Nunnak maw Thihnak na hril ding?

Pathian in thiltha le thilsia thleidan thiamnak thinlung in pek lawng siloin hlir thei nak khuan khal a pek asi. Tuni a vei khat nak ih kan siar mi Daanpeksalnak (Daan 30: 15 – 20) sung ah Pathian in Moses hmang in Israel mi pawl hnenah thihnak asilole nunnak, thatnak asilole siatnak, thluasuah asilole camsiatnak hril dingin a pek asi. Cule nunnak hril ding hi a duk sak. Nunnak hril ding cun a thu hi an thlun ding a tul. Kan nih khal hi Pathian in nitin kan nunnak ah nunnak sawn hril thiam ring ring in duh sak asi.

A cuih nunnak hril cu ziang ti vek asi ti kha tuini kan siar mi Gospel (Lk 9: 22 – 25) sung ah fiang zet in kan hmu. Kei mah cu lam zin le thutak le nunnak  ka si a ti aw tu kan Bawipa Jesuh Khrih in zo zo khal ka dung thlun tu si duh tu  cu amah le amah hnong aw ta seh. Nitin na thinglamtah phur in ka dung i thlun seh a ti. Cule himi a tong hlan teah a dungthluntu pawl hnen ah  ziang a ti tile mifapa cu daan thiam pawl le puithiam upa pawl hnen ih ap a si ding ti hman khal tong ding ih thah khal a tong ding. Asinain nithum nak ah thawh ter sal a si ding a ti. Jesuh khrih ih in hmuh mi nunnak lamzin hi cu lamzin ol cu a si lo. Harsatnak lamzin asi. Asinain cui harsatnak kan pah suak tik ih kan ngah ding mi nunnak hi asi. Nunnak hril hi kan duh cio ko maw? Pathian cun nunnak hril dingin in duh sak asi.

Vua tik cu caan tha kan neih mi sung teah kan maih tisa duh nak pawl hnong in le kan thinglamtah cio phur in  Jesuh khrih ih dung kan thlun nak thawngin  a thawh sal nunnak famkim zet ih kan tawm thei nak ding ah kan tul mi thluasuah nak hi Vancung mi pawl le Bawinu Maria rinsan in thla camnak thawn dil tlang uh si.

Add new comment

8 + 10 =