Mithianghlim Stephen Puai ni ih Thuthangtha

St. Stephen Puai ni (Rev. Fr. Joseph Ro Nei Thang ih Thuthangtha sim mi) (26/12/2019)

Bawi Khrih ah duhdawt zetmi nu le pa, u le nau pawl, Christmas puai nan hmang nuam cio hai maw. A suak tharmi Naute Jesuh in nan zatein lo thluasuah hram seh tiah hmaisa bik ah thla za ka lo cam sak hai. Tuihni cu December thla ni 26 asi vekin St Stephen ih puaini asi. Cule kan Kohhranpi in Christmas puai cu nikhat lawng tuah ding asilo, zarhkhat sung tuah dingah thu in pe ruangah a tu cu Christmas puai caan sunglawi asi thotho lai asi ti tla ka lo thei ter duh. Christmas puai caan cu kum tharni tiang asipei. Nitin Missa raithawinak ah Gloria tla kan sak ringring dingmi asi. January ni hnih ihsin Bawipa Jesuh tipilnak puaini tiang cu Christmas caan asi tiah ka lo theiter bet duh hai. 

Mitute ah ka lo sim vekin tuihni cu St Stephen ih puaini asi. Mihrekkhat nih cun Steven tiah tla kan ko ttheu. An bang aw ko asi. Stephen mi a latu pawl hmuahhmuah tla “Happy Feastday” tiah cibai ka run lo buk hai. Nan hrangah thla ka run lo cam sak asi. 

Stephen timi cu “sunlawinak lukhum” tiah a sullam a um asi. Amah cu AD kum 5 sehvel ah a suakih a kum 29 hrawngah Jesuh Khrih hrangah lungto thawn den-thahnak a tuar asi. Amah cu Tirhthlah pawl bawmtu dingah hrilnak ngahin deacon Ordination ngahtu asi. Deacon pawl lak hmanah amah cu deacon upa timi Mirang ttong in Archdeacon pakhat asi. Hrilnak a ngah hlan ihsin amah cu mifel mi ttha asiih Thlarau Thianghlim thawn a khahmi asi. A tuahmi hmuahhmuah Pathian ttihzahnak a nei. A tuahnak tinkip ah tla hlawhtlinnak a ngahih Pathian in amah tetti khan theinak dingah raltthatnak thazaang a pek. Bawi Jesuh cu Pathian ih vorhlam ah a to kha a hmu ih a hmu mi cu thuhlo in a phuang asi. Thudik a phuan ruangah thahnak a tuar asi. 

Tuihni St Stephen puaini ih kan siar dingmi Bible pawl cu Tirhthlah 6:8-10; 7:54-59 tla ansi pei, cun Thuthang Ttha sungah cun Mt 10:17-22 tiang ansi pei. Kan siarmi Thuthang Ttha sungah Bawipa Jesuh in a Tirhthlah pawl hnenah “Ralring uh, ziangahtile mipi pawlin nanmah kha thutthennak zungah an lo thlen pi dingih sikakok ah an lo vuak ding. Keimah ruangah uktu le siangpahrang pawl hmai ah an lo thlengpi dingih anmah le Gentile mi pawl hnenah ka thu than tertu nan si ding. Ziangmi ka sim ding ti le ziangtin ka sim ding ti kha nan don har hlah uh. A tikcu a kim tikah nan sim dingmi cu theihter nan si leh ding” tiah a cah hai asi.  Himi Thuthang Ttha Bible catlang pawl cu St Stephen puaini ah siar dingin Kohhran nih in khiah sak tikah hi Thuthang Ttha le Stephen ih nunzia cu an kaih aw ngaingai asi ti ka hmu. Stephen kha biaknak lamih thuneitu pawlin an kai asi. Zung le sinakok ah an thlenpi ih a thu a rel. Stephen in ziangtin sim ding, ziangmi a sim ding ti cu a don a har lo, ziangahtile Thlarau Thianghlim in a ttong dingmi le a ttong dan zia pawl a zirh thluh hai asi. Cuangruangah Stephen in ral ttha zetin amah taya a cuaitu pawl kha ttong theilo in a tuah hai asi. 

Stephen ih nunnak pehpar awin St Fulgentius in “Stephen ih hriamnam cu duhdawtnak asi ih cumi thawn ral hmuahhmuah cu a neh ttheh asi. Pathian a duhdawtnak thawngin thin tok zetmi miburpi cu a daiter thei asi. Pathian ih serhsiammi milai pawl a duhdawtnak thawngin lungto thawn amah a denthattu pawl kha a ngaidam thei ih an hrangah thla a cam sak hai” tiah a ti asi. Cun Fulgentius thotho in “Mizan ah kumkhua a hmunmi siangpahrang ih suahni puai kan tuah asi. Tuihni ahcun a cuih siangpahrang ih ralkap Stephen ih thihnak a neh hnu ah vancung a luhnak puai kan tuah asi. Mizan ah kan siangpahrang in minung tisa seemnak puan a hrukin Bawinu Mary ih pum sung ihsin hi leitlun harsatnak ram ah a rungttum asi. Tuihni ahcun a ralkap Stephen in leitlun harsatnak ram cu tansan in vancungram ah nehnak lantar thawn a hung pan asi. Stephen an thah lai ah a kor cu Saul timi tlangval pa in a kilkhawi sak dah. Atuh ahcun Paul ah a cang zo tu Saul cu Stephen thawn kumkhua ih kumkhua tiang cem theilo nomnak ro an co khat thlang ding asi” tiah thu in zirh asi. 

Bawi Khrih ah duhdawtmi u le nau pawl, a tir ah ka lo sim ta zo vekin Stephen ih a sullam cu sunlawinak lukhum tiah asi vekin a nu le pa ih pekmi hmin cu a nuncan ziaza thawn Pathian hmai ah a sunglawiter asi. Kannih tla nitin kan nunnak ah tipilnak kan ngah lai ih kan comi mithianghlim hmin kengin an nuncan tthatnak pawl kha cawng ttheu cio uhsi. Stephen cu Khrih ih titsa neimi ralkap ttha asi vekin kannih tla Chrisma thapeknak kan ngahni ihsin thokin Khrih ih ralkap ah kan cang zo ve asi. Bawi Khrih hrangah, a kohhran hrangah le kanmah le kanmah Satan ih ral ihsin luat theinak dingah ral do cio uhsi. Tirhthlah 7:55 “Stephen cu Thlarau Thianghlim thawn a khat ih” tiah kan hmu. Thlarau Thianghlim thawn a khat ruangah amah a dodaltu pawl kha ral ttha zetin fimkhurnak thawn a do sal asi. Kannih tla Chrisma thapeknak kan ngah lai ah Thlarau Thianghlim ih laksawng kan co ve asi. Kan ral Satan pawl siseh, pumsa hiarnak ih ral pawl siseh, leitlun khawvel ral pawl siseh, ral ttha zetin firkhurnak thawn do ve cio uhsi. Stephen cu Bawi Jesuh vekin amah a denthattu pawl hrangah an sualnak a ngaidam vekin kannih tla kanmah in hremtu pawlih sualnak pawl kha ngaidam ve uhsi. Stephen cu Bawi Jesuh vekin a thi hlan ah a thlarau cu Pathian hnenah a hlan vekin kannih tla nitin kan it hlanah kan nunnak le kan thlarau cu Pathian hnenah hlan ve uhsi. 

“Bawipa in a tharin lo thluasuah hram seh!”