Nitin Thuthangtha (Rev. Fr. Joseph Ro Nei Thang ih sim mi)

Bawi Khrih ah duhdawt zetmi nu le pa, u le nau pawl, kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pawlkomnak cu nan zate hnenah um sehlaw. Tuihni cu 2019, September thla ni 26 Tlawngkai ni 4 ni asi. Tuihni ih kan ruah khawm dingmi cu Luka 9: 7-9 asiih Herod in Bawi Jesuh a ton duhnak thu-hla asi. Luka 9: 9 ah “Herod in Bawi Jesuh cu ton a duh ngaingai asi” tiah kan hmu.

Bible sungah Bawi Jesuh ton duh zettu pawl an um ih cumi pawl cu:- 

1/ Tukhal pawl ansi.

Naute Jesuh cu Bethlehem khua kiang caw inn ah a nu Mary nih a hring ih puan nem te thawn an tuamih cawrawl einak kuang sungah an hlum asi tiah Luka 2: 16 ah kan hmu thei. Luka 2: 20 ahcun “cule tukhal pawl cu an kirih an hmu mi le an theimi pawl ruangah Pathian thangtthatnak hla sak phah in an tlung.” “Tukhal pawlin naute Jesuh an hmu ngah ih Pathian an sunloih in le Pathian thangtthat phah in an kir sal” tin let sehla duh a nung deuh. Mirang Bible ahcun “the shepherds returned, glorifying and praising God for all the things what they had heard and seen” tiah kan hmu thei. Tukhal pawlin Naute Jesuh an hmu ih lungawi ten an kir.

2/Mifim pathum pawl ansi.

Naute Jesuh ton duh ah nisuahnak ram, lam hla pi in an ra asi. Fing le tlang kaan in siseh, tiva le horkuam kaan in siseh, nelrawl le tupi kaan in siseh, lo le hramlak kaan in siseh arsi thianghlim hruainak vekin naute Jesuh ton duh tukah an ra asi. Naute Jesuh an ton hnu ah an kenmi sui, zihmui le lawban rimhmui laksawng pawl an pek asi. Lungawi zetin anmah ram ah an kir sal asi. 

3/ Rampi uktu Herod siangpahrang bawipa asi.

Nisuahnak ram ihsin naute Jesuh ton duhah an rak thlengmi mifim pathum pawlih ttongkam ruangah Herod siangpahrang bawipa cu ziang a cang? Mt 2: 3 ah “cuih thu cu siangpahrang Herod in a thei tikah a thin a har ngaingai” tiah kan hmu thei. Asinan naute Jesuh cu ton a duh ve. Thuphan perin ton a caak ve. Mt 2: 8 ah “va feh uhla naute cu ttha tein va hawl uh: nan hmu asile kei khal i sim uhla amah biak dingah ka feh ve ding” tiah ati asi. Herod in naute cu that a duh ruangah a tong duhmi asi.

4/ Ram-tthen uktu Herod Antipas asi.

Amah cu Herod siangpahrang ih fapa asi. Herod Antipas in naupa Philip a nei. Philip ih nupi cu Herodias asi. Philip cu mibang lo te asinain apa Herod in Idumea le Traconitis ram uktu ah a tuah ve hai. A nupi in a iei ih Herod Antipas kha a uar. Cule an phohpyan ttheu. Cutin an uire ttheu ruangah tipilnak petu Johan in nun a va sim tikah John kha an va kai terih thlawng an thlak. Herod Antipas suahni ah a nupi in laksawng dilih Johan ih lu a dil asi. Bawi Jesuh in mangbangza thil a tuah ruangah Herod Antipas in Bawipa cu hmu a caak ngaingai asi tiah tuihni kan siarmi Luka 9: 9 ah kan hmu thei asi.

5/ Zaccheus asi.

Amah cu siah-khawngtu asiih miniamte asi. Bawi Jesuh kha hmu a duh tuk ruangah theipi kung parah a kai. Luka 19: 5 ah Bawi Jesuh in “Zaccheus zamrang zetin rung ttum aw; tuih zan ah na hnenah kan riak ding” a ti tikah lungawi aipuang zetin a ttum ih Bawi Jesuh le a Tirhthlah pawl kha a hmuak hai. Hi hmun ah Zacheus ih lung thlengnak ah a cangih rundamnak a ngahni asi.

6/ Greek miphun pawl ansi.

John 12: 21-22 ah Greek mi pawl cu Philip hnenah an fehih “sayapa, Jesuh hmu kan duh” tiah an va ti. Philip cu Galilee peng Bethsaida khuami asi. Cun Andrew a va ko ih an pahnih in Greek mi pawl cu Jesuh hnenah an va feh pi” tiah kan hmu thei.

7/ Maria Magdalena asi.

Bawi Jesuh a thi hnu ah ton a duh tuk, a ngai tukih thlan ah zingpit ten a va feh asi. Bawi Jesuh cu a nung in a tong asi.

• Bawi Jesuh ton duhtu minung dang tla tampi an um lai ding nain hi hmuah lawng ka lo sim duh.
• Kannih teh Bawi Jesuh kha ziangtinso kan ton thei ding?

A Kohhranpi sungah siseh, a thi le a sa sung ah siseh, mifarah le miharsa, mibanglo pawl hnenah siseh, hngakttah pawl hnenah siseh, mikhual pawl tla hnenah siseh, mina pawl hnenah siseh, mi ih hnonmi pawl hnenah siseh, amah hmin thawn thla kan cak tikah siseh, puithiam pawlin sacrament an tuah tikah siseh, Bible services kan tuah tikah siseh Bawi Jesuh kha kan tong thei asi.

• Mithianghlim Padre Pio in “Bawi Jesuh Khrih cu Cathianghlim sungah kan hawl ttheu nain thlacamnak sungah kan tong thei asi” tiah in sim dah asi.
• Bawipa Jesuh ton kan tum asi ahcun Maria Magdelena vekin siseh, Zaccheus vekin siseh, Mifim pathum vekin siseh, Greek miphun pawl vekin siseh, Herod Antipas vekin siseh tha tho zetin Jesuh hnenah va pan uhsi. Isaiah 55:6 sungih a ummi vekin “Bawipa cu ton thei asi lai caan ah hawl uhsi.”
• Zokhal bawipa Jesuh thawn an ton awk tikah siamthar ah an cang asi. 2 Korin 5:17 ah kan hmu thei.
• Bawipa a hawltu hmuahhmuah cu Bawipa in thluasuahnak tampi toih hram seh.