Na ruangpi kha Cross cuangter aw (sim tu - Rev. Fr. Dominic Hnin)

Na ruangpi kha Cross cuangter aw

Thuthangtha sim tu - Rev. Fr. Dominic Thawm Hlei Hnin

Caantluang zarh (29) nak, tlawngkai nihnih ni (October 20, 2020)

Siarding: Ephe. 2:12-22; Ps. 85:8-13; Lk 12:35-38

• Tuisun kan siarmi Bible hmaisa Ephesus cakuat sungah "remdaihnak" timi tongfang kan hmu (Ephe 2:14, 15, 17). Cui remdaihnak cun Gentiles pawl le Jew pawl ih karlak ih a ummi rualremnak le pumkhat sinak a khih hmuh bik.

• Kan theih ringring vek in Jew pawl cu Pathian ih miphun an si ih Jew silo hmuahhmuah cu Pathian thawn pehtlaihnak neilo ti ih ruahmi an si.

• (Rom 9:4) ahcun "Annih tla cu Israel mi an si; Pathian in a faale ah a canter ih a sunlawinak cu an hnenah a langter; anmah thawn thukamnak tla a tuah ii an hnenah Daan a pek; anmah in a dikmi biaknak an nei ii Pathian ih thutiamnak a cotu an si" a ti. Gentile pawl cu "thutiamnak" an co ve lo ruangah Vancung ro an sar ban lo tinak a si.

• Gentile pawl cu vancungram thawn pehtlaihnak a um lo ti mi langter dingah cangantu cun "rammi sinak le mikhual sinak" hmuithlam a hmang. Vancungram thawi pehpar in Jew pawl cu "rammi" an rak si ih Gentile pawl cu "mikhual" an rak si.

• Jew miphun cu Pathian ih miphun an si ti-ih hminsinnak ah "vunzim tan ding" ti a si. Himi "vunzim tannak" cu Jew miphun le miphun dang ih danglamnak hruangpi a rak si. Cumi daan cu tu-ah Khirh in a phelhsak zo. Khrih ih thihnak le thawhsalnak cu mi hmuahmuah hrangah a si ih thleidannak a um lo. Tiduhsan cu Khrih ih thihnak le thawhsalnak in tthenttheknak hruang cu a siatbal ih miphun phunhnih ihsin phunkhat ah a cangter. Jew le Gentile pawl cu tu ahcun Khrih ah pumkhat an si thlang.

• Jesuh cu lei tisa thawi a tlanlen lai caan ah "Jew miphun le miphun dang" ti in thleidannak a rak um nan, Jesuh ih mangbangza a ruangpum a simi Kohhran san ahcun Jews miphun le miphun hmuahhmuah ih umnak Kohhran a si vek in thleidannak a um nawn o. Jesuh ih lei tisa cu Thinglamtah parih a thihnak thawngin tthenttheknak hruang cu a cemter ih remdaihnak zinpi in sialsak a si. Curuangah Jew pawl siseh, Gentile pawl siseh hmunkhat te-in Thlarau thawngin Pa ih hnen an thleng thei.

• Kan Bible cun "Lamhla lamnai" timi khurram khihhmuhnak ttongfang hmangin Gentile pawl le Pathian kar ih a rak ummi pehtlaihnak dinhmun le Khrih ih thihnak ih vuirah asimi tu ih an dinhmun pawl cu a rel.

• Act 10:28 lam kan zoh a si le "Ka biaknak daan vek a si ahcun Judah mi in Gentile mi leen ding le pawl ding cu khammi a si" tiah Peter cun a rak ti. Jew pawl le Gentile pawl ih karlak ih a rak ummi ral awknak a langter. Asinan tu ahcun Khrih ruangah an remaw zo.

• Gentile pawl cu tu ahcun Khrih ih kohhran sungah mikhual an si nawnlo, ramdangmi an si nawnlo, innteek an si ve. Jew pawl thawn bangrep te-in covo an nei ve, Annih cu Tirhthlah pawl le Prophet pawl parih sakmi Pathian ih Inn ah sungtel an si zo. Cui inn ih suutpi ban cu amah Bawipa Jesuh Khrih a si.

• Himi ah kan Lai Bible ih ttong a leh daan hi ruah ding a um. Lai Bible cun "tirhthlah le prophet pawl in a hram an phum suakmi parih sakmi inn nan si ve zo ih a kiil ih lungphum cu Khirh Jesuh a si" a ti. Himi ca ngandaan ahcun Tirhthlah pawl le Prophet pawl cu inn hram siloin innhram buntu, hnattuantu men in an lang.

• Khat lamah, Rev 21:14 "Khuapi kulhnak phar cu innhram ttohnak lungto hleihnih parih phunmi a si, cuih lungto par ahcun Tuufa ih tirhthlah hleihnih pawl ih hmin an ngan" a ti.

• Curuangah, kan Bible ih a rel duhmi sawn cu "Tirhthlah le Prophet pawl cu innhram an si ih cui innhram a buntu cu Pathian" a si. Tiduhsan cu Pathian in Tirhthlah le Prophet pawl parih, anmah hmangih, hram a bunmi a innpi, a kohhran, ah sungsuak fa an si ve ih covo an nei ve.

• Khrih cu innhram (foundation) a si thu (1Cor 3:11) ah kan hmu, "Pathian in Jesuh Khrih cu innhram thupi bik dingah a ret zo ih innhramdang ttoh bet a theih lo" a ti.

• Cangantu Paul cun Innhram sinak cu Jesuh ihsin Tirhthlah pawl ah a thawn thu kan hmu. Jesuh cu Innhram (1Cor 3:11) a si vekin Tirhthlah pawl khal innhram (Ephe 2:20) an si ve. Asinan "Jesuh siarlo innhramdang ttoh a ngah lo (1Cor 3:11)" ti a si tikah Jesuh le Tirhthlah pawl ih innhram sinak cu a dangdang si loin hmunkhat a si.

• Cun Paul ih "tirhthlah le prophet" a ti mi pawl khal hi "dungthluntu hleihnih le hlanlai prophet pawl" si loin "dungthluntu pawl ih hnattuan a rawn pehzomtu pawl" a khih hmuh sawn. Cuti a si tikah caan cu liam in san khal thleng aw hmanseh, Bawipa ih ruangpum cu tthekdarh a theih lo, pumkhat a si ringring. Zumnak hrampi ih "mi thianghlim pawl ih pumkhat sinak  ka zum" kan timi khi tu ah a fiang nasa.

• Paul ih thuruah daan ah Bawipa ih thihnak ih a rah mi rualremsalnak (reconciliation) cun Pathian thawi remdaihnak le pumkhat sinak (Rom 5:9-11; 2Cor 5:18-20) a cang ter. "Tlun le hnuai" ti in a tung zawng ih remdaihnak a si. Tu ih kan siarmi Ephesus cakuat ahcun karbak pakhat a kai bet ih Pathian thawi rualremsalnak lawng si loin Jew pawl le Gentile pawl ih rualremnak le pumkhat sinak tiang a huap. "Minung le minung" timi a phei zawng ih remdaihnak a si. A tung le a phei ti in Cross ih remdaihnak a si.

• Himi pawl kan zohkhawm tikah Jesuh ih ruangpumpi a simi a lei tisa ruangpi le mangbangza a ruangpi a simi Kohhran cu tthentthek theihlo in a pehzomaw ih pumkhat a si zia a lang vivo.

• Kan pu bik Adam ih sualnak ruangah (Rom 5:12-17)  Pathian thawi a hla aw zo mi mihlun cu Khrih ah mithar si in, Cross thawngin Pathian thawn remdaihnak kan nei thei sal. Adam le Khrih timi Sualnak le piantharnak hmuihmel cu hmang in Jew le Gentile pawl in an ralawknak cu pahtlang in, hmunkhat te in Khrih ih ruangpumpi an tung ding tlang.

• Van lam cuan in Pathian thawi remdaihnak kha na ruahsan laiah na baan pharh in na kiang na kap ih minung pawl thawn rualremnak tuah aw. Cuticun na ruangpi cu Cross cuang in na hmu aw ding ih remdaihnak Cross na hmu ding.

• Na ban na pharh thei hlan sung cu kut neilo vek na bang ding ih thingbul vekin na lang ding. Midang thawn rualremnak nei in na ban na pharh thei lawngah na kut a lang dingih a famkimmi na ruangpum cu Cross vekin hmuh a theih ding.

• Curuangah, a famkimmi ruangpum pakhat si dingah remdaihnak ban hei pharh aw.