Nunnak Thinglamtah Hril Aw (sim tu Rev. Fr. Dominic Hnin), February 18, 2021.

Nunnak Thinglamtah Hril Aw

Thuthangtha sim tu Rev. Fr.  Dominic Hnin

February 18, 2021.

Ulh caan, Vutcam culh hnu tlawngkai nili ni (Feb 18, 2021)

Siarding: Deut:30:15-20; Ps. 1:1-4,6; Lk 9:22-25

• Tuisun kan siarmi Bible hmaisabik hi Daanpeksalnak cauk ih tawifamkimnak a si kan ti thei. Ziangah ti le hitawk hmun ah "Pathian ih thupek," "tluasuah,'' ''camsiat,'' le ''thu thlun ding ih forhfialnak" pawl a tel thluh ruangah a si.

• Kan siarmi ah, Moses in Israel mipi cu "duh hril ding" a pe. Himi duhhrilnak cu Israel mipi ih "hmailam" hrangah a si ih Israel pawl ih hmilam cu himi duhhrilnak parah a tthumaw. Himi ah Pathian ih thatnak le zangfah thiamnak tivek pawl a tel nawn lo. Pathian an zumnak le an rinsannak parih an duhhrilnak, Pathian ih kawhnak aw cu an rak awihnak parah a hngataw.

• Moses cu thu lai tthentu ding a si na-in, himi thu, Israel pawl ih duhhril dingmi thu ah thulai ah ding lo-in ttannak lam a rak nei. Curuangah "nunnak lam hril uh" ti ah a ti.

• Ttongfang ahcun, ''nunnak,'' le ''thihnak'' ti a si nan, a huapmi a sullam cu a kau ngaingai. "Nunnak" timi cun "Pathian ih kilvennak hnuai ah milai ih cangvaihnak hmuahhmuah'' a huap thluh. Cuvek thotho in "thihnak'' cun ''Pathian tello ih cangvaihnak'' hmuahhmuah a huap thluh. Curuangah 'thihnak' cu ''lei tisa nunnak a cem,'' 'lei tisa nunnak a cawl'' ti lawng siloin ''Pathian tello ih nunnak'' khal a huap thluh a si. Curuangah "thihnak'' cu ''camsiatnak'' a si ih ''nunnak'' cu thluasuah a si.

• Himi nunnak le thihnak thawn pehin, 'thilttha' le 'thilsia' thu kan hmu cih. Hitawk hmun ah 'thilttha' le 'thilsia' timi hi milai ziaza thawn pehzom ih rel siloin Pathian thawn pehzom ih zoh le rel a si.

• ''Thilttha'' cu Pathian thawi nuntlangnak ih vuirah a si tiah kan hmu. Curuangah "Pathian ih thluasuah'' ti ih ruah ringringmi 'tthansonak, lungawinak le citthatnak" pawl cu 'thilttha' ti ih relmi an si.

• ''Thilsia'' cu Pathian a tellonak 'nun' a si. Curuangah 'camsiatnak' ih sulhnu pawl an si ih 'cimitnak, ram ihsin dawisuaknak le thihnak'' pawl tla an si.

• "Thilsia le thilttha'' sim thluh  hnu ah le cui "sia le ttha" ih vuirah pawl simfiangzo hnu ah an mai duh thlan hril dingin a sim.

• Israel ih duhhril cu theihpitu dingah Moses cun lei le van cu a kawlruai. Hlan lai ih nunphung le zumnak ah kaphnih pawl thu tiamkamnak an tuah tikah theihpitu ah lei le van, thing le lung tivek, boruakpi (nature) cu theihpitu ah an sal ttheu. Ziangah tile an thu tiamkammi a pahbaltu lam cu cui boruak in a siatsuah tiah an rak zum ruangah a si.

• Himi kan zoh tikah, Israel ih duhhril cu siatcam ih hrilmi a si.

• Israel cun amai sinak diktak cu "nunnak" a hrilnak ah a hmu. Ziangah tile Isrel miphunpi ih umsan cu Pathian duhdawt dingah a si. Nunnak a hrilnak thawngin Pathian cu a duhdaw ringring ding a si.

• Tu-ah, Israel tefasin hmuahhmuah in, a nitin nunah "nunnak hril awla na nun a sau ding" timi Moses ih awkam cu thei ringring ding a si.

•  

• Israel mipi cun "nunnak kan hril, Pathian nung kan be ding" an ti ko nan an thu tiamkammi cu nunpi thei lo in an tla sia. Hmansehla Pathian in a duhdawtnak le zangfahnak cu a hmunter thotho ruangah runtu Messiah rawn thlah dingah a rak tiamkam.

• Israel khal cun Messiah cu raak hngakhlapzet in an um ih David tesinfa sung ihsin sunglawizet in a rawng suak ding ti in an ruat, an rak hngak.

•  

• Tuisun kan siarmi thuthangttha ah Bawipa Jesuh in "Pathian Fapa" cu harsat a ton ding thu, rak sim sungnak a nei. Amah cu runtupa Messiah a si ko nan, mipi ih rak hngahhlapzet vek in "siangpahrang sunlawinak" thawn a ra lo tikah an rak thei thiam lo. Annih cu mi ih ruah banlo lamzin thawn siloin mi zapi ih zawh theimi le zawh dingmi lamzin thawn "rundamnak zin' ah in hruai. Cumi cu 'mai thinglamtah put cio ding' a si.

• 'Pathian Fapa' cu sual ngaidam theitu (Lk5:24) a si, Sabbath hnak  khal in a tumsawn (Lk 6:5) ruangah Sabbath daan khal cu tleng theitu a si. Tu ahcun, cui 'Pathian Fapa' cu nautat zomtaih a tuar dingih thah tiang a tuar ding. Asinan, a thawhsalnak thawngin nehnak a co ding.

•  

• Bawipa in a ratnaksan cu theih hngilhlo in mi tampi ih ruahdan le pomdan cu kalh in Harsatnak lamzin a zawh. A dungthluntu ding pawl khal Jesuh ih dung kan thlun ding ti hnuhnu cun lamzin dang a um lo: "thinglamtah put'' ding zin lawng a si.

• Bawipa in dungthluntu pawl a khawh lai ah "ii thlun uh'' a rak ti men ttheu. Hmaisabik dungthluntu pawl a kawh lai ah 'ii thlun uh, minung kaitu ka lo cangter ding' (Lk 5:1-11) a ti. Levi a kawh lai khalah, 'ii thlun aw' (Lk 5:27-32) a ti men. Asinan, tuisun kan siarmi Lk 9:22-25 ahcun "ii thlun uh'' ti nawnlo in harsatnak thawn a hiip hai. A dungthluntu pawl humhim ttheutu Bawipa cun tu ahcun humhimtu neilo ah an cang ding. An hmailam ah "thinglamth'' in a hngak. Cui thinglamtah ih phen ah kumkhua nunnak Vancungram a um.

• Bawipa cun a dungthlun dingah a hneek in, in hneek lo; na duhlo nacing in, a dung a lo thlunter lo; nangmai hril a si sawn. Jesuh ih dung thlun dingih na hril a si le "thinglamtah pu phah in nunnak lamzin ah na feh ding'' ih Jesuh tellonak hmun na hril a si le dawnkhamtu umlo in na tawi na vak dingih kawhrum ah na tla ding, ttah le aihramnak hmun ah na thleng ding.

•  

• Himi 'thinglamtah put' kan ti tikah 'mai duhduh ih tawihvah' cu hrial in le, mai nuamnak men cu hrial in bawipa ih hrangah ti ah Bawipa ih in pekmi lamzin, in khhhmuh sakmi lamzin zawh ding a si. Cui lamzin cu Baptism kan ngah lai ih "Ka zum" kan timi le "Satan ka hlon" kan timi cu kan nun ih neih ding kha a si.

• Cangantu Luke cun himi ''thinglamtah put ding'' thu khal ah "nitin'' a ti. Voikhat put men a ngahlo, voikhat hril men a ngah lo. Nitin ih na hril a ttul. Curuangah nitin kan nun ah kan thinglamtah a simi Satan ral cu do phah in, Bawipa ih dung thlun uh si, kan hmai ah kumkhua nunnak a um.

• Kan Thinglamtah pu in kumkhua nunnak hril uhsi.