Nitin Thuthangtha (Rev. Fr. Lucas Tha Ling Sum ih sim mi)

Sermon for Saturday of XXVI week of Ordinary Time, Year I (October 5, 2019)

Thuthangtha ngai tu u le nau, nan hnenah Pathian ih remnak le daihnak um hram seh!

    Jesuh ih a dungthlun tu sawm sarih le pahnih a thlah nak thu tawi ten kan ruat tlang pei.

    Bawi Jesuh in mina pawl dam ter dingin siseh, ramhuai pawl dawi suak dingin siseh, vancung uknak a ngai zo timi phuang dingin siseh, a dung thlung tu milai sawm sarih le pahnih cu a maih fehnak ding, khua le hmun ah a tlah a si.

    A dungtlun tu pawl khal cu Jesuh ih thu cah bangin an feh ih thuthangtha an sim. Mitampi in an tlun ih an thuthangtha sim mi cu an ngai. Ramhuai khal tampi an dawi suak a si.

A dungtlungtu pawl cu Jesuh-ih hmin ih ramhuai an dawi suak tikah an mang a bang. An lung a awi tuk. Curuangah Jesuh hnenah khul fung loin an kir sal ih lungawi thu an sim.

Lk 10: 17: sungah hi tin fiang ten kan hmu: “Sawm sarih le pahnih thlah mi pawl cu lungawi zet in an ra kir sal ih ‘Bawipa, na hmin in ramhuai pawl kan dawi tikah kan thu an ngai a si’ tiah an ti.

 

Zumtu u le nau:

    Himi dungtlun tu pawl hi zoh thim tlak hrimhrim an si. An nun a mawi tuk; ziang ruangah ti len: a pakhat nak ah

  1. Jesuh in a thuthangtha sim tu dingih a thlah tikah zo hman in el loin hmakhat ten an feh. Cun a pa hnihnak ah;
  2. Thuthangtha phuang ih ramhuai khal an dawi suak tikah, uar awknak le hngalnak thinlung zianghman an nei lo. “Aw, kan thil ti theinak hi kan maih fimnak le thiamnak ruangah si sawn lo in Jesuh ih cahnak huham ruangah a si sawn; Bawi Jesuh ih thlawsuah in pek ruangah a si, timi thei in zamrangten Jesuh hnen ah kir sal in tangdornak thinlung thawn lungawi thu an sim.” 

Himi thu thawn peh par aw in, Baibal sungah Jesuh in fiangten hitin in sim: Johan 15: 5 “keimah tel lo cun ziang hman tuah thei mi nan nei lo a si” a ti. Jesuh tel lo cun milai in zianghman ti thei mi kan nei lo a si cuh. Cutin a si ah cun kan thil ti thei mi hmuahhmuah cu Jesuh ih cah nak ruangah a si tinak a si cuh.

Zumtu u le nau,

    Hi dungtlun tu sawmsarih le pahnih vek in Jesuh in 

  1. nang le kei a thuthangtha phuang dingin in ko a si. 
  2. Nitin in kan nunnak ah kan awkam le kan ziaza in Jesuh ih thuthangtha phuang tu si thei dingin zuam sin uh si.
  3. Cat bang loin Pathian hnen ih lungawi thu sim thei tu si thei dingin zuam sinsin uh si.

Thuthangtha a ngai tu nan zaten Pathian in van thlawsuah le lei thlawsuah lo pe hram seh.

 

Add new comment

6 + 1 =