Pathian in hmutertu Fapa

Pathian in hmutertu Fapa

Hngah caan Zarh khatnak, tlawngkai nihnih ni (Dec. 3, 2019)

Siarding: Is 11:1- 10; Ps. 71:1-2, 7-8, 12-13, 17; Lk. 10:21-24.

Minung ih Pathian kan theihtheinak hi a tlangpi thu in lamzin zin hnih a um an ti. Cucu Sersiamnak le Bible a si. Kan pu kan pa pawl ih sanah Ninu le Thlapa an rak bia, thingbul lungbul an rak bia kan ti. Ttha te ih kan ruah a si ahcun sersiammi pawl a sersiamtu an rak hawl a si. An nat tikah maw, an ttulhainak ah bawmtu an hawl. An thinlung thup in "Cungnung Pathian" a um ti an zum ih an hawl. Cucu a nung Pathian kan theihnak dingah kekar a rak si. Sersiammi pawl zoh in sersiammi hnakih rorum le thil ti thei sersiamtu, Pathian, a um thu in theiter.

Cun Bible kan ti ttheu hi Pathian ih ttongkam a si. Cui Pathian ih ttongkam cu kannih minung ih kan theihthiam theinak dingah minung ttongkam hmang ih ngankhummi a si.

Minung hi kan lung a ruh ih ruangah voi tampi cu Sersiammi lam le Bible sung ihsin kan theihmi Pathian cu kan pom duhlo, kan cohlang duh lo. Asinan kan hmuh kan tonmi pawl hi Pathian theihnak ah an cang ttheu. Himi pawl kan zoh a si le Bible in siseh, sersiamnak in siseh, hmuhtonnak in siseh, a bang aw thluh mi cu Pathian kan theih theinak dingah amah Pathian in amah le amah a langaw. Amah Pathian in hram a thok, hmalaknak a tuah hmai sa ringring.

Asinan, Pathian ih hmalaknak cu kannih minung in ziang ih kan rak siarlo caan a um ttheu, kan ngaihsak lo, kan hnaset kantun ttheu. Cuticun Pathian thawn pawlnelawknak um nawn lo in kan um. Asile, Pathian thei ding le amah thawn pawlnel aw ding ah ziang a ttul.

Minung sinak zoh aw sehla, mah le mah tla kan duhdan le kan lungput von zohfel awsal sehla mi hngalhngawng le mi tiawter pawl khi a va kom le pawl kan paih tuk lo. Cuhnak in tangdormi pawl le mi daite deuh khi kom nuam kan ti deuh cio. Cumicu kan mai parah midang ih in rak hmuh dan a si ve. Ziangruangah hivek lungput le ziaza kan nei ti ttha tein vawn ruatawsal sehla mi hngalhngawng pawl in midang zawn an ruat lem lo. Midang ih rawn ruahsak lo, midang ih sinak rak cohlang lo tu pawl, rak theihthiampi lo tu pawl cu reipi kom awk a theih lem lo.

Thinlungput bangaw pawl khi an komaw, rualpiaw duhdeuh ti asi ko nain ti hngalhngawng veve, tiawter veve tivek pawl hi anmah le mah an komaw thei ngingai lo. Ziangruangah ti a si le "Lal" an duh cio tikah Lal an cuhaw. Ramsa le ttilva men hmanin mai lalnak ram an nei ti a si vekin Lal an cuhawk ruangah an rualrem ngaingai theilo.

"Lal" cuh loin tangdor te-ih kan um lawngah Pathian kan cohlang thei dingih Pathian thawn kan pawlne aw thei ding.

Tuisun kan siarmi Thuthangttha khal ah mifim mithiam pawl hnenah siloin mi nauta le tangdor pawl ih hnenah Pathian cu a lang awaw a si. Ziangruangah ti le mi tangdor pawl le mi nauta pawl cun an thinlung sangka kha midang hrangah an rak ong ih ruangah a si bik. Pathian ih thuhtuk pawl famkimnak cu Jesuh a si ih hlanlai ihsin an rak hngah rero mi Kamsang simsungnak pawl ih famkimnak khal amah Jesuh thotho a si. Tangdornak umlo in Jesuh cu kan pom theilo ruangah Pathian ih thuthuk khal kan pom thei nawn lo.

Ziang ruangah Jesuh cu cohlan a ttul nak san ti a si le amah Jesuh tello cun thudik thuhman kan theih theilo vekin Pathian khal kan thei thei nawnlo. Jesuh cu Pathian in hmutertu, Pathian ih langnak a si.

Bawipa Jesuh ih thangtthat thlacamnak, "Maw ka Pa, van le lei ih Bawipa, mifim mithiam pawl hnenih sim dah lomi thil cu fimthiamnak neilo pawl hnenih na langter ruangah ka lung a awi ih ka lo thangtthat." a ti mi hi dungthluntu sawmsarih le pahnih pawl ih an tuah an ttuannak pawl an ra sim hnu ih a ttongsuak mi a si. Hi leilungtlun mit ih zoh ih mifim le mithiam pawl ih an rak pom duhlo le cohlan thei lomi thudik thuhman cu, mi nauta le tangdormi dunthluntu pawl ih an cohlan thei ruangah a si.

Lk 8:10 ahcun "Pathian uknak ih thuthup cu nan hnenah pek a si zo" tiah Jesuh in a Dungthluntu pawl hnenah a sim. Kan Bible sungah "mifim mithiam pawl" a ti ttheu mi hi "Daan thiam pawl le Pharisee” pawl a khih hmuh bik. Asinan anmah lawng si loin anmah bangih mi tiawter pawl hrang ahcun Pathian ih thuthuk theih ding cu a har. Cu pawl cun Bawipa Jesuh le a zirhmi thu le hla pawl cu an rak co hlang lo. Nauhak pawl bangih thinlung ttha nei le thinlung sangka a rak ong pawl, kan Bible ttongkam cun "mi nauta pawl" lawngin an rak co hlang

Bawipa Jesuh cun thuthuk hmuahhmuah cu a phuang thei ttheh, ziangah tile Pathian ih Fapa a si ruangah a si. Himi zumnak thuthuk le Vancungram thuthuk hmuahhmuah cu Pa ihsin a ra luangsuk mi an si ih Pa ah a famkim thluh. Jesuh in "Fapa hi zo a si ti Pa siarlo in an thei lo ih Pa hi zo a si ti khal Fapa le Fapa ih a simsinmi ti lo cun an thei lo" a ti. Jesuh an hmuh le Pa an hmu ding. "keimah hi ka Pa sungah ka um ih ka Pa khal ka sungah a um (Jn 14:10-11).” Thuthuk hmuahhmuah a theih famkim theinak cu Pa le Fapa ih pehtlaihawknak, an thei fel awk veve nak ruangah a si. Himi thuthuk pawl khal cu Jesuh in a duhmipoh hnenah a phuang sin thei ih cumi pawl cun Pa hi zo a si ti theih theinak an nei ve.

Pathian kan theih theinak dingah a Fapa cu kanmah minung lakah a rawn thlah. Pathian kan theih ngaingai theinak dingah lamzin kan neihsun asimi Jesuh, "Keimah cu lamzin, thutak le nunnak ka si, keimah hnen siar loin zohman ka Pa hnen ah thleng thei lo. (Jn 14:6)" ti aw tu cu midang hnenah kan hei than sin ih cucu Thuthangttha phuang kan ti ttheu mi cu a si. (Rom 10:13-17) ah, "Zumnak cu thuthang theihnak ihsin a ra ih thuthang cu Khrih kan phuannak ihsin a ra." ti a si. Jesuh ih dungthluntu pawl cu "lungawizet" in an ra tlung. An lungawinak thuhla kan zoh a si le an khual tlawnnak ih "an tuah an ttuanmi" pawl ruangah a si. Cui an tuah an ttuan mi cu "Jesuh ih hnattuan, thuthangttha sim," "khat lam zawng cun Jesuh le Pa ih pehtlaihawknak an va phuang" ruangah a si.

Mi hmuahhmuah rundam an si theinak dingah tangdornak thawn Jesuh kha cohlang aw la na cohlanmi Jesuh kha midang hei zem ve aw.