Nitin Thuthangtha (Rev. Fr. Joseph Ro Nei Thang ih sim mi)

“Sual Ngaidamnak Thuhla” Homily for Thursday (September 19, 2019)

Bawi Khrih ah duhdawt zetmi nu le pa, u le nau pawl, tuihni cu tlawngkai nilini, 2019 September thla ni 19 asi. Calendar sung ihsin in siar termi pawl cu 1Timothy 4:12-16; Ps 111:7-10; Gospel ahcun Luka 7:36-50 asi pei.

Tuihni ka lo hlawm duhmi cu Luka ih nganmi Gospel sung ihsin a si ih “Sual Ngaidamnak Thuhla” asi tiah gaungsin ttat ningla ka duh asi.

Bawipa Jesuh in sual ngai dingah in zirh. Bawipa ih thlacamnak sungah “kan parah sualnak a tuahtu pawl kan ngaidam vekin kanmaih sualnak pawl tla in ngaidam ve hram aw” tiah Mt 6:12 ah Bawipa nih in zirh asi. Cuih hlei ah Mt 6:14-16 ah “Nan parah sualnak a tuahtu pawl nan ngaidam asi ahcun vancung ih a ummi nan pa in a lo ngaidam ve ding. Sikhalsehla midang ih sualnak pawl nan ngaidam lo a si ahcun nan Pa in a lo ngaidam ve lo ding asi” tiah in zirh bet lai asi.

Bawipa in kan sualnak in ngaidam lo ahcun vancung ram ngahnak ding a lamzin a um theilo lawlaw. Ziangahtile vancung ramah sual fate, sual terek pawl hmanah a um theilo dinhmun asi. Sualnak thawn kan fai verver attul. Ps 130:3 “Maw Bawipa, kan sualnak pawl na cing ringring ahcun zo in so a tuar thei ding?” tiah kan hmu thei. Curuangah kanmah le kanmah kan ngaidam aw lawngah Pathian nih tla in ngaidam ve ding asi.

Mirang ttong in forgiveness timi le absolution timi hi an bawng awlo. Forgiveness cu sual ngaidamnak asi. Absolution timi cu sual thlahnak asi. Thu umdan cu sual ngaidamnak umlo in Pathian hnen ihsin sual thlahnak kan ngah thei lo tinak asi. Pathian nih kan sualnak in thlahsak lawng ah sual cazin fai mi kan si ding asi. Curuangah sual ngaidamnak cu vancungram kan co theinak dingah a thupi zetmi asi.

Ngaidam ko aw maw…. ticu a ol zet ko ding, asinain nitin kan nunnak ah kan ral pawl siseh, kanmah in siatsiahtu pawl le huattu pawl, in hremtu pawl ngaidam dingah hin thil ol mi asilo… Mi hmel mawi pawlin kan parah in thil ti sualnak an nei tikah “ka lo ngaidam cia” kan ti ko ding nain, hmelsia deuhmi pawlin kan parah thil tthalo an tuah tikah cu “ka lo ngaidam cia ka rak ti thei pei maw?

Bawipa Jesuh in pakhat le pakhat sualngaidamnak in zirh vekin amah Bawipa rori in tla amah a thattu a ral pawl hangah ngaidamnak a pek ve asi. Luka 23:34 “Maw ka Pa, an sualnak pawl cu ngaidam ko aw, ziangahtile annih in ziangmi sualnak an tuah ti hi an theilo asi” tiah kan Bawipa nih in sim.

Stephen nih amah a lungto thawn a den thahtu pawlih sualnak pawl ngaidamnak Pathian hnenah a dil sak asi… Tirhthlah 7:60 “Bawipa, an sualnak pawl hi ciing ringring hram hlah aw tiah napi in a au ih a thaw a cat” tiah kan hmu thei.

Paul in 1Korin 4:12 “Kannih cu siatcamnak kan ton tikah thluasuah peknak thawn kan lehrul kir sal” tiah ati. Ngaidamnak thawn an lehrul kir lawng silo in thluasuah hman ah an pek bet lai. Van thluasuah an ruahsan ruangah asi. 

Peter in tla a cakuatnak sungah Khristian pawlih nuncan cu hitin ca in kuat dah 1Peter 3:9 ah “tthatlo nak cu tthatlo nak in lehrul hlah uh, siatcamnak khal siatcamnak in lehrul hlah uh; thluasuahnak thawn lehrul sawn uh. Ziangahtile Pathian nih a lo kawh tikah thluasuah petu si dingin a lo ko asi” tiah Pathian nih in kawhnak rengreng thu in sim asi.

India ram Calcutta khua ih St Theresa cu a cawmmi ngakttah pawl hrangah kut dawh in rawl a dil rero ttheu. Nikhat ni ahcun Mother cu Calcutta khawpi uktu hnenah a cawmmi ngakttah pawl hrangah kut dawh in rawl a dilih a cuih mi-uk in Mother kut ah a cil a phui asi. Mother in thinniam ten “Sir, ka lungawi asi himi cil in pe ruangah; asinain ka ngakttah pawl hrangah sangreu teh khuai ah so” tiah a sualnak ngaidam in a ron ti tikah a cuih khawpi uktu pa tla a riah asia ngaingai ih zarh tinten sangvut dipkhat a hlu ringring asi tiah kan hmu thei.

1981 kum May ni 13 ni ah Pope John Paul II in mipi kha thusim lai ah Ali Agca timi pa nih meithal thawn a kap asi. Pope John Paul II in amah a kapthattu Ali Agca kha a sualnak a ngaidam ih thawng inn sung ah a va veh asi.

1902 kum July thla ni 6 ni ah Alexandro in Maria Goretti cu nam thawn a hei dawt ciamco ih a that dah asi. Cutin sual neilotu kha a that ruangah thawng a tla ih kum 27 thawng a to hnu ah amang ah Maria Goretti in lungawi zetin “Alexandro na sualnak ka lo ngaidam asi” tiah a sim kha aman. Amah tla a sualnak a sir aw tuk ih zumtu pakhat ah a cang sal asi.

Ps 32:1 “Bawipa in a sualnak a thlah sakmi pawl cu mi thluasuah an si” tiah in zirh vekin Bawipa ih sual thlah sakmi kan si ringring theinak dingah midang ih sualnak pawl cu catlo in ngaidam ttheu uhsi. Midang ih sualnak pawl in ngaidam theinak ding ah Bawipa in thazaang thar in run pe ringring hram seh.