Nun Thianghlim (Thuthang tha sim tu - Rev. Fr. Joseph Ro Nei Thang), February 5, 2021.

Nun Thianghlim

Thuthang tha sim tu - Rev. Fr. Joseph Ro Nei Thang

February 5, 2021.

Siarding: Hebrew 13:1-8 tiang, Ps 27:1, 3, 5, 8-9; Mark 6:14-29.

          Bawi Khrih ah duhdawt zetmi RVA Falam Chin Service a rak ngai ringring tu nu le pa, u le nau pawl, “nan zate in kan Bawipa nih lo ump ihram seh” tiah thla ka run lo cam sak hai. Tuihni cu 2021, February ni 5, Tlawngkai ni 5 ni asi. Cun February ni 5 cu St Agatha ih puaini asi. St Agatha ih hmin latu hmuahhmuah “Happy feast day” tiah cibai ka run lo buk hai. Tuihni ih kan siar dingmi Bible pawl tla cu Hebrew 13:1-8 tiang, Ps 27:1, 3, 5, 8-9 tiang. Saam a sawn ah “Bawipa cu ka tleunak le i rundamtu asi” tiah asi pei. Thuthang ttha ahcun Mark 6:14-29 tiang asi pei. Tuihni ih kan ruah khawm tlang dingmi cu “Thianhlimnak nun” tiah asi pei.  

          Hebrew cakuat hi a thupi zetmi asi ruangah Catholic Kohhran in tu hrawngih nitin Missa raithawinak sungah siar ringring dingin in khiah sakih a tu kaarlinak kan siarnak a rak si zo. Tuihni tla siar dingin in khiah sakmi Hebrew 13:1-11 kha siar sal uhsi. “Khristian unau nan si bangtukin pakhat le pakhat duhdaw aw ringring uh. Nan inn ah mikhual tlunter uhla duhdaw uh. Cubangtuk a tuahtu pawl cu an theilo in an inn ah vancungmi an thlengter ttheu asi. Thawngtla mi pawl hi hngilh hlah uh; anmah thawn thawng a tla khatmi ah ruat aw uh. Harsatnak a tuartu pawl hi hngilh hlah uh; anmah thawn a tuar khatmi ah ruat aw uh. Tthit-awknak cu zokhal in upat hmaizah ding asi. Nupi le pasal pawl cu zum tlakin um veve hai seh. Nupa sualnak a tuahtu le ttang ttawm sualnak a tuahtu pawl cu thutthennak an tong ding. Tangka cu duh tuk hlah uh; nan neihmi ah nan lungkim uh. Ziangahtile Pathian in “Ka lo tlansan lo dingih ka lo hnonglo ding” in ti. Cuti asi ruangah ralttha in um uhsihla, Bawipa cu i bawmtu asiih ka thin a phan lo ding. Mi in ziangso ka parah an tuah thei ding?” tiah ti uhsi. Pathian ih thu a lo sim dahtu hlan lai ih nanmah a lo hotu pawl kha ciing ringring uh. An nun sungih an umtlandan le an thihnak thuhla pawl kha ruat sal uhla an zumnak khal cawng ttha uh. Jesuh Khrih cu mizan, tuihsun le kumkhua in a hmun ringring asi. Zirhnak phun dangdang in lamzin dik ihsin lo pialter hlah hai seh. Kan thinlung thazaang cahnak cu rawl thu ah ei ding, ei lo ding tiih daan sung ihsin ngahlo in Pathian ih zaangfahnak sung ihsin ngah a ttha sawn. Daan a thluntu pawl cu cuih a thlunmi daan in a bawm cuanglo. Judahmi pawl Pathian an biaknak ih hna a ttuantu puithiam pawlin kan biakttheng parih raithawinak pekmi pawl kha an duhduh in an ei theilo. Ttilva thisen cu Puithiam sang in sual raithawinak hrangah Hmun Thianghlimbik sungah a luhpi. Sikhalsehla cuih ttilva ruang pum cu hnar-pawn ah an ur asi” tiah asi.

          Hi kan siarmi Hebrew cakuat ihsin 1} Pakhat le pakhat duhdaw aw ding, a hleice in mikhual pawl duhdawtnak thu; 2} Thawngtla mi pawl le harsatnak tuartu pawl parah zaangfah zawnruahnak kan nei a ttul zia; 3} Nu le pa tisa sualnak hrialin tthit-umnak hi upat thiam ding a ttul zia; 4} Zumtu kan si vekin tangka hi duh tuk lo ding, kan nei zatmi parah lungawi ding thu; 5} Pathian thu in rak sim dahtu, in rak zirh dahtu biaknak lam hotu pawl kha ciing ringring ding, cun an umtlandan le zumnak pawl cawng kan ttul zia; 6} Jesuh Khrih cu a kumkhua in a hmun ringring asi ti thu; 7} Judah miphun pawlih biak thawi daan pawl in sim asi. Cumi pawl cu thianhlimnak kan ngahnak dingah a thupimi pawl ansi. Judah miphun pawlih biak thawi dan ai ah kannih in kumkhua a hmunmi Jesuh Khrih in in zirhmi thawinak kan nei asi.

          U le nau pawl, 1Peter 1:15 ah “A lo ko tu Pathian cu Pathian thianghlim asi bang tukin nitin nan nunnak ah thianghlim in nung ve uh” tiah in zirh asi. In kotu Pathian cu a thianghlim asi, thianhlimnak a duh asi. Cutin asile, Puithiam le kan si fawnlo, Sister pawl le kan si fawnlo, Brother le kan si fawnlo, ziangtinso kan thianghlim thei ding? Kannih cu innsang neimi kan si ual ziangtinso kan thianghlim thei ding? Innsang cu ka neilo nain siangbawi ka si lo ruangah, Sister ka silo ruangah Brother ka silo ruangah ziangtinso thianghlim tein ka um thei ding? tiah suh ding a um thei asi. Thianhlinak kan ti tikah innsang neilo pawl lawng hi kan ruahnak le kan mit ah a cuang ttheu. A ngaingai ahcun kan mit ih thil kan zohnak ah thianghlim tein kan um thei. Kan hmurka ihsin ttongsia ttong supin ttong thianghlim le a dikmi le a dingmi pawl kan sim tikah thianhlimnak kan ngah thei. Kan kut, kan hnar ihsin sualnak ah in thlenpi theimi pawl hnim lo in kan hrial ahcun thianhlimnak kan co thei. Kan kut in siseh, kan ke in siseh, duhdawtnak hnattuan pawl kan tuah, kan ttuan, kan feh asi ahcun thianhlimnak kan ngah thei. Kan ruahnak kha a thupibik mi asi. Jesuh Khrih in sualnak cu a lenglam ihsin si lo in a sung lam ihsin a ra asi tiah in zirh dah. Kan thinlung ihsin tthatnak kan tuah thei vekin siatnak le sualnak tla kan tuah thei ve asi. Kan thinlung a thianghlim ahcun thianhlimnak kan ngah thei asi. Cuhlei ah u le nau pawl, Catholic Kohhran ih Pathian thuzirhnak ca-uk number 533 le 564 ah “Puithiam, Brother, Sister ansi lo hmanah Baptism a ngahzo mi Kohhran member pawlin nitin ih kut thawn ttuanmi ah siseh, thluak le fimthiamnak thawn ttuanmi ah siseh a ttha ih a thianghlim le a sunglawi ahcun man a nei ih thianhlimnak a ngahter. Cuhlei ah cuvek hnattuan thianghlim le a sunglawimi le a tthami asi ahcun Pathian sunlawinak hrangah siseh, mah bulpak thianhlimnak hrangah siseh, Bawi Khrih hnenah thlarau tampi kan hruai theinak hrangah siseh, tthathnemnak in pek asi” tiah in zirh asi. Innsang nei ruangah thianhlimnak lamzin tampi a um thotho asi. Kan tuahmi hmuahhmuah kha duhdawtnak thawn kan tuah a ttul asi. kan comi Pathian ih kawhnak (vocation) parah titsa kan nei a ttul asi. Innsang a neimi in innsang parah titsa an nei ttulih pumpek Pathian hnattuantu pawlin tla titsa ttaya an nei a ttul ve asi. Tuihni kan siarmi Gospel ah mi uktu Herod in a nau Philip ih nupi a lak ruangah nun thianghlim tein um dingah John in thu a simih a simmi thu ngai duhlo in thawng a thlak asi. Titsa a neilo ih nun borhlawh ah a cang asi.

          Puithiam, Brother le Sister pawl khalin nun thianhlimnak an nei ttul vekin  innsang neimi nupi pawl le papi pawl khawlin an nei a ttul. Parol tilo, nuhmei tilo, nauhak tilo, putar le pitar tilo nun thianhlimnak an nei ttul rori asi, ziangahtile kanmah in kotu Pathian cu a thianghlim ruangah asi. 

          Tuihni ah St. Agatha ih puai kan tuahih a thuanthu kan zoh tik khalah amah cu thianhlimnak a kilkhawi ruangah thahnak a tuar asi. Amah cu milian asi, miphun upa asi, cuhlei ah mimawi zetmi asi. Quintianus timi tlangval pa in a uar tukih hramhram in tthit a tum. Asinain Agatha in amah le amah Jesuh Khrih hnenah a pek aw zo ruangah Quintianus ih tthit tummi cu a el top mai. Quintianus in Agatha cu Christian asi ti a thei bet tikah a kaiter ih thawnginn ah a va thakter. Cun taksa zuartu hlawhhlang pawl lakah a va umter hai nain “Jesuh Khrih cu i runtu, ka Bawipa, ka Pathian, ka beunak le ka ruahsannak asi” tiah a ti ruangah thir hling thawn vuak a tuar ruangah a hnipuan pawl tla a thlek tthehih ningzak hai seh tiah taklawng in an ret, cun a nungcung in meisa sung ah an paih. A thi thotho lo ih “Maw i serhsiamtu Bawipa, tuih caan tiangin tuar theinak le humhimnak i run pek ruangah ka lung a awi ngaingai. Tun ahcun ka nunnak le ka thlarau cu na kut sungah ka lo hlan asi” tiah thla a cam ih a thaw a cat asi. Cutin a nun thianhlimnak cu a kilkhawi asi. Pathian in tla a kilkhawi ve ih a cawisang asi.

          Bawipa in nan zate parah thluasuah lo pe hram seh.