Nitin Thuthangtha (Rev. Fr. David Kap Cin Mang ih sim mi)

Mithianghlim Matthai ih Puai ni (Rev. Fr. David Kap Cin Mang ih Thuthangtha sim mi)

Bible Vei (1) siarnak

Pumkhat Sinak (Efesa 4: 1 – 7, 11 - 13)

¹Bawipa ih hnaṭuannak ruangih thawng a tlami keimah in Pathian kawhmi nan si bangtuk in nan nunnak ah amah ih kawhmi nan sinak kha langter uh, tiah ka lo forh. ²Thinlung neemnak nei uh; tangdor le thinsau in um uh. Duhdawtnak nan neihmi kha pakhat le pakhat nan zawi-eet thei awknak in langter uh. ³Thlarau in a lo pekmi pumkhat sinak kha ṭunghmun dingah hmun khatih a lo ṭemkhawmtu ih remnak in hmunter uh. ⁴Pathian in a lo kawh tikah a lo kawh sanmi ruahsannak cu pakhat a si vekin ruangpum pakhat a um ih Thlarau khal pakhat a um. ⁵Bawi pakhat a um, rinnak pakhat a um, baptisma pakhat a um. ⁶Pathian pakhat a um ih mi hmuahhmuah ih Pa a si. Amah cu ziang hmuahhmuah ih tlunah Bawi a si; ziang hmuahhmuah sungin hna a ṭuan ih ziang hmuahhmuah sungah a um. ⁷Kan zate pumpak ciar in covo laksawng kan nei fingfing ih cumi cu Khrih ih in pek ciarmi vekin a si.

¹¹“Minung hnenih laksawng a petu,” khal cu amah a si. A laksawng pekmi cu: a hrek cu tirhthlah an si, a hrek cu profet an si, a hrek cu Thuthang ṭha phuangtu an si, a hrek cu pastor an si ih a hrek cu zirhtu an si. ¹²Hi bangtuk in laksawng a peknak cu: Pathian minung pawl in Khristian hnaṭuan an ṭuan thei ih Khrih ih pum an ṭhansoternak dingah a si. ¹³Cuticun kan zumnak ah le Pathian Fapa kan theihnak pakhat sungah kan finkhawm aw ṭheh ding; patling kan si ding ih Khrih ih patling a sinak a saannak bik hmun khal kan thleng ve ding.

Saam Hla Bu (Saam 19: 2 – 5)

²Sun in sun hnenah thu a sim ih, Zan in zan hnenah theihnak a thlenter.

³Ṭong an hmang lo, aw khal an suah lo; Thawmvang zianghman theih a si lo.

⁴Asinain an aw cu leilung khua zakip ah a thang; An thuthanmi cu vanhram deng a thleng. Van ah khin Pathian in ni hrangah puanthlam a zar sak;

⁵Ni cu a inn ihsin mo neitu tlangval pa bangin a rung suak, Tlan zuamnak ih a teltu tlangval ṭha bangin.

Gospel Cathianghlim Siarnak

Jesuh In Matthai A Ko (Mt. 9: 9 – 13)

(Mar 2.13-17; Luk 5.27-32)

⁹Cuih hmun ihsin Jesuh cu a suak ih a feh rero laiah siahkhongtu pakhat Matthai an timi pa a zung sungih a to kha a hmu ih, “I thlun aw,” tiah a ti. Matthai cu a tho ih Jesuh a thlun.

¹⁰Jesuh cu Matthai inn ih zanriah a ei laiah siahkhongtu dang tampi le misual an si ti ih hnonmi pawl in Jesuh le a dungthluntu pawl cu rawl an eipi.

¹¹Farasi ṭhenkhat pawl in cumi cu an hmuh tikah a dungthluntu pawl kha, “Nan sayapa hi ziangah so hibangtuk minung pawl thawn rawl an ei tlang?” tiah an sut.

¹²Cumi cu Jesuh in a theih tikah an hnenah, “A harhdammi in sibawi an hai lo, mina lawngin an ṭul a si.

¹³Va feh uhla, ‘ṭilva in thawinak pek ka ṭul lo, mi zaangfahnak thinlung a si ka duh,’ tiah Ca Thianghlim ih a timi hi a tican va ruathnik uh. Miding pawl ko dingah ka ra lo, misual pawl ko dingah ka ra a si,” tiah a ti.