Pathian ih duhdawtnak le milai ih duhdawtnak

“Duhdawtnak sungah ttihphannak a umlo. A famkimmi duhdawtnak in ttihphannak cu a hloter ttheh” tiah 1John 4:18 ah kan hmu thei.

 (January 9, 2020)

            Bawi Khrih ah duhdawt zetmi  nu le pa, u le nau pawl “kan Bawipa Jesuh Khrih ih zaangfah lainatnak, Pa Pathian ih duhdawtnak le Thlarauu Thianghlim ih pawlkomnak pawl cu nanmah thawn un hram seh” tiah cibai ka run lo buk hai. Tuihni cu 2020, January thla ni 9, Tlawngkai nilini ah. Kan siar dingmi Bible pawl cu 1John 4:19 ihsin 5:4 tiang; Thuthang Ttha ihsin cun Luka 4:14-22 pawl tla ansi ih Saam asawnnak ahcun “Maw Bawipa, miphun hmuahhmuah cu Na hmai ah an bok ding asi” tiah asi. Tuihni kan ruah khawm dingmi ahcun “Pathian ih duhdawtnak le milai ih duhdawtnak” tiah asi pei.

            Duhdawtnak cu Pathian hnenah a hram a ttoh asi. Milai ih duhdawtnak cu Pathian sinak ih tletmi asi; Pathian ih duhdawtnak thawn tletmi cu milai duhdawtnak tiah kan ti thei asi. Curuang ah St Clement in “A dikmi Christian timi cu Pathian si dingin zirnak asi” tiah ati asi.  1John 4:16 “Zokhal duhdawtnak sungah a nungtu cu Pathian ih sungah tla a nung ve asi” tiah in zirh; ziangahtile “a hram thawh ihsin minung cu Pathian ih hmuihmel vekin serhsiam asi ruangah asi” tiah Semtirnak 1:26 ah Cathianghlim nih in sim. Pathian cu duhdawtnak asiih Pathian kan si tum asi ahcun duhdawtnak kan nei a ttul asi. 

            “Duhdawtnak kan neinak thawngin Pathian cu kan thei thei asi” tiah 1Jn 4:12 ah St John nih in zirh asi. Zokhalin Pathian cu kan hmu thei dahlo, ziangahtile Pathian cu Thlarau asi. Asinan a duhdawtnak le a tthatnak cu kan hmu thei, kan tep thei asi. Zohmanin thli cu kan hmu thei lo asinain a tthatnak cu kan thei thei, kan tep thei ruangah kan nung thei, thli thawn kan thawsatnak pawl kan daiter thei, thli thawn electric power kan suah thei. Zohmanin electric tha cu kan hmu dahlo, asinain electric ih tthatnak cu kan hmang thei ruangah rawl kan suang thei, meisa kan vang thei, battery tha tla kan rak thun thei, a phunphun hnattuannak ah kan hmang thei. Pathian ih tthatnak cu duhdawtnak asi. 

            Pa Pathian ih duhdawtnak tla cu Jesuh Khrih sungah a lang asi tiah 1John 4:9 ah in sim fiang. Jesuh Khrih kan zoh tikah Pathian ih duhdawtnak thu phun hnih kan hmu thei asi. (1) cu lehrul kirnak umlo duhdawtnak kan hmu thei asi. Cumi cu Pathian in milai pawl a duhdawt tuk ruangah a Fapa hman zuahlo in kanmaih sual ngaidamnak ding hrangah amah le amah raithawinak a peknak asi. Cumi cu Pathian ih a sangbikmi a duhdawtnak asi. A Fapa in a nunnak in pek ruangah kannih tla Pa Pathian hnenah kan nunnak cu thi tuar ve in raithawinak pek dingah Pathian nih in dil lo, cutin lehrul kir dingah Pathian nih in dil lo. (2) cu duhdawt tlaklo kan si na cingin a famkimmi duhdawtnak in pekmi kha kan hmu thei asi. Pathian ih duhdawtnak cu tahtthim theilo mi le khuahruahharza duhdawtnak asi. Pathian in misual-mittha a duhdawtih bangrep tein an parah ruah a surter, ni tla a tlangter asi. 

            Milai ih duhdawtnak cu Pathian duhdawtnak in tletmi asi. Milai pawlin Pathian an duhdawt cio, ziangahtile Pathian in anmah kha a duhdawt hmaisa ruangah asi. “Duhdawtnak sungah ttihphannak a umlo. A famkimmi duhdawtnak in ttihphannak cu a hloter ttheh” tiah 1John 4:18 ah kan hmu thei. A famkimmi duhdawtnak kan nei tikah Pathian ih thutthennak tla ttih ding a umlo, ziangahtile Pathian in duhnak a tuahtu pawl kha duhdawtnak a nei ruangah asi. Kan Pathian cu Thutthentu le Siangpahrang, duhdawtnak thukham le upadee pawl in petu asi ih kannih in upadee ih lubik asi mi duhdawtnak kan nei ahcun upadee thlun cia kan cang ruangah zianghman ttihphan a um lo. Kan hrangah a khuint a yay hman ah a si sawn asi. 

            Pathian nih in duhdawt vekin kannih milai pakhat le pakhat duhdawt aw ve ding kan si asi, ziangahtile minung ih nunnak ah Pathian ih nunnak kha umter ding kan si asi. Pathian sinak nunnak cu duhdawtnak nei dingah hi asi. Mithianghlim John in “hmu theimi kan unau pawl hman kan duhdawt thei lo ahcun hmu theilo mi Pathian cu ziangtinso kan duhdawt thei ding. Cuvek cu thuphan pernak men asi” tiah in zirh asi.

            Pathian kan duhdawt ahcun milai pawl thlaidannak umlo tein kan duhdawt a ttul asi. Cun Pathian ih serhsiammi thilri pawl tla duhdawt ding kan si asi. Pathian ih thil tuahmi pawl siatsuahtu silo in duhdawtin kilkhawitu kan rak si cio pei uh. Pathian in fakham a duhlo. Fakham ding silo in karhzaiter dingih a serhsiammi asiih leilungpi kha khahter dingah a tumtahmi asi sawn asi. 

            “Pathian kan duhdawt ahcun a thukham thlun ding kan si asi” tiah 1John 5:3 ah mithianghlim John in in zirh asi. A pekmi thukham tla cu duhdawtnak thukham asi. “Pathian ih pekmi thukham cu kan thlun theilo tluk in a harmi tla asilo asi” tiah 1John 5:3 ah in sim bet lai asi. 

            Pathian duhdawtnak le milai pakhat le pkhat kan duhdawt aw thei cio nak dingah Pathian in a tharin in run thlunsuah hram seh.