Nitin thuthangtha (Rev. Fr. Dominic Thawm Hlei Hnin)

Nitin thuthangtha

September 3, 2019 (Tuesday - of XXII Ordinary week of the Year)

Siarding: 1 Thess. 5:1-6, 9-11; Ps. 27; Lk. 4:31-37

Thuthangtha ngantu Luke cun Jesu cu Prophet (Lk. 4:16-30) ti in siseh, Zirhtu (Lk. 4:31-32) ti in siseh, khuavang dawitu (Lk. 4:32-37) ti in siseh, Harhdamtertu Siibawi (Lk. 4:38-40) ti in siseh, Vancung uknak phuangtu (Lk. 4:43) ti in siseh a tar lang. Tui kan siarmi Thuthangtha ahcun Bawipa Jesuh in Thuthangtha khal a zirh ih Khuavang khal a dawisuak ruangah Zirhtu dinhmun le Khuavang dawitu dinhmun in kan hmu. Himi thil thleng cu Galilee ram Capharnaum khua ah a si.

Capharnaum khua ih umzia zoh uh si. Galilee tili nitlaknak saklam ah a um ih khuapi pakhat a si. Khuapi pakhat a si ruangah Nunphung, Pursumleilawnnak, Ramthu khelnak le mi phunkim tonawknak hmunpi a si. Hitivek dinhmun ruangah Jesuh in Galilee ramih hna a tuan ah a thumawknak hmun - a headquarter - a si. Hitawk hmun ih Bawipa Jesu a ratnaksan Thuthangtha phuang dingah a si ih cuti-ih thuthangtha a phuannak thawngin Khuavang le khuavang ih hnatuannak pawl siatbal dingah a si. Khuasia timi hminih funkhawm thluhmi thatlonak hmuahhmuah pawl cu Jesu in a neh ih cui nehnak cu Bawipa ih Thinglamtah parih a thihnak le thihnak ihsin a thosalnak ah a rung famkim vivo a si.

Kan Bawipa cu Sabbath ni ah Synagogue ah a feh ti a si. Curuangah Synagogue timi hi kan ruat ta hnik pei. Jesu ih san laiah Temple hi Jerusalem Khuapi lawngah a um ih cucu Biakinnpi - Jerusalem Biakinnpi - ti in kawh a si theu. Hmundang le khua dang ah Synagogue pawl an um celcel. Cui hmun cu Thla camnak, Pathian thu zirhawknak le pumkhawm awknak ah an hmang. Temple le Synagogue cu ziangtin an dangaw ti a si le Jerusalem Biakinnpi lawngah raithawi biakpeknak an rak tuah ih cucu Pathian Biaknak ih a sangbik a si. Curuangah Jerusalem Temple cu Biakinnpi a si. Synagogue ahcun raithawi biakpeknak an rak tuah dah lo nan an rak tong aw khawm theu. Curuangah Synagogue cu Biakinn si lo in Khawminn men a si. Tu ih kan tlanlennak kiang le kap kan zoh a sile Biakinn a tamlo ih khawminn lawng deuh thaw an si sawn.

Sabbath ni cu ni menmen siloin ni thianghlim a si ih Pathian le minung komawtertu ni a si vekin thenthektertu ni khal a si ve. Himi Sabbath ni thianghlim ah Pathian ih mi thianghlim a si mi Jesu in Khuavang ih polh ruangih a thianghlim nawnlo mi ih sung ihsin Khuavang kha a dawisuak ih thianhlimnak a peksal. Kan Bawipa cun Khuavang kha hnaihnoknak a va pe lo, amah te thudik phuangin Thuthangtha a phuang men a si. Sualnak cu thudik thawn a kalhaw.

Curuangah sualnak ih pa bik a si mi Khuavang cun Thuthangtha simmi a theih tikah um men thei nawn lo in aw ringzet in a au ih, Kanmahte in umter men aw, Nazareth khuami Jesu. Nang thawn ziang thuhla, ziang hnaihnoknak le ziang tuahding saw kan neih? Kanmah siatsuah dingin maw na rat? tiah a rak ti. Sualnak le thatlonak cu a hranpa ih va soisel le va do rero a tul lo. Thudik, thuhmaan, thuthangtha sim le rel a sicun thatlonak cu amahte a phuhrung aw mai. Ziangruangah tile sualnak le thatlonak cun a mai sinak diktak hrimhrim in thudik le thuhmaan cu a rem thei lo, a eng tai. Cuticun thuthangtha cu a hua a si ko. Khuavang cun duhtawk loin Jesu cu, Zo na siti khal kan lo thei, Pathian ih mi thianghlim na si, a ti. Tlun deuh ah khan Nazareth khuami Jesu tiah ko in Jesu ih leimi sinak le leimi asinak ah Nazareth khuami asinak thu fiang tein a thei ih a rel suak zo. Tu ah Pathian ih mi thianghlim na si a ti lala. Jesu ih Pathian sinak le Pathian hnen ihsin a ratnak a langter. Khuavang in Jesu cu Zo a si ti a thei fiang nasa.

Jesu cun, “dai tein um awla, a sung ihsin suakaw!” ti-ah thu a pek. Cui thupek cu ngai in Khuavanng cu cumipa ih sung ihsin a ra suak. Jesu cu zo a si ti hi mipi ih an theih ding cu a tul in a thupi tuk lo maw? Himi silomaw Thuthangtha kan sim ding bik cu a si? Ziangah Daiten um men aw tiah a ti tin thu suh ding a um. A si. Jesu cu minung le Pathian a si thu le rundamnak in pek thu cu Thuthangtha ih muril bik a si ko. Cuti asile ziangruangah daiten a umter. A san cu Jesu ih caan a kim hrih lo ruangah a si sawn. Jesu in Khuavang a dawi saknak thawngin Khuavang ih polhmi pa cu mi damlo din hmun ihsin mi dam din hmun, mi zaaran din hmun ah a thlenter sal. Khuasia, Khuavang kan timi hi hnaihnoktu, mi siatsuahtu an si. Sikhalsehla mipa sung ihsin a ra suaktu Khuavang cun a rak polh mipa cu siatsuah lo ten a um. Ziangruangah tile Jesu ih aw kamkhat ruangah mi siatsuah theinak thazang le huham a nei nawn lo.

Jesu ih thu simmi a rak ngai ngah tu mipi pawl cun Jesu ih awkam le a tuah a tuan mi pawl an theih an hmuh tikah mak an ti zet. Ziangruangah tile a tongkam ah huham a nei ih hmual a um ruangah a si. Awkam kamkhat te lawng hman in Khuavang a dawi suak ti an hmuh tikah Jesu ih hnenah Pathian ih kutcak a um ti an thei. Curuangah Jesu in Khuavang a nehnak le a dawisuaknak thuthangtha le a zirhmi thuthangtha pawl cu mipi lakah a karhzai vivo a si.

Jesu cun mipi hmaiah Khuavang kha mi pa pakhat sung ihsin a dawisuak ih Peter ih pi nu a damternak thu ah bulpak inn ah natnak a damter ti kan hmu. Jesuh ih pekmi rundamnak - thatlonak ihsin luatternak - cu nunau mipa ti um lo, hmun le ram thleidan le thliar awk ti um loin mi zapi hrangah a si ti a lang fiang. Kannih cu Baptism kan ngahnak thawng in Bawipa ih ralnehnak a hlawm vetu kan si ih nehtu, nehnak co tu ka si ve. Kan ralrin ding pakhat cu sualnak kan tuah tinten Khuavang kha kan nun ah kan la lut vivo ih kanmai nun ah Khuavang le a hnatuannak kha sangka kan onh ih hmunhma kan pek tinten Jesu ih ralnehnak ihsin dungah kan siip vivo ti kha thei aw ding kan si.

Bawipa in kan hrangah nehnak in ngah sak zo ih nehnak co tu kan si. Cui nehnak co tu sinak cu hmun ringring dingah Bawipa ih in zirhmi thu pawl thlun in le baptism thutiam pawl kha kan nunah nei ringring ding in zuam uh si.

By Rev. Fr. Dominic Thawm Hlei Hnin