Nitin thuthangtha (Rev. Fr. Dominic Thawm Hlei Hnin ih sim mi)

Sermon for September 24, 2019; Tuesday of XXV week of Ordinary Time, Year I

Siarding: Ezra 6:7-8,12,14-20; Ps. 122:1-5; Lk. 8:19-21

Kan Bawipa Jesu, hi leilung ih a ratnaksan cu, kannih minung pawl rundamnak pe dingah a si. Asinan cui rundamnak cu qongfang kamkhat lawng khalin, in pe thei ko nan cuti zawng si loin, mi zapi hnenah Vancung ram thuthangtha sim in le phuang in, cui thuthangtha an zum, an pom le an thlun nak thawng in, rundam kan si ding kha a duh. Curuangah amah rori Thuthangtha sim in khaw tin a rak tlawng. Cuti ih Thuthangtha a sim lai ah a nu le unau sungkhat pawl an ra. Minung kan sinak ah kan innsang, unau sungkhat hnak ih thupi an um lo ti theih a si. Amah lawngte hna dang tuan thiam lo khop ih mai sungkhua ih pumpektuk khal sullam a nei ve cuang lo. Kan Bawipa Jesu cu a nu le a unau pawl an rat i thu an sim tik ah a hnatuan a pelh ter lo.

Himi caan te ah ka hrangah ziang a thupibik? Ka innsang maw ka hnatuan ti, rual le pi maw Pathian thu? Felfai te ih hril thiam zuam uh si. Kan hnatuan ah minung mithmai zoh loin kan tuah kan tuan dingmi kha dik le fel ih tuan thei kan zuam ding.

Thuthangtha kan siarmi thu cu Bible sung hmun dang Mt. 12:47-50; Mk. 3:31-35 khal ah kan hmu thei. Kan siarmi Bible in pehtlaih awknak hri, a hleice in Pathian thawi kan pehtlaih awknak a langter. Himi sungah Jesu ih nu cu zo a si ti fel tein kan hmu thei.

Himi Thuthangtha kan siar tikah mi hrek khat cun "Jesu hmanin a mai suahnak nu rori, ka nu a ti lo" ti ih a sullam la tu an um. A hleice in kan Christian nun le zumnak ah Mary hi a thupi lo titu pawl in cutizawng in an pom duh deuh. Zoh hnik uh si.

Kan Bawipa Jesu cu hi leilung ih a rat zik tik ah Nazareth khuami falahim, tleirawl Maria ih hnen ah Vancung mi in langnak nei in cuticun nau a sem Lk. 1:26-38). Joseph thawn insang din in mi pum cazin pe ding ih an feh caan Bethlehem khua ih an um laiah Jesu cu a suak ti ah kan Bible cun in sim (Lk. 2:1-7). Himi tiangah Maria le Jesu ih pehtlaih awknak cu buai ding a um lo, a fiang. Jesu cu Maria ih hrinmi fa a si ruangah Maria cu Jesu ih nu a si.

Maria cu Jesu ih nu a si timi ahhin pom dan a bang aw lo theu. Mihrek cun Jesu cu Maria ih pum sung ihsin a rawng suak ko nan a nu ngaingai a si lo titu an um. Hiti ih pomtu pawl hrang ahcun Jesu cu Pathian a si ko nan minung a si lo ding. Ziangah ti le Jesu ih minung sinak cu Maria hnen ihsin a lak mi a si ih tu ahcun Maria cu Jesu ih nu ti ih an pom duhlo ruangah a si. Mihrek khat leh lala cu Jesu cu Pathian sinak ngaingai neilo in minung liolio a si ti tu khal an rak um. Hitivek ih thupom cu Christian kohhran pumkhat an rak si lai AD 300 sehvel ah a rak leng zo mi pomdan an si ih cumicu Jesu cu Pathian ngaingai le minung ngaingai a si ti ih an zumnak an rak phuannak in an rak pahtlang thei zo a si. Jesu cu Pathian ngaingai le minung ngaingai a si ti hi kan minung sinak ih theih banlo mi, Christian zumnak hrampi thuthuk pakhat a si. A tlun ih kan rel zo vek in Maria cu Jesu hringtu a nu a si.

Cuti asile Jesu cun amah hringtu a nu rori theilo vek ih a rak um san men cu a zia a va tha lo ve tiah soisel ding a um thei. Jesu cu Pathian asinak ah amah le amah a kalh aw thei lo. Curuangah mi famkim a si ih a nuncan ziaza khalah baaksamnak a nei lo. Tlaksamnak a nei pang a si ahcun mi famkim a si thei lo. Cuticun Jesu in a suahnak a nui' parah "nautatnak, ziang ih rel lonak" tivek a nei thei lo.

Jesu ih relmi a nu, a unau le a sungkhat pawl cu Pathian thu a ngai ih a thluntu pawl an si a ti. Kan Bible sungah Sarah, Rachel, Hannah, Susana, Esther, Rebecca, Pricilla, Ruth, Elizabeth tivek pawl zohthimtlak nutling thatha hmuh ding an tampi. Asinan Maria vek ih "Na duhnak vek in ka parah thleng ko seh" ti theitu an um lo.

Kan Christian san thuanthu khalah Martha, Monica, Catherine, Edith Stein, Theresa, Clare ti vek mi ropi leh zohthimtlak nutling kan hmu thei. Sikhal sehla Maria hnak ih cungcuang deuh nutling theih ding a um lo. Bible sung siseh, Bible leng ih santhuanthu ihsin siseh Maria hnakih Pathian tihzahtu simding le rel ding kan thei lo, kan nei lo. Jesu in "Pathian thu a ngai ih a thluntu" a ti mi ah Maria cu hmaisabik a si sawn. Jesu ih hrang ahcun Maria cu a khuah rori in a nu a si ti a lang fiang.

A si le, ziang ruangah Jesu in hivek tong a hmang? Jesu cu a ratnak thu, a tumtah le a zawh ding lam zin fiang te in a thei aw aw. Jesu ih hrangah hi lei tisa sinak ih pehtlaihawk hnak in Pathian thu ih pehtlaihawk hi a thupi deuh. Mi tampi cun Pathian ka zum, Christian ka si kan ti aw nan kan nun ah hmuh ding ziang hman a um lo. Jesu in "Pathian thu a thei ih a tuahtu pawl" a ti. A theih le a zum lawng tawk lo in "tuah" a tul, kan nun ih a lang a tul.

Jesu ih Lal nak a innsang a si mi Vancung ram ah Jesu ih unau ti ih kan tel ve theinak dingah Pathian thu kha kan nunah thlun uh si.