Pathian Hnen Kirsal Caan Sunglawi (sim tu Rev. Fr. Peter Zin), February 20, 2021

Pathian Hnen Kirsal Caan Sunglawi

Thuthangtha sim tu Rev. Fr. Peter Zin

 February 20, 2021,Zarhte ni RVA Falam service in thuthangṭha simnak. 

Siarding: Isaiah 58:9-14; Saam 86:1-6; Luka 5:27-32

           Thuthangṭha a ngaitu duhdawtmi nu le pa, u le nau pawl, Bawipa hnen in a ra mi hnangam daihnak cu nan zate hnen ah um ringring hram seh. Tuni cu February 20 ni a si ih Chin National Day, Chin-a-myo-ta-neh, kan Lai mi phun puai ni a si vek in kan Lairam hrang ah a cuangce in thlacam uh si. Kan Lairam ah remdiahnak, hnangamnak, lungawinak le ṭhansonak pawl um hram seh. A hminmen in Christian ram siloin Chrih ih Uknak sungah a um taktak mi ram le miphun kan si thei ringring hram seh. Kan Lairam hi kan thei vek in Christian ram cu kan ti thei nan zumnak lamah siseh, ṭong lamah khal siseh bang lo le ṭhenthek nak a tam zet nak ram a si ih Pathian in hmai lam ah a ṭha bik in lam in hruainak ding hrang ah khal thlacam um si.

          Sile tuni ih kan siar dingmi Bible lam ah kan feh sal pei ih kan siarmi Bible pawl in thlarau thazaang kan lak tlang cio ding in ka lo sawm. Kan siar dingmi Bible pawl cu Isaiah 58:9-14, Saam 86:1-6, le Gospel cu Luka 5:27-32 tiang pawl an si. Gospel cu Bawi Jesuh in dungthluntu Levi asilole Matthai a kawhnak thu a si. Levi cu siahkhawngtu a si ih Jew miphun lak ah cu misual bik pawl cazin ah a tel mi a si. Asinan kan Bawipa cun a cuih misual pa kha a dungthluntu si dingah a hril ih a netnak ah mithianghlim tiang ah a cang ter. Bawi Jesuh cu Levi le a dang siahkhawngtu pawl le mi ih misual deuh tiih an hmu mi pawl thawn an ei an in tlang mi an hmu tikah Farasi pawl le Daanthiam pawlin mawh an puh, an phunzai. Cutikah Jesuh in, “A harhdammi pawl in sibawi an ṭul lo, a nami pawl lawngin an ṭul. Miding pawl ko dingah ka ra lo; misual pawl an sual sir awter dingah ka ra a si,” tiah leitlun ih a ratsan nak thu a sim hai. 

          Himi Bawi Jesuh in Levi asilole Matthai a konak thu thawn pehpar in tunai te tisehla January 16 ni ah ka sim zo ih tuni ah Ulhnak caan (Wa-dwin) tikcu caan a si vek in Ulh caan le veikhatnak ih kan siarmi Bible thawn pehpar in tam dueh sim ka duh. Hi Ulh caan kan timi hi Pathian hnen ih a cuangce in kirsal caan a si. Misual Levi kha a ko ih mithianghlim ah a cang ter vek in kan nih kal kan sualnak kha taan ta in mithianghlim kan si ve dingah Bawipa in a duh. Ulhnak caan a thoknak in a si mi vutcam culhnak tlawngkai ni thum ni ah Bawipa ih kawhnak aw Bible kan siar. Cucu ziang asi tisile, Joel 2:12 in ‘Bawipa in, “Atu rori ah nan thinlung zate in rawl ul in, Mitthli tla le riahsia in, ka hnenah kir uh. Nan hnipuan thlek lo in nan thinlung khuai sawn uh; cule ka hnenah rakir uh,” tiah a ti.’ Ulh caan ‘wa-dwin’ kan ti mi cu Pathian hnen ih kirsal caan sunglawi, sualnak ruangah Pathian thawn kan hlat aw zomi kha sualsirnak thawn Pathian hnenah kir in Pathian neih salnak caan sunglawi a si. Pathian in a aw nem in in ko ih in hngak ringring a si. 

          Ulh caan (wa-dwin) cu Pathian hnen kirsal caan sunglawi, Pathian thawn naih aw salnak caan sunglawi a si vek in wa-dwin sung ih kan tuahmi pawl kan tumtahmi pawl hi Pathian hnen ah in thleng pi thei mi si a ṭul a si. Kan rawl ulhnak, kan thlacamnak, thilṭha kan tuahnak pawl in Pathian hnen ah in hruai thei ṭul asi. Curuangah Bawi Jesuh in rawl kan ulh tikah siseh, thla kan cam tikah siseh, thilṭha kan tuah tikah siseh mititeraw pawl vek in mi in in hmu seh, mi in in thei seh tivek in upatnak le mi ih sunlawihmi si ding ah kan tuah pang lo dingin ralrin nak in pek a si. Minung sunlawihnak co dingah kan tuah pang a si le cu kan tum tah mi Pathian hnen kirsal nak, Pathian thawn nai aw salnak hrangah a ṭha hnen lo ding asi. Curuangah ‘kan rawl ulhnak, kan thlacamnak, thilṭha kan tuahnak pawl in Pathian hnen ah in hruai thei ṭul asi,’ ka ti nak a si.

          Pathian in thilṭha lo kan tuah mi pawl tan in a mah hnen kir sal hi ziang tulukin a duh ti kha tu ni a veikhatnak ih kan siarmi Bible Is 58 sungah kan hmu thei. Cang 9 nak in kan siar thok ih ziang a ti tisile, ‘Thla nan cam tikah ka lo let ding; in kawh tikah ka lo sawn ding. Mi nan hremnak hi nan hlon ṭheh ih mi nan hmuhsuamnak le nan ṭong ṭha lo pawl nan cemter lawng si lo in, rilrawngmi an pum nan puarter ih mitlasam pawl an ṭulmi nan pek a si ahcun a lo kulhtu khawthimnak hi sun nitleu ah a cang ding. Cule ka lo hruai ringring dingih leilungtlun ih thilṭha in ka lo kimter ding. Ka lo damter dingih ka lo cak ter ding. Tidai a tam zetmi hmuan bangtuk nan si ding; a kang dah lomi ticawm bangtuk nan si ding. A siat ṭhehmi le hnawmpen ih a cangzo mi cu nan minung pawl in a hram hlun parah an saksal ding a si. A kiak cia mi remsaltu le a siat ṭheh zomi inn pawl a sak saltu tiah ciin ringringmi nan si ding,” tiah a ti. Hi bangtukin Pathian nih lungawi zet in thluasuah a pek duhnak kan zoh a si le ṭhat lo nak pawl tan ta in a mah hnen kir sal hi Pathian in ziang tluk in a duh ti kan hmu thei a si.

          Duhdawtmi nu le pa, u le nau pawl, wa-dwin caan hi Pathian hnen kirsal nak caan sunglawi a si. Wa-dwin caan hi phurhrih phur caan a si lo ih kan phur rero mi thilrit pawl Bawipa kehram ah ṭhum caan, caan ṭha a si. Sunglawi zet in hmang thei tum uh si. Bawipa ih duhnak a thlun tu kan si ringring thei nak ding in Bawipa a mah in in thluasuah cio hram seh.    

Fr. Peter Lal Zin Thang (Hakha Diocese)