Naute Jesuh Timtuah tu le Cohlang Tu (sim tu - Rev. Fr. Lucas Tha Ling Sum) December 29, 2022

Naute Jesuh Timtuah tu le Cohlang Tu

December 29, 2022

Lk 2:22-35 (Biakinn ah Jesuh an feh pi)

            Lamhla lamnai ih a um mi zumtu u le nau, nan zaten, Merry Christmas tiah cibai ka lo buk a si. Tucu Adventu caan ihsin Christmas caan sungah kan um zo. Kan hngah rero mi Bawi Jesuh cu  minung cannak a la ih Bethlehem khua caw rawl einak kuang sungah a suak; Emanuel, Pathian cu kan hnenah a um; Pathian in in umpi tinak a si.

Zumtu u le nau, tuittum ih kan ruah khawm dingmi ih ka duh mi cu Adventu caan ah zo in a tthabik le famkim bik in Bawi Jesuh ih hrangah tim a tuah? Cun zo in, a tthabik in Christmas caan ah Bawi Jesuh a cohlang? timi a si.

Leilung tlunih a mi zumtu kan zaten Bawi Jesuh ratnak dingah hrangih timtuah lo tu zo hman kan um lo. Asinan, a tthabik le famkim bik ih timtuah tu cu Mari le Joseph an si. Hmaisa ah ziangtin Bawi Nu Mari in tim a tuah timi tawiten von zoh uh si.

Gabriel:           “Na parah daihnak um ko seh. Bawipa na hnenah a umih thluasuahnak tampi a lo pek a si,” tiah a ti. Cuih vancungmi ih thusim a theih tikah Mari cu a don a har ngaingai ih a ttong mi ih tican cu ziang a si pei tiah mangbang in a um. Cule vancung mi in “Mari ttih thlah. Pathian cu na parah zangfahnak a nei a si. Fa na von dingih fapa na hring ding. A hmin ah Jesuh na sak ding. Mi maksak a si dingih cungnungbik Pathian ih fapa tiah kawh a si ding. Amah cu Bawipa Pathian in a pu David bangtuk in siangpahrang ah a tuah ding ih Jakob ih tefasin pawl ih tlunah a kumkhua in siangpahrang a si ding. Amaih uknak cu a cem dah lo ding,” tiah a sim.

Mari:               Mari in vancung mi hnenah, “Kei cu fala him ka si. Cubangtuk cu ziangtinso a si thei ding?” tiah a ti.

Gabriel:           Vancungmi in “Thlarau Thianghlim cu na hnenah a ra thleng dingih Pathian cahnak huham cu na parah a um ding. Curuangah hi fa thianghlim cu Pathian fapa tiah kawh a si ding. Na sungte Elizabeth khan a thei a si lo maw? Fa a nei thei nawn lo tiah simrel mi a si nan a tar zet hnu ah fa a von ih a tu ah thlaruk a si zo. Ziangtin a si tile Pathian ih tuah thei lo mi zianghman a um lo,” tiah a si.

Mari:               Mari in “Kei cu Bawipai salnu ka si. Na sim vek cun ka parah si koseh,” tiah a ti.

            Zumtu u le nau, himi ciah te hi a si, Bawi Nu Maria ih tim a tuah daan. “Kei cu Bawipai salnu ka si. Na sim vek cun ka parah si koseh,” a ti. A nunnak hmuahhmuah cu Pathian hnenah a hlan a si.

            Cun a pa 2 nakah ziangtin Mithianghlim Joseph in tim a tuah ? timi von zoh hrih uh si.

Briefly on Joseph’s call

            Mt 1:18-20; Mari cu Josef thawn an ham aw ih an tthit awk hlanah Thlarau Thianghlim ih f aka nei ding ti a thei. A hamtu Josef cu mi tha a si ruangah Mari kha mi hmai ah ningzak ih um ter a duh lo ih an hamawknak cu a thupten phelh sal a tum. Cu mi thu a ruah rero laiah a mangah Bawipai vancung mi pakhat a hnenah a langih “David fefasin Josef, Mari hi na nupi ih tthit diingah tthih hlah. Ziangah tilen fa a vonnak hi Thlarau Thianghlim thawngin a si” tiah a ti.

            24 “Josef cu a hung tthang ih Bawipai vancung mi ih a fial vekin Mari cu a tthit.”

Zumtu u le nau, himi ciah te hi a si, Joseph ih Bawi Jesuh ih ratnak tim a tuah daan. Mari cu tthen a tum nan, “Bawipai vancung mi ih a fial vekin Mari cu a tthit” ee a ti.

            Cun a pa 3 nak ah a tthabik ih Nau te Jesuh a cohlang tu cu Mari le Joseph an siih ziangtin an cohlang a si, timi vonzoh bet uh si.

Tuisun ih kan siar mi LK 2:22-24 Moses daan sungih a um bangtukin thiannak hrangih tuah ttul mi pawl kha Josef le Mari in an tuah ding tikcu a thleng. Curuangah naute cu Bawipai hnenih ap dingin Jerusalem ah an fehpi. Bawipai daan cauk sungah “Fatir mipa paohpaoh cu Bawipai hnenah nan ap pei,” tiah ngan cia mi a um. Cun tlunah Bawipai daan sungih a um vekin thuro khuahkhat a silole laileng fate pahnih thawn thawinak pe dingah an fehpi. (22-24)

Mari le Joseph ih Bawi Jesuh an cohlan daan a ttha tuk, a famkim tuk. Naute Jesuh cu tthaten an tuamhlam, Herod Siangpahrang ih kut sung in an ruun. Cun tuisun ih kan cathianghlim in hitin in sim: Mari le Joseph in Bawipai hnenih ap dingin Jerusalem ah an feh pi, a si a ti.

Zumtu u le nau, Mari le Joseph bangin kan nih khal nitin kan nunnak ah Jesuh a cohlang tu sithei dingin zuam sin uh si. Pathian in nan zaten thlawsuah lo pe hram seh. Amen.