Nitin thuthangtha (Rev. Fr. Dominic Thawm Hlei Hnin ih sim mi)

Sermon for Oct. 1, 2019; Tuesday of XXVI week of Ordinary Time, Year I (Oct. 1, 2019)

Siarding: Zech 8:20-23; Ps. 87:1-7; Lk. 9:51-56.

Jew pawlih an rak hman mi Bible, tu ih kan Bible hlun sung kan zoh a si le Jerusalem cu Pathian ih umnak khualipi ti-in kan hmu thei. Culawng silo, Prophet pawl khal Jerusalem khua leng ih thih a daan lo ti khop rori in Jerusalem khua sung lawng lawng ah an rak thi ih, cucu Pathian ih umnak khualipi a si ti kha nem hngetnak phunkhat a rak si.

Tuisun ih kan siarmi Bible ahcun Jerusalem cu Judah miphun hrang lawng siloin miphun hmuahhmuah hrangah an panmi khualipi, an tonkhawmawknak khualipi a si. Ziangah ti le Pathian a um ti an theih ruangah a si. Himi Jerusalem khualipi cu Pathian ih khuakhannak hlun le thar, Bible hlun le Bible thar, ih tonawknak a si ih, an pehtlaih awknak khal a si. Mit ih hmuh thei Jerusalem khuapi ih phen ah kan hmuh thei hrih lomi Vancungram ih Jerusalem khualipi timi a um. Cumicu Pathian ih umnak ngaingai a si ih zo cio ih kan thlen duhnak dinhmun a si. Cui Jerusalem khualipi lam pan in ke kar cio uhsi.

Kan Bawipa Jesu, hi leilung tlunih a rak tlanlen lai san ih mipi pawlih thinlung le ruahdaan ah, Jerusalem le Pathian cu a pehtlaih awk ringring ruangah Jerusalem tello ih Pathian uknak thu le hla rel ding cu a rak cang theilo. Jerusalem khualipi tello mi Pathian thu cu mipi in an thei thiam lo. Jesu ih ratnaksan cu minung pawl rundamnak pek ding ti a si vekin, cui rundamnak cu minung ih an theih thiam thluhlo hmanah theilo thla bembem cu thil cang thei lo a si fawn. Curuangah Jesu cu Pathian ih thlahmi rundamtu a sinak langter dingin Jerusalem lam a pan thlang a si.

Tuisun kan siarmi Thuthangtha khalah Jesu cu a caan a kim thlang ruangah Jerusalem lam a pan ti in kan hmu. Caan siartu hi amah Jesu siloin roreltu Pathian ih caan siar a si sawn. Cui caan siarmi ah Jesu cun a Pa'i thu ngai in Pathian in a hrang ih khua a khannak famkim ter ding ih Jerusalem lam a pannaksan a si. Jerusalem khua an thlen a si len a parah ziang tivek thil a thleng ding - Harsatnak le thihnak a tuar ding thu (Lk. 9:31) - ti khal cu Jesu in fiangzet in a thei (Mt. 20:18; Mk. 10:33; LK. 18:31-33). A minung sinak ah a tih ve ko, curuangah "Ka pa hi khuat hai hi ii luatter aw" ti in thla a cam. Asinan, "Nan thu siseh" a ti (Mt. 26:42).

Jesu in Jerusalem lam panih a fehnak lamtluan cu zirhawknak lamtluan ti in kan hmu thei. Mit ih hmuh theihmi Jerusalem pan in an rak fehnak ah mit ih hmuh hrih lo mi Vancung Jerusalem lamzin thu a zirh phah vivo a si.

Jesu cun minung a thlah hmaisa ih a thlennak ding hrangah tim a rak tuahter. Samaritan khua, Pathian theilo khua an va thlen tikah tluninn an rak on lo, ziangah ti le an hnen ih ra siloin hmundang pan ih a feh ruangah a si. John 4: 9 ah Jesu in Samaria nu hnen ih in-ding tidai a dilnak thu ah Judah pawl le Samaria pawl pehtlaih awknak an neih dah lo thu kan hmu thei. Himi thu le tui kan siarmi sungih Jesu tluninn an on lonak thu kan ruat tlang a si le Samaria pawlin Jesu an huat ruangah si cuang loin, anmah Samaria miphun le Jew miphun lakih a tluang lomi pehtlaih awknak ruangah, tluninn an rak on lo a si sawn ti kan hmu thei. Netalam tla ahcun hi Samaritan pawl hi Jesu thluntu an rawng si vivo ti khal (Tirthlah 8:4-25) ah kan thei.

Vei tampi cu kan nih khal, mi dang ih an tulsamnak le thiltha tuah ding ruat thiam lo le ruat thei loin, kan mai mi an si maw silo, kan theihmi an si maw silo ti kan zoh sawn pang theu. Kan theihmi an si lo ti in tluninn on lo in kan um pang maw? Kan ruah banlo caan ah rukru bangih a ra tu ding kan Bawipa cu (Mt. 24:44) kan thinlung sangka kan khar lai fang ih a rat a si pang ahcun hmundang ah in lan san ding. Ral ring uhsi.

Tluninn an on lo ruangah Jesu le a rualpi pawl cu khuadang ah an feh lan a si. Design lam hnatuantu pawl hrangah tuahsual ti a um lo, an tumtahvek ih thil a canglo a sile thil thar le design thar a cang suak sawn. Cuvek in kan lamzin a pit hmang kan ti laiah hmailam fehnak zin ong cu a um ringring thotho. Hi tawk hmun ih an co hlan duhlo a si le hmun dang hawl thiam kan tum sawn ding, zin dang a ong a um ve ding.

Tluninn an rak on lo ruangah, James le John tei' unau cu an thin a heng tuk ih cui khua cu camsia tahrat in, meisa ih ur kang thluh an tum men. Khawri ih fapa pawl ti ih hmin pekmi (Mk. 3:17) an si vekiin an thin a rak sau ve lo. Bible hlun sungah Prophet Elijah cun veihnih rori van in meisa a tlater ih a ral pawl a urkang thluh (2-Siangpahrang 1:10, 12) ti kan hmu. Prophet pawl ih famkimnak asimi Jesuh cun mah dodaltu hman thincinnak thawn thungrul loin, duhdawtnak thawn thungrul ding in (Lk. 6:27-29, 35) ah a zirh. Cuvekin James le John khal, an thintawinak cu a suupter ih thinsau ding in a zirh sawn. Culawng silo, Jesu ih ratnak sullam - mi run dingah - kha theih hngilh lo ding in ralrinnak a pe bet.

Amah kan Bawipa rori hman hnon a tuar, thleidan a tuar. Kannih a dungthlun pawl khal cuhnak ih tha in in rak cohlang ding ti vek ruahsannak nei ngam ding kan si lo. Hnon kan tuar le thleidan kan ton tikah camsiat le thincin hi a thungrulh dan lamzin - a phi (answer) - a si lo, ngaidamnak in a si sawn.

Vei tampi cu Pathian thu le hla kan ti nan kan mai thinlung le ruahdaan vek ih thil a thlen lo tikah kan thinsaunak in a daih nawn lo ih camsiat kan tum theu. Kan aupimi Pathian thu siseh, Pathian zumtu Christian kan sinak siseh theih hngilh in kan mai thinlung duhnak kha hmai ah kan ret pang theu.

Jesu in James le John tei' unau ih famkimlonak - thintawinak le thinhengnak - cu a remsak vek in kan nun ah kan tlaksamnak le famkimlonak pawl Bawipa' kut cak in, in remsak, in silh khahsak hram seh.