Ni Netabik ah Nunnak ah (sim tu - Rev. Fr. Lucas Tha Ling Sum) June 2, 2021

"Ni Netabik ah Nunnak ah"

Thuthangtha sim tu - Rev. Fr. Lucas Tha Ling Sum

June 2, 2021 (Wednesday)

Siarding: Tob 3: 1-11, 16-17; Saam 25: 2-9; Mk 12: 18-27.

          Nan zaten Pathian in a thar in thlawsuah lo pe hram seh, tiah RVA ihsin thla ka lo camsak a si. Tuittumah “Ni Netabik ah Nunnak ah” timi thu thawi ten hlawm aw tlang uh sih. Hmaisa ah Baibal kan ngai ta pei. 

Marka 12:18-27,

          “Cule Sadusi tthenkhat, thih hnu ahcun zohman an thosal lo ding, tiah a zumtu pawl Jesuh hnenah an ra ih, “Sayapa, Moses in daan in ngan sak mi ah, Mipa pakhat a thih ih faate nei lo in nupi a ttan ahcun faate nei ih a can salnak dingah a thihsan mi a nupi cu a naupa in a tthi pei, tiah a um. Veikkhat ah unau pasarih an um; upa bik pa cu nupi a tthi ih fate nei lo in a thi. A pahnihnak pa in cunu cu a tthi ih fate nei lo in a thi ve. Cuvek tthiamtthiam in a pathumnak in cunu cu a tthi nan a thih san lala. An zate in fa nei lo in an thi ttheh. An pasarih in cunu cu an tthi ih fate nei lo in an thi ttheh a si. Netabik ah nunau nu khal a thi ve. Curuangah thawhsal caan mithi an thawhsal ni ah cunu cu zo ih nupi bik so a si dng? An pasarih in a tthi fingfing fawn, tiah an sut. 

          Jesuh in nan va palh lawmmam so? Ziangah kan palh ti nan thei maw? Cathianghlim siseh, Pathian cahnak huham siseh, nan theih lo ruangah a si. Ziangah tile mithi pawl an thawhsal tikah vancung ih vanmi bangtuk an si ding ruangah tthit awk ti a um nawn lo ding. Mithi thawhsalnak thu ahcun Moses cabu sungih hrambur a kang mi thu kha nan siar dah lo maw? Cutawkah Pathian in Moses hnenah, Keimah cu Abraham in Pathian, Isaak in Pathian, le Jacob in Pathian ka si, a ti. Pathian cu a nung mi pawl ih Pathian a si, a thi mi pawl ih Pathian a si lo. Curuangah nan palh nasa a si, tiah a ti.

          Zumtu u le nau, tui kan siar mi kan Bible sungih kan thei vek in Sadusi kan timi pawl hi thawhsalnak a um timi zum lo tu pawl an si. Curuangah Bawi Jesuh ih hnenah an ra ih thawhsalnak thu thawn pehpar in thu a sut a si. Jesuh in thawhsalnak a um thu le thawhsal hnu ahcun vancung mi vek kan si dingih tthit umnak tivek a um nawn lo ding a si. Pathian cu a nungmi pawl ih Pathian a si, tiah fiang ten a sim.

          Sadusi pawl ih thusuh mi hi kan hrang khal ah a thu pi zet mi a si. Paul in 1 Korin 15:14 sungah hi tin in sim: thihnak ihsin Khrih thawhter lo a si ahcun thuthang phuan ding zianghman nan nei lo. Cuih tlunah Pathian ih thu ah thuphan per ah kan cang ding a si, a ti. Cun Jesuh Khirh thihnak ihsin a thawh thu ih dungtluntu pawl ih thu sim mi kan zoh khal asilen Jesuh cu thihnak ihsin a tho sal zo a si, timi “thawhsalnak thu” hi a thupibik ih an sim mi le an phuan mi a si.

          Milai hi thihnak ihsin thosal ding hlir te kan si. Thawhsalnak um lo sehla Jesuh zumtu si rero a ttul lo ding a si.Cutin asilen zo pawl cu thihnak ihsin Jesuh in a tho ter sal pei? Himi thu thawh pehpar aw in Baibal catlang pakhat in kan zo pei. Johan 6:54 “Zokhal ka taksa a ei ih ka thisen a in tu cu kumkhua nunnak a nei ih ni netabik ah nunnak ah ka tho ter ding.” Bawi Jesuh ih thi le sa ei tu kan si ahcun ni netabik ni ih thawhter mi kan si ding, tiah kan Baibal in sim.

          Zumtu u le nau, ni netabik ah Jesuh Khrih ih thawh ter mi si thei dingin Missa sumnak ah tel thei ding in thlacamnak thawn zuam ciau uhsi.