Nitin Thuthangtha (Rev. Fr. Joseph Ro Nei Thang ih sim mi)

Homily for Thursday (3/10/2019)

Bawi Khrih ah duhdawt zetmi RVA a ngaitu nu le pa, u le nau pawl, “kan Bawipa Jesuh Khrih ih zaangfah lainatnak, Pa Pathian ih dudawtnak le Thlarau Thianghlim ih pawlkomnak cu nan zate thawn um hram seh”tiah cibai ka run lo buk hai. Tuihni cu Tlawngkai nilini, October ni 3, 2019 asi. Tuihni ih kan ruah khawm dingmi cu Luka 10:1-12 tiang asi. 

Luka 9:1-9 ah Bawipa Jesuh in Tirhthlah 12 a thlahnak khi an hmu. Annih pawl cu Bishop pawl ansi. Luka10:1-12 ahcun a dang 72 a run thlah bet tiah kan hmu. Annih pawl cu Puithiam pawl ansi. Cun pahnih pahnih in a thlah timi cu Pathian duhdawt le milai duhdawt dingah tinak asi. Bawipa amah rori feh a tumnak hmun ah a thlah asi a ti ruangah Bawipa cu duhdawtnak asiih a feh tumnak hmunah tla duhdawtnak a um ttul asi. Cumi cu dungthluntu pawlih timtuahnak hnattuan asi.

Tuihni kan siarmi Gospel ihsin ttuanvo le covo tiah gaungsin ttat ning la ka duh asi. Mirang ttong in “right and Responsibility” tiah kawh asi. Covo le ttuanvo tinak asi. Tui lai sanih kan thei ringring ttheumi asi. Tlawngta nauhak pawlin ca thiam dingah covo an ngah nain tlawng kai in cazir dingah ttuanvo an nei asi. Covo le ttuanvo cu bangrep ten feh tlang ding ansi. Cuvo lawng kan duh ih ttuanvo kan duhlo ahcun thil diklo asi. Thil diklo nak hmun ah Pathian tla a um thei lo asi. Hnattuan lawng kan fialih a ttuantu hrangah covo tla pek dingah fialtu in ttuanvo a nei lai asi. 

Tuihni kan siarmi Gospel sungah a thlahmi pawlih ttuanvo pawl cu:- 

1. Thlacam ding asi. Luka 10:2 “Rawl khawmtu tam sinsin a thlah theinak dingah lo neitu hnenah thlacam uh” tiah asi.
2. Mission feh tikah bawm siseh, zaal siseh, dedan siseh ken lo ding asiih lamzin khalah tonmi pohpoh biakin a tikcu cemter lo ding asi.
3. Dainak phurtu si ding asi. Luka 10:5 “Inn pakhatkhat sungah nan lut tikah a hmaisabik ah “nan inn sungah daihnak um hram seh” tiah na va ti pei tiah asi.
4. Ral ttha zetin feh ding. Luka 10:3 “Va feh uh; cinghnia rual lakah tuu fate thlahmi bangin ka lo thlah hai” tiah kan hmu thei.
5. Pathian ih uknak thu sim ding. Luka 10:9 “Cuih khua sung uh mina pawl cu damter uhla ‘Pathian ih uknak a nai zo’ tiah va sim uh” tiah Bawipa in a fial. 

Himi pawl cu a thlahmi pawlih ttuanvo ansi. 

Ttuanvo a um ahcun covo tla um a ttul asi. An covo pawl cu:-

1).  Ti le rawl ansi.

Bawipa ih fialmi hnattuan kha felten ttuantu hrangah Bawipa in thlawhsuah a pek asi. Luka 10:7 “Cuih inn ah um uhla an lo pekmi poh kha ei uh; ziangahtile hnattuantu in a hlawhman cu a ngah ttul asi” tiah kan hmu. Bawipa cu a dikmi Pathian asi vekin amaih ta kan ttuanmi cu Bawipa in ttuan-man in pek asi.

2). Damnak huham an co ding.

Bawipa in mina pawl damter dingah thu a pek vekin mina pawl parah thla a cam tikah mina pawl an dam asi. Luka 9:6 “dungthluntu pawl cu an fehih khawlte lam an tlawng vivo. Thuthang ttha an sim ih mina pawl tla an damter vivo” tiah kan hmu thei.

3). Khawsia dawi theinak huham an co ding.

Luka 10:17+19 “Bawipa, na hmin in ramhuai pawl kan dawi tikah kan thu an ngai asi” an ti tikah Bawipa in “ngai uh! huham neinak ka lo pek hai: rul le varngen-meipir pawl parah nan feh thei ding; ral pawl neh theinak huham tla ka lo pek dingih zianghman in a lo tuahmawh thei lo ding” tiah asim. 

4).Vancung ah khummi hmin an co ding.

Luka 10:20 “sikhalsehla thlarau ttha lo in nan thu an ngai ruangah nan lungawi hlah uh; nan hmin vancung ah khum cia in a um ruangah nan lungawi sawn uh” tiah ati.

• Bawi Khrih ah duhdawtmi Paathian ih fa le pawl, amah Pathian ih tirhfialmi kha felten ttha ttha ten kan ttuan ahcun Pathian in bawmtu a run thlah ringring asi. Pathian lamin titsaa a nei asi. Kannih amah Pathian ih rongbawltu lamin titsa kan nei a ttul ringring ve asi. Pathian in a prophet Elijah kha a run thlah lai ah Pathian ih tirh-fialmi vekin a thu ngai in a hna a ttuan tikah amah cawmtu dingah Zerepah timi nuhmeinu kha Pathian nih a run thlah asi.
• Pathian ih hrang ttha le fel tak ten kan ttuan ahcun kan ttuanman cu Pathian in feltak ten in run thlasuah ve ding asi. Kan ttuannak le kan thil tinak hmuahhmuah ah thluasuah a um ding asi. Rom 10:15 “Thuthang ttha a phuangtu pawlih kee cu ziangtluk in so amawi” tiah kan hmu thei. An kee tianghman ah Pathian ih thluasuah thawn a khat lai asi.
• RVA a ngaitu nan zaten Bawipa nih a thar in lo thluasuah sehla ttuanvo le covo lei ah titsa nei cio hai uhsi.