Nga Tha le Nga Tha Lo (sim tu - Rev. Fr. Lucas Tha Ling Sum) July 28, 2022

Nga tha le Nga tha lo

Thuthangtha sim tu - Rev. Fr. Lucas Tha Ling Sum

July 28, 2022

Mt 13:47-53

Zumtu u le nau, nan hnenah Pathian um hram seh. Tuittum ah tidai sungih a um mi “Nga tha le nga tha lo” timi thu ruat khawm uhsi. Hmaisa ah Baibal tawiten kan ngai ta hrih pei. Mt 13:47-50.

“Vancung uknak cu tili sungih vorh mi sur bangtuk a si. Nga kaitu hrek khat in an sur cu tili sungah an vorh ih nga phun kim an awk. An sur a khah tikah ti kap ah an hnuk ih an to hmun in nga cu an hril; nga tha pawl cu an bawm sungah an san ih nga thalo cu an hlon. Cubangtuk in san cemnak caan ahcun a si ding; vancung mi pawl an feh ding ih mi tha pawl lak ihsin mi tha lo pawl cu an khawm dingih, meisa sungah an hlon ding. Cu tawkah an tap an raak dingih an hacang an rial ding a si, tiah a ti.”

Himi cu Pathian ih ttongkam a si. Bawi Jesuh Khrih hnenah thangtthatnak um seh law.

Zumtu u le nau, tui ttum ih kan Baibal siar mi cu vancung uknak cu tili sungih vorh mi sur bangtuk a si e, tiah Bawi Jesuh ih mipi pawl tahtthimnak thawi a zirh mi thu a si.

A pakhatnak ah Vancung uknak kan timi hi ziang a si pei, timi hmaisa ah zoh uhsi. Baibal cathiam pawl in mirang ttongih “kingdom” kan timi vancung uknak hi phun hnih in tthen thei a si, an ti. Phunkhatnak cu Fapa ih uknak ram (kingdom of the Son) a siih, a pahnihnak cu Pathian ih uknak ram (kingdom of God) a si. Cun ziangtin an sim bet hrih a si tilen Fapa ih uknak ram hi cu leitlun ih a um mi pawlpi (lolen Kawhhran) a si e, an ti.

A pahnihnak ih, ka ron lo hlawm duh mi cu tuittum Bawi Jesuh ih tahtthimnak ih a sim mi ah “Vancung uknak cu tili sungih vorh mi sur bangtuk a si. Nga kaitu in an sur cu tili sungah an vorh ih nga phun kim an awk. Cun nga cu an hril ih nga tha pawl cu an bawm sungah an san ih nga thalo cu an hlon a si, timi a si. Bawi Jesuh in ziang a sim duh a si pei?

Zumtu u le nau, sur vorh tu paih sur sungih nga ttha le nga ttha lo an um bangtuk in Bawi Jesuh ih kawhhran sung khal ah, mittha le mitha lo, kan um a si, miti Bawi Jesuh ih a sim duh mi a si.

Cun a pathumnak ah Bawi Jesuh in hitin a sim bet hrih: “Nga tha pawl cu bawm sungah an san ih nga thalo cu an hlon. Cubangtuk in san cemnak caan ahcun vancung mi pawl an feh ding ih mi tha pawl lak ihsin mi tha lo pawl cu an khawm dingih, meisa sungah an hlon ding a si,” a ti. A tawi zawngih kan sim a silen mittha kan si len, vancung uknak ramah kan lut dingih mittha lo kan silen, hell ramah kan feh ding a si, tinak a si.

Zumtu u le nau, Bawi Jesuh in hell ram kan feh ding a phan tuk ruangah hell ram ih tla lo dingin ralrinnak in pek mi a si. Mitha si dingin zuam uh, tiih in sawm mi a si. Duhdawtmi u le nau, sacrament pawl, a hleice in sualthlahnak le Bawi Jesuh ih thi le sa, saannak in siseh, pumkhawmnak in siseh, hnattha ttuannak le thlacamnak in siseh, mittha si thei dingin  thinsau ten, zuam sin uh si.

Pathian in nan zaten na ttulsam mi thlawsuah lo pe hram seh. Amen.