Nitin Thuthangtha (Rev. Fr. David Kap Cin Mang ih sim mi)

September 20, 2019 ni hrangih Thuthangtha hlawmawknak

Tuitum cu Pawlpi ih a voi khatnak Bible siar dingih in khiah sak mi ITim 6:2-12 sungin hlawmawknak kan run nei ding. Tuini kan hlawm awk ding Thuthangtha cu point 3 in kan run then ding: 1) Kan sinak ih zir in khat le khat upat awk ding; 2) Zirhnak dik kaihhnget a tul; 3) Biaknak le Lennak.

1. Kan sinak ih zir in khat le khat upat awk ding

Tuini kan siarmi sungahTimothy hnen ah Paul in sal pawl in an bawi pawl an upat ding a tul zia a rak sim. Kan bawi pawl khal Khrihfa unau an si ve paam tiih ziang siar lo ih um ding an si lo a ti. Philimon hnen ih Paul ih ca a kuat mi kan zoh tikah a hnen ih sin a tlantu a sal Onesimus hi a hnen umter sal ih unau pakhat vek ih zoh ding a rak fial thu kan hmu. Curuangah Paul ih zirh duh mi cu sal pawl in an bawi pawl an upat a tul vek in sal nei pawl khal in an sal pawl hi sal hman in hmang men lo ih unau sungkhat vek ih zoh ding ti a si. Kan kiang le kan kap kan zoh tikah sal le bawi ti kan um nawn lo nan, khui tawk society khal ah upa le nauta  ti kan um fingfing a si. Nauta pawl in an upa pawl upat tihzah a tul vek in upa pawl khal in an kut hnuai minung pawl tha teih an zoh a tul ve. 

Upa pawl khal in kan kuttang mipi pawl hrangah tuanvo kan nei, mipi thatnak hrangih hnatuan kan sit i kan theih a tul vek in mipi khal in kan upa pawl kan upat ih an lam hruainak kan thlun le an thu kan ngai a tul. Minung ti cu sinak mahfek nei cio kan si vek in kan sinak khal a bangaw lo. Curuangah mi pakhatkhat ih sinak tawkih kan zoh thiam le kan upat thiam a tul. Kan khua le kan ram ih kan hruaitu upa pawl an ra tlawn tikah mihrek khat cun, annih khal minung milai ciocio an si ve si; sunloih ciamco le zohkhung ciamco a tul lo, tiih lungput nei tla kan rak um theu. Asinain, tuini kan siar mi Paul ih cakuat ih in zirh vek cun, kan upa pawl khal in hruaitu an si vek in hruaitu covo an nei ih acuih covo cu mipi in kan pek ve a tul a si. Minung milai ciocio an si ko nan, hruaitu sinak neitu an si vek in an sinak cu kan upat a tul tinak a si. Zo vek minung khal upat tlak sinak nei lo ti kan um lo. Kan sinak te thei ih kan sinak ih zir ih kan nun thiam ding le miih sinak khal kan hmuh thiam le kan upat thiam a si ah cun, hnangam daihnak le rualremnak thawn a khat mi societ pi, umtu khawsaknak kan din thei ding a si.

2. Zirhnak dik kaihhnget a tul

Paul in Timothy hnen ah “Zo khal kan Bawipa Jesuh Khrih tong a dik mi le kan biaknak ih zirh mi thawn a mil aw lomi thu mi a zirhtu cu, ziang hman thei hnai lo ih mi puarthau men an si” a rak ti. Cuvek minung pawl hi kan ralrin nasa a tul. Leilung tlun kan zoh tikah biaknak a phunphun a um kan hmu ko. Ziangvek biaknak khal a si ah, doctrine timi zirhnak nei lo mi biaknak ti a um lo. Kannih Christian biaknak a thluntu pawl khal in acuih biaknak ih zirhmi si kan zum. Kan zum mi zirhnak hi a dik maw dik lo ti kan hliah ngah a poimawh nasa. Ziangmi zirhnak ka pom ih ka zum timi kan theih lo tikah, mi ih bumnak, a silo le, Paul ih timi mi puarthau pawl ih thangkam mi in in awk ngah pang theu a si. 

Hi tawk fang te ih kan ralrin ding a thupi zet mi cu, Christian biaknak ah zirhnak dangdang a phunphun kan neih mi hi a si. Christian biaknak sungah zirhnak dangdang a um vek in kawhhran dangdang khal a um ve. Kan zaten Bible sirhsan ih zirhnak nei cio kan si ti’n tluang kan khawng cio fawn; Christian biaknak sungah khuitawk kawhhran ah zirhnak dik a um ti hi vun zingzoi a tul bet mi thil pakhat a si lala. Bible in hi ti’n a ti, kha ti’n a ti, tiih mai duhduh ih zirhnak a phunphun kan suah tikah thentheknak tampi a rak suak a si. Bible hi biaknak ihsin a rami a si ih, biaknak ih zirhnak pakhat a si ti kan theihfiang a tul. Christian biaknak um lo sehla Christian Bible ti a um lo ding. Zirhnak pakhat a simi Bible ih zirh duh mi taktak hi biaknak sungih hruaitu mifim pawl ih phorhsuah ding a si. Mai duhduh ih Bible sullam kan phorhsuah ruangah zirhnak dangdang a rung um ih kan thenthek nak bik a si. Christian zumtu pawl ih kan ralrin ding mi cu, mai pumcawmnak ah biaknak hmangin, Bible in hi ti’n a ti, kha ti’n a ti ti ih zirhnak dangdang phorhsuah tu pawl hi a si. Zirhnak dik kan thei ngah ih kan thlun a si ah cun, zo hman in in bum thei lo ding.

3. Biaknak le Lennak

Tuini kan siar mi ah Paul in mi hrekkhat cun biaknak hi lennak lamzin pakhat ah an ruat a ti. Nang le kei the biaknak hi ziangtin kan ruat. Biaknak hi lei par hrang lawngih kan ruah a si ah cun, kan duhthusam in tlin ter thei lo can ah biaknak tansan a ol ngaingai. Lei par sum le saw, thil le ri ih kan buai tuk tikah, biaknak ih zirhnak thlun a har. Curuangah Paul in paisa duh tuk cu sualnak phunkip thoktu hram a si a ti. Zumtu nang le kei, biaknak kan thlun hi lei par hrang lawng ah a si lo, nehhnu san tiang daih mi thil a si ti hi vun ruat that sal uh si. Sumsaw thilri ih kan buai tuk can ah tuini Paul ih in zirhmi lei par kan rat ah ziang hman kan rak ken lo vek in, leilung kan suahsan can khal ah ziang hman kan keng thei lo ding ti hi cinken ringring tum uh si. Lei par hrang lawng a ruat lo ih hmailam thlarau nunnak tiang a ruat ringring tu cun, leitlun sum le saw, thil le ri pawl hi amaih hlohralnak ding ah hmang lo in, a thlarau nunnak dingah a hmang thiam a si. 

Christian zumtu kan zaten tui ni Paul ih Timothy hnen ih a sim mi kan theih vek in, kannih khal dingnak, thianhlimnak, zumnak, duhdawtnak, tuartheinak, le lungnemnak pawl nei thei ringring ding in zuam cio uh si.