A Netnak Tiang Thlun Aw (sim tu Rev. Fr. Peter Zin), April 24, 2021.

A Netnak Tiang Thlun Aw

Thuthangtha sim tu Rev. Fr. Peter Lal Zin Thang

April 24, 2021.

Siarding; Tirh. 9:31-42; Saam 116: 12-17 (15); Jn. 6: 60-69.

            “Bawipa, zo ih hnenah so kan feh cuang ding? Kumkhua nunnak petu ṭongkam a neitu cu nangmah na si!” 

            RVA Falam Service in Thuthangṭha ngai in thlarau thazaang a laktu Bawi Khrih ah duhdawtmi nu le pa, u le nau pawl, nan um nak cio ah Bawipa in a lo kilkhawi ringring seh la hnangam daihnak a lo pe hia hram seh. Bawi Jesuh hi leitlun ah thuthangṭha sim in a tlan len lai ah thil maksak tampi a tuah ruangah a mah a thlun duh tu, amah a rinsan duh tu tam zet an rak um dah. Hipa hi a tawk rori, rinsan tlak rori asi tiah siangpahrang ah tuah an duh tikhal cu Johan 6:15 ah kan hmu thei. Tuhrawng Gospel kan siar mi khal cu Johan 6 nak sung in a si ih tuni ah a net nak lam a si mi Johan 6:60-69 tiang kha kan siar a si.

            Johan 6 hi Bawipa Thisa thawn pehpar in a thupi zet mi bung pakhat a si ih a tawi zong in kan sim ding a si le: Bawi Jesuh in thuthangṭha ngai ding in amah a rak thluntu mipi pawl kha sanghlom panga le nga pahnih thawn khop zet in rawl a dar tikah mipi in Bawi Jesuh kha an siangpahrang ah tuah an duh. Bawi Jesuh cu siangpahrang a si nan leitlun ram uktu siangpahrang pawl vek si ding in a ra mi a silo ruangah leitlun siangpahrang ih an tuah tum mi kha a duh lo ih mipi pawl cu a tansan hai ta ih dungthluntu 12 pawl thawn tili ral khat lam ah an feh. Mipi pawl khal cu dung sip lo in Bawi Jesuh le dungthluntu pawl ih an feh nak hmun tiang ke in an va hawl, an va dawi vivo. Cuti rori in mipi in a mah kha an duh an pan ciamco nan Bawi Jesuh cu lungawi le thazaang ngah zet in a um lo. ‘Nan nih in in hawl hi sang khop zet in nan ei ruangah a si. A siat theimi rawl hrangah hnaṭuan hlah uh; sikhalsehla kumkhua a daihmi nunnak rawl hrangah ṭuan uh,’ tiah nun a sim hai a si.

            Cun sang menmen siloin kumkhua nunnak pethei tu sangnung, nunnak sang thu hla a sim ciamco tikah an duh tuk ih ‘Bawipa, cuih sang cu in pe ringring aw,’ tiah an dil. Cutikah Bawipa in cuih sang cu amah ruangpum a si nak thu a sim, ‘Keimah hi vancung ihsin a rung ṭummi sang nung ka si. Ka pek dingmi sang cu hi leilung in nunnak a ngah theinak dingih ka pekmi ka taksa hi a si,’ tiah fiang lawlaw in a sim hia. Cumi zirhnak an thei tikah Bawi Jesuh rinsan zet in a thlun tu mitam pi pawl cu an buai celcel thlang. Cutiin a taksa ei ding thu a zirh tikah mipi in an cohlang thei lo nak thu hi tuni kan siar mi Gospel Johan 6:60-69 sungah kan hmu thei a si. Kan ngai ta hrih pei. 

Johan 6:60-69

            Amah a thluntu tampi in cuih thu cu an thei ih, “A thu zirhmi hi a har tuk ual! Zoso a cohlang thei ding?” tiah an ti. An sim lo nain cuih thu ah an phunzai ciamco ti kha Jesuh in a thei ih an hnenah, “Himi hin nan thinlung ah buainak a suahter maw si? Thuṭhimnak ah Milai Fapa hi hlanih a rak umnak hmunih a hung fehsal kha hmu uhla ziangtinso nan ti ding? Nunnak taktak a petu cu Thlarau a si; milai ih taksa cu san a tlai lo. Nan hnenih ka simmi ṭongkam hi nunnak le Thlarau petu a si. Asinan mi ṭhenkhat cun nan zum lo,” tiah a ti. Jesuh in a hramthokte ihsin zoso i zum lotu ding, tile zoso i zuartu ding ticu a thei ṭheh zo. Cule Jesuh in, “Hiti a si ruangah sokhaw Pa in ka hnenih a ratter lo ahcun zohman ka hnenah an ra thei lo ding, tiah ka lo simnak kha a si cu!” tiah a ti. Curuangah Jesuh dungthluntu misenpi cun kir in an tlansan. Curuangah a dungthluntu hleihnih kha, “Nannih teh tlan nan duh ve maw?” tiah a sut. Simon Piter in, “Bawipa, zo ih hnenah so kan feh cuang ding? Kumkhua nunnak petu ṭongkam a neitu cu nangmah na sisi! Cule atu cun Pathian hnen ihsin a rami Mi Thianghlim na si, ti kha kan zum ih kan thei ngah a si,” tiah a ti.

            Bawi Jesuh in a thu zirh mi mipi tam sawn in an thlun lo tikah nan thlun thei lo a si le a dang deuh in ka lo tuah sak ding, ka thleng sal ding tivek in a ṭong a let sal lo. A simmi cu a simmi vek in a si ko. Bawipa hrangah ka sim sual pang tivek a um dah lo. Mi tam pi in an tlansan nan a poi a ti lo ih cubetah a dungthluntu hlei hnih hman kha, ‘Nannih teh tlan nan duh ve maw?’ a ti bet lai a si. Bawipa hi minun nem, mi zaangfah thiam, mi zawnruat thiam bik asi. Asinan thudik a sim mi thawn pehpar in mipi in an duh lo hman ah, an pom thei lo hman ah ziang tik hman ah a thleng sal dah lo a si. Cu ruangah zumtu u le nau, Bawipa kan zum kan ti tikah kan mah duhnak tuah ter ding siloin a mah duhnak kan tuah ding hi a thupi sawn le kan ṭul sawn mi a si.

            Bawi Jesuh in ‘Nannih teh tlan nan duh ve maw?’ tiah a dungthluntu 12 kha a sut tikah, Peter cun, “Bawipa, zo ih hnenah so kan feh cuang ding? Kumkhua nunnak petu ṭongkam a neitu cu nangmah na sisi! Cule atu cun Pathian hnen ihsin a rami Mi Thianghlim na si, ti kha kan zum ih kan thei ngah a si,” tiah a ti. A taktak cun Peter le a dungthluntu pawl in Bawipa in ziangtin a taksa cu ei dingah in pek thei ding ti an thei ve lo. An thei lo nan an zum. Bawipa ih ṭongkam cu kumkhua nunnak pe theitu ṭongkam a si ti an zum. Cumi kumkhua nunnak petheitu ṭongkam in, ‘ka taksa ei uh, ka thi in uh,’ a ti cun a ti vek in ei in ding cu kan hna ṭuan kan covo a si. Curuangah kan pawlpi sungah a sangbikmi biaknak, a sunglawibik mi kan tuah nak cu Missa raithawinak ah tel in Bawipa thisa einak hi a si. 

            Minung tampi cun Bawipa an rinsan zet an uar zet nan a Thisa ei in ding thawn pehpar in zumnak an nei thei lo ruangah an tlan ṭheh ta. A thok ah cu an thlun nan a cem net nak tiang an thlun thei lo. A thi le sa ei in ding a zumtu a cohlang thei tu pawl in lawng a cem netnak tiang an thlun ngah an thlun thei a si. Bawipa thlun cu a har mi a si. Thinglamtah lampi a si. Asinan a net nak ah nehnak a um. Kan Bawipa kha a netnak tiang a thlun ringring thei tu si ding in thluasuah dil in zuam cio uh si. 

Fr. Peter Lal Zin Thang (Hakha Diocese)