Nitin Thuthangtha (Rev. Fr. Pius Kei Lian Cung ih sim mi)

Wednesday of XXIII week of Ordinary Time, Year I (Sept. 11, 2019)

Siarding: Colosian 3:1-11; Ps. 145; 2-3, 10-13ab (9a), Lk. 6:20-26.

Khrih lawng hi ziangzongza asiih ziang hmuah hmuah sungah a um (Colosian 3: 11)

Khrih lawng hi kan ziangzongza asi, kan ziang kim asi. (Colosian 1: 16) Khrih hrangah tuah kan si tiin a ngan. Khrih thawng ih sersiam mi kan siih ziang tin kim hmuah hmuah a mah hrang ih sersiam mi lawng lawng an si. Minung kan zaten siseh Van le Leilung hmuh theih hmuh theih lo tiang in Khrih thawng ih tuah mi le a mah hrangih tuah mi kan si thluh.

Jesuh Khrih zum lo tu hrangah cun, hnih suak le capoh vekmen ih thil cang thei lo tuk hi asi. Asinain Khrihfa le zumtu hrangah cun Khrih cu thudik, thuhmaan, zumtlak asi. Khrih hi kan ziang kim asi. Minung hmuahhmuah in kan tul ih Lei le Van hmuh theih, hmuh theih lo ziang tin kim khal in an tul. Minung le lei le Van in Khrih hi kan tul tuk ti kan thei fiang. (Jn 15: 5) “Kei mah tel lo in zianghman nan ti thei lo.” Ful le thal, sun le zaan thleng awk re ro ih thok in Khrih thawng in asi. Pathian ih Thlarau Thianghlim ih kil ven nak tel lo in kan leilung pi hi a hmun thei lo ih minung khal kan nung thei lo. Cu mi hmu fiang, thei fiang ding cun leitlun fimnak in a ban lo ih zumnak nung lawng lawng in a sim fiang asi. (Col. 3:2) “Leitlun thil ruat hlah, Vancung thil pawl khi ruat sawn uh.” Van lam thil khi ruat sawn uh ti cu siathlo thei Leitlun thilri hnak in kum khua a hmunmi Vancung thu ruat sawn uh. Caan tawite nom cen hnak in kum khua numnuamnak hmu sawn le hril sawn ding ti nak asi.

A thi thei mi kan taksa hnakin thi thei lo kan thlarau hrang ruah sawn ding asi. Kan mah le kan innsang kiangkap minung hnak in Jesuh Khrih kha zoh sawn ding in forhfial asi. Kan minung duhnak le tulnak hnak in Pathian duhnak hawl ih tuan hmasa ding mi kan rak si. Tuih sun Thuthangtha sung ih kan siar mi, mi farah mi rilrawng le mitthli tla pawl cu mi thluasuah nan si a ti mi cu Van lam zoh thiam tu Khrih kan ziang kim asi ti thei fiang pom hnget pawl tu hrang lawng ah asi. Curuangah zumtu U le Nau, harsatnak le tahnak lakah zum lo tu pawl hnak in thazang nei tu le hnangamnak co tu, ruahsannak nei tu kan si hrimhrim ding hi a tul, a thupi zet. Jesuh Khrih kan thangthatnak le kan zumnak hi lungawi caan le that ni lawngah si hram hlah seh.

Kan ziangkim a mah asi ruangah siatni thatni nom caan har caan khalah Khrih ih mithmai kan zoh pei uh. Khrih kha kan hmu pei uh. Amaih remruatnak le umpinak kha thei in tep ringring uh si. Khrih cu kan ziangkim asi tiih pom hngettu pawl hrangah cun farah rilrawn le mitthli tlaknak tampi tong khal seh la, Pathian uknak co ding khopkham tein neih ding le lungawi ih hni ding kan Bawipa Jesuh Khrish in thu in kam asi. Khrih ruangih huatnak, hmuhsuamnak le relsiatnak ton hmanah hlawknak le miatnak a tam sin sin ko. Ziangahtile laksawng tampi Van ah ret sak cia kan si. Farahnak mitthli tlaknak le relsiat dodalnak tinkim hi Jesuh a tel lo ah cun thluasuah asi cuang lo. Jesuh a tel lawngah thatnak, lungawinak le cawisannak thluasuah tumpi ah a cang sawn. Jesuh a thihnak thinglamtah kan zoh ding. Jesuh Khrih thinglamtah parih thlai a rak si hlanah minung tampi thinglamtah parah khenbet in thlai in an rak thah mi an um. Cu mi laiah thinglamtah hrimhrim hi thluasuah hmuhnak, nehnak thinglamtah a rak si lo ih fih nung za, tih nung za ten um zet thinglamtah a rak si ring ring. Sihmansehla cuih duh nung lo zet, fihnung zet thinglamtah kha Jesuh Khrih in a vun pom, a parah khen bet a vun si ti ve tein thinglamtah cu huham nei zet thinglamtah ah a thleng aw ih lungawinak, nehnak, thatnak suah pi tu thinglamtah ah a cang.

Jesuh Khrih a tel lawngah thatnak ah a thleng aw. Curuangah kan harnak kan ton mi le riahsiatnak, dodalnak hmuahhmuah khal hi Jesuh Khrih a tel lawngah thluasuahnak ah a thleng awk thei asi. Jesuh Khrih hnenah kan ziang tin kim hi kan hlan thluh ding ih amah in ziang tin kim ah kan ruah ban lo mi le kan si thei lo mi nak ih sang le sunglawi sawn in in cawi sang ih kan ziang kim Jesuh Khrih ih thluasuah malsawm kan zate parah a thar in thleng hram seh. Amen.