Nu Mary le Biakinn (sim tu Rev. Fr. David Mangte), November 21, 2020.

Nu Mary le Biakinn (sim tu Rev. Fr. David Mangte), November 21, 2020.

Homily for 21^st November (Feast of Presentation of Mary)

          RVA ihsin thuthangtha a rak ngaitu hmun tin ih um duhdawtmi nulepa ulenau pawl, nan umnak hmun cio ah Bawipai pekmi hnangam daihnak in lo zel in ruangpum thlarau thinlung harhdamnak khal hmu thei cio hram uhla nan tuahtuannak khal ah Pathian in hlawhtlinnak lo pe hram seh tiah thlaza cam phah in cibai ka run lo buk hai a si.

          Tuini November 21 cu Nu Mary Biakinn pi ih Apnak sunloih ni a si vek in “Nu Mary le Biakinn” timi thulu thawn hlawmawknak run neih ka duh a si.

          Ahmaisa bik ah Biakinn ih apnak thuthawn pehpar in simfiangnak run nei ta sehla a tha ding ka zum. Biakinn ih apnak puai hi kan Bawipa Jesuh hrang le Nu Mary hrangah kan tuah theu. Lk 2:22-39 sungih kan hmuhmi ni 40 a kim tikah Mary le Joseph in naute Jesuh cu biakinn pi ah fehpi tahrat in an ap a tivek in Christmas hnu ni 40 kimnak February 2 ah kan Bawipa Biakinn ih apnak puai cu kan tuah theu. Kan Bawipa Biakinn ih an apnak thu cu Bible sungih hmuh theih a si ruangah el awk ding thu a um lem lo. Asinain, Nu Mary biakinn ih apnak thu ahcun thusuh duh tu tampi kan um men ding.

          Himi Nu Mary biakinn ih apnak thu hi Bible sung ih um cu a si lo nan, Bible sungih telh lo mi ‘apocrypha’ tiih Pawlpi ih a kawhmi cauk pawl ihsin kan hmuh mi a si. Apocrypha tiih kawh mi cauk pawl cu Bible vekih nganmi cauk hrek khat pawl an si ih, thudik tampi a tel ko nan, thudik lo hrek khat a tel ve ruangah Bible ih telh tlak a si lo ti ih Pawlpi ih rak nemhnget mi cauk pawl an si. Nu Mary biakinn ih apnak thu cu “The Gospel of James” timi Apocrypha cauk sung ihsin kan theih mi a si.

         Hi “the Gospel of James” timi cauk sungah catlangpi bung 25 a um ih bung1-8 sungah Nu Mary ih Nu, St. Anna le a Pa St. Joachim teih thuhla pawl le amah Nu Mary kum 3 a kim tikih biakinn sungih an apnak thu pawl a tel. Hi cauk ih a tarlang mi ah Joachim le Anna hi fanei thei lo an si ruangah hmuhsuam le nautat tong rero tu an si ih a sun a zaan in Pathian hnen ah fate thluasuah ngah dingin thla a cam ringring tu an si thu pawl a tel. Cule an thlacamnak cu Pathian in a sang ih fanute a pek ih annih in a hmin ah Mary ti’n an sak. Mary cu kum thum a kim in a nu le pa in biakinn ah an hei apih inn ah kirsal nawn lo in puithiam kut thuai ah hna a tuan ta ti’n a um.

           Himi thuhla hi siar nuam ding men ih phuah cop mi tla a bang ko nan, kanBawipa Jesuh a rat hlan ah nunau pawl biakinn ah ap an rak si dah nak thuhla pawl tampi hmuh ding a um. Exo 38:8 le 1Samuel 2:22 sungih Pathian umnak puanthlam sangka ah hnatuan ih pum a petu nunau pawl ih hnatuan a sawhkhih tu Hebrew tongfang hi Numbers 4:23, 8:24 sungih Levi pawl ih hnatuan thuhlas imnak ih a hman mi thawn a bangawk. 2 Maccabees 3:19-20 khal in Biakinn ih caan a hmangmi fala thianghlim pawl an um thu in simfiang hrih.

          Culawng silo in, Judah mi pawl ih thuanthu le biaknak lam daan pawl kan zoh tik khal ah Temple Virgins timi Biakinnpi ih hnatuan tu fala thianghlim pawl an um thu kan hmu. Ahleice in, AD 100 hrawng tiang a rak nung mi Judah miphun thuanthu theitu le ngantu Josephus in Biakinn thuhla a ngan tikah Nazarite vow timi thukamnak a lak tu nunau pawl ih umnak dingah Biakinn thawn peh in inn sakmi a um thu a telh cih ve. Lk 2:36-37 sungih kanhmuh mi nuhmeinu Anna khal hi Biakinn thawn sak kop mi inn ih a um ding zum a um nasa; ziangruangah tile, nitin Biakinn ah a um ti a si.

          Lk 1:34 sungah Mary cu fala him pakhat a si thu kan hmu ih curuangah anih khal Biakinn ah hnatuan ih pum a petu falat hianghlim pawl lakih tel thei ve mi pakhat a si. Cui tlun ah a sungkhat Elizabeth hi Puithiam phun a si ti’n Lk 1:5 sungah kanhmu ih Mary khal cu Puithiam pawl thawn pehtlaih awknak neimi le neel aw zet mi pakhat a sinak ding lamzin kauzet a um bet. Kan theih mi thuanthu sungah Mary cu kum 3 a kim in Biakinn ah ap a si ih kum 14 a kim ih Joseph thawn an thitawk tiang Biakinn ah caan a hmang ti a si.

           Himi Mary biakinn ih apnak thu hi a um rori tiih tetti hmuh ding a um lo nan, Judah daan le Christian daan pawl kan zingzoi tikah Samuel vek mipa nauhak siseh, nunau pawl khal biakinn ih Puithiam pawl hnatuan bawm dingih ap mi an um thu kan hmuh tik ah Mary ih thuhla khal hi a si thei lo mi thil a si lo. Cuihlei ah himi hi AD kum zabi 4 hrawngihsin rak um zo mi kan Tradition pakhat khal a si.Tutiang khal ah RC Pawlpi le Eastern Churches pawl cun himi puai hi kan run hmang rero ta.

          Tuini Puai kan tuahmi hmangih thazang lak khawm ka duh mi cu: Nu Mary le Samuel te pawl in an nunnak ah Pathian ih kawhnak aw an theih ih Pathian ih hmanrua thazet an si thei nak hi an nulepa pawl in Biakinn ah a sun a zan ih um thei dingah Puithiam pawl hnen ih an ap ruangah a si. Nulepa pawl in kan fale pawl Pathian ih kawhnak aw an theih ih a cuih kawhnak lamzin a zawh ngah suak tu an si ding kan duh a si ahcun Biakinn thawn kan naihniam ter le Pathian thawn kan neelawk ter hmaisa a tul. Curuangah kan Pawlpi ih daan ah Siangbawi le Sister tuan a duhtu pawl cu Siangbawi le Sister pawl hnenih an um hmasa lawngih tlawngluh a on nak a si.

          Pawlpi thuanthu kan zingzoi khal a sile Pathian ih kawhnak aw a thei ih Pathian ram karhzai sinsin nak dingih hmanrua tha zet a si mi pawl hi an sen lai ihsin nulepa in Pathian lam ah tha teih kaihhruai mi lawnglawng deuh an si. Cule kan lak ihsin Pathian kawhnak a thlun ih Siangbawi Sister a tuantu pawl hi anmah Siangbawi le Sister te pawl hnen ih phuanmi boader tlawng ih an um hnu ih Pathian kawhnak a thei ngahtu an si thluh deuh thaw.

          Tulai san ahcun leitlun daan ih in neh vivo tikah Puithiam pawl le Sister pawl khal zohthim tlak ih nungthei lo kan tam vivo ih an hnen ih kan fale pawl ap ding tla kan ningsin lam men thei. Sihmansehla, kan fale pawl Pathian kawhnak aw an theih theinak ding ahcun Biakinn thawn naihniam a tul rori si mai. Cumi Biakinn thawn an naihniam thei le thei lo cu kanmah nulepa pawl ih tuanvo tum bik pakhat a si.

          Tulai san ah hruaitu tha kan tul tuk ti cu zo cio kan thei ko. Biaknak lam ih in hruaitu pawl khal kan saduhthah lo caan a tam. Cuvek caan ah hruaitu tha thohsuah tu dingah kan zate in tuanvo kan nei cio timi teh kan ruat dah maw? Rinsan tlak hruaitu tha hi kan fale ihsin hung suak thei pang cila ti’n Pathian kawhnak ngah dingah le Pathian kawhnak theithei dingah kan fate pawl Biakinn ah fehpi tahrat in Pathian hnenih a aptu paziat kan um?

          Tuini Gospel kan siarmi Mt 12:46-50 sungah a Nu le a unau pawl in an biak duh ti ih kan Bawipa an va sim tik ah, Vancung ih a ummi ka Pa ih duhnak a tuahtu paoh cu ka unau, ka farnu le ka nu an si a rak ti. Hiti ih a rak ti tikah a nu le a unau pawl ziangsiar lo silo in, a Nu hi mi zovek a si ti a langter sawn a si. Nu Mary hi Bawi Jesuh hringtu a si ruang men ih sunloih tlak mi a si lo. Pathian ih kawhnak a sangih a nunnak khal Pathian duh zawng hlir ih a hman suak ruangih sunloih tlak mi a si sawn. Cuti vek ih Pathian duhnak thlun thei dingah a nulepa in biakinn ah an rak ap ti a si.

          Kannih khal nitin kan nunnak ah Pathian duh zawngih nung thei ringring dingin a duhnak thei thei dingah biakinn ih caan hman tam thei zuam uh si. Kan fale pawl khal Pathian kawhnak thei thei dingin biakinn ah feh pi ringring tu si zuam uh si!

          A rak ngaitu nan zaten Nu Mary ih thlacam sak nak thawngin Pathian duhnak a thlun thei ringring tu si thei dingah amah Pathian a thar in thluasuah lo pe hram seh! Amen.