damnak a pek tikah, anih cun khua a hmuhsalt heinak hi amaih pumcawmnak ding hrangah hmang men lo in kan Bawipaih dung a rak thluncihih Bawipaih ram hrang sawn ah a rak hmang a si. Bawipaih pek mi ruundamnak a thei fiang tu cun lungawinak thawn a khah lawng silo in lei par thil lawngah an buai hrimhrim lo. Bawipaih ram karhzainak hrang sawnah an buai a si.Lei thluasuah hrangih kanthlacam mi vekih kanngah lo tikah Pathian kan mawhthluk tum theu maw? Pathian par ih kanzumnak hi ziangvek a si? Mt. 2:8 sungih miphar pa vekih zumnak kanneih ding hi a thu pi em. “Aw Bawipa na duh ahcun i dam ter thei a si”tiih a thlacamnak cun kan Bawipaih lung a khoih tuk. Ziangah tile, hi thlacamnak in zumnak tumpi a lang ter.

           Maw Bawipa, Nang cu ziangkim tithei nasiih ziang hmuahmuah theitu khal na si. Ka duh mi le ka tul ngaingai mi theibiktu khal na si. Kahrangih thiltha a siah cun, hi thluasuah hi i co ter hram aw tiiht angdornak taktak thawn tha nau lo teih thla kan cam ringring a siah cun, kan duh mi thluasuah kanngah lo hman ah kan duh mi hnakih tha sawn mi thluasuah kan par ih a thlen hi kan hmu ngah tengteng ding a si. Cumi hmuthei ding cun zumnak mitthawn kan cuanthiam a tul.

          Kan zaten mitvangih khuahmu lo tu pawl veksi lo dingah kanzumnak Bawipa in in thangter vivo hramseh! Amen.