Pathian ih duhmi tuahnak

“Pathian ih duhmi tuahnak”

(December 5, 2019 – Nili ni)

          Bawi Khrih ah duhdawt zetmi nu le pa, u le nau pawl “Emmanuel Bawipa ih daihnak cu nan zate thawn um hram seh” tiah cibai ka run lo buk hai. Tuihni cu Adventus caan karkhatnak, tlawngkai nilini asi. Kan siar dingmi Bible pawl tla cu Prophet Isaiah 26:1-6 tiang asi pei ih Thuthang Ttha sung ihsin cun Mt 7:21, 24-27 tiang ansi pei. Kan ruah khawm dingmi cu “Pathian ih duhmi tuahnak” tiah gaungsin ttat ningla ka duh asi.

Tuihni kan siarmi Thuthang Ttha sungah Bawipa Jesuh in miburpi thu a zirh tikah “Bawipa, Bawipa, I titu hmuahhmuah in Vancung uknak ram ah an lut lo dingih Vancung ih a ummi ka Pa ih duhnak a tuahtu pawl lawng an lut ding” tiah Mt 7:21 ah a zirh asi. Hebrew 4:12 ah “Pathian ih ttongkam cu a nung ih a cak fawn” tiah thu in zirh ruangah hlan lai ih Bawipa Jesuh in amah a thluntu pawl thu a zirhmi hmuahhmuah pawl cu a tu ah tla a nung lai ih kanmah tla in zirh rero lai asi tiah ruat ding kan si asi.

Kan nun sungah Pathian ih thu kan thei ih kan theimi vekin kan tuah suak ding hi a ttul zetmi asi. Pathian ih duhnak thlun dingah tla a thupi hnasa asi. 

• Pathian in a tleunak kengtu dingah Lucifer kha ttuanvo a pek nain Lucifer cu a thinlung sungah puarthaunak a lut ruangah Pathian a dodal. Vancung ah ral donak a um tiah thuphuan bung 12:7-9 sungah kan hmu thei. Pathian ih cahnak huham cu serhsiammi pawlin ziangtinso an do ngam. Lucifer le a dunghtluntu pawl cu ral an sungih leilungah an vun thlak. Lucifer le a dungthluntu pawl cu Pathian ih fa le an rak si dahih Pathian ih fale sinak an nuam zia cu an tep zo ih a tu ahcun Vancung ah an um thei nawnlo ih hi leilungah hlon an si zo. Pathian in Adam le Eva te a serhsiam ih Pathian ih fale dinhmun ah an um rero asi ti kha an hmu tikah annih tla Pathian ih fa le ah cang nawn hlah seh tiah thinlung kengin an bum asi. Saatan a cang zo mi Lucifer le a dungthluntu pawlih hnattuan cu Thuphuan 12:9 ah “leilung pumpuluk mibumtu” tiah an rak si vekin mibum ding an rak si ta mai. Annih in Eva kha a bumih Eva in bumnak kha a neh banlo. Adam tla Eva in tuk a forh ih thingrah cu a ei ve, tukfornak camibuai an sung veve asi. Satan cu ziangtluk in so a lung a awi ding?
• Pathian ih thu ngailo, thlunlo ruangah Adam le Ava te pawlin Pathian ih serhmi Eden hmuan sungah an um thei nawnlo ih dawi suaknak an tuarih thihnak le ttahnak thawn a khahmi hi leitlun ah an rak thleng asi. 
• Pathian ih thupekmi cu Adam le Eva te in an ngailo. Eva in Pathian ih thupek a el hmaisa ruangah nunau ih thungainak kha Pathian ih a duh asi. Cumi cu Bawinu Mary hnenah a famkim. Ti duhnak cu Eva ih thungailonak cu Bawinu Mary in a samh sal asi tinak asi. Adam ih thungailonak tla cu Bawi Jesuh nih a kuan sal, a samh sal tinak asi. 
• Bawinu Mary in “Keimah cu Bawipa ih salnu ka si; na simmi vekin ka parah cang ko seh” tiah Pathian ih rundam hram ttohnak Thuthang Ttha cu a cohlang asi. Cutin cu Messiah Bawipa cu hi leitlun Runtu si dingin Bawinu Mary sungah minung tisa seemnak a lak thei asi. Bawipa Jesuh tla amah ih vancung lal tohkham kha tansan in Pathian ih duhnak kha tuah dingah hi leitlun ah a rung ttum asi. Hebrew 10:7 ah “Maw Pathian, hinak ka um; na duhmi tuah dingah ka ra zo” tiah Bawi Jesuh in Pathian ih duhnak tuah dingah a rung ttumnak thu kan hmu nak asi. 
• Bawipa Jesuh in a Pa ih thu a ngainak cu thinglamtah parah thihnak tiang tuarin asi tiah Philipi Cakuat 2:8 ah Paul nih in zirh asi. Amah thisen thawn leimi nang le kei khalin Pathian ih thu ngai ve dingin le thlun ve dingah Jesuh Khrih in a duh asi. Bawipa Jesuh cu tlang parah a hmuihmel a thleng lai ah “himi cu ka duhdawtmi ka Fapa asi; a parah ka lung a kim zet; a thu nan ngai pei” tiah Vancung ihsin a Pa ih aw a thang asi ti kha Mt 17:5 ah kan hmu. 
• Bawipa in a zirhmi thlacamnak sungah “vancung ih a ummi kan Pa, na hmin thianghlim sehlaw; na uknak ram thleng sehlaw; vancung ih na duhnak a kim bang tukin hi leitlun khalah run kim ter aw” tiah Mt 6:9-10 ah kan hmu asi. “Pathian ih duhnak cu Bawipa Jesuh in a tlenmi milai pawl khalin thlun ve hram seh” tiah thlun theinak thazaang dil dingah thlacam in zirh asi. 
• Milai kan sinak ah famkimlonak, ttawnttainak kan nei cio ih Pathian ih duhnak thlun nawnlo in mahih pumsa duhnak lamah kan pan ttheu. A cancan ah “veikhat te maanah, voikhat voihnih cu ziangzo a poi lem” tiah kanmah le kanmah a khuan kan pek ttheu hi a poi zetmi ah a cangih tukforhnak neh banlo ah kan cang tata. Bawi Jesuh tla a rinrawng zet lai ah rawl thawn tukforhnak a tong nain “Milai ih nunnak cu rawl lawngin asilo. Pathian ih hmurka ihsin a suakmi tongkam thawn asi sawn” tiah Satan ih tukfornak cu a neh asi tiah Mt 4:4 ah kan hmu thei. Kannih sisehla kan rilrawng zet lai ah “aiyaa, van tthat, tawk deuh lai, lungawi um in” tiah kan ti men thei. In ding neilo, ei ding neilo rilrawng zet caan ah mahih zumnak le Kohhran hmanah tlansan in rawl pe theitu Kohhran lamah pantu tuurual hlo tampi an um asi. Bawipa Jesuh vekin rawl ih tukforhnak neh thei dingin zuam kan ttual asi khah. 
• Bawi Jesuh in Gethsemane hmuan sungah thla a cam lai ah a tuar dingmi mangbagnza harsatnak pawl cu a Pathian sinak in a hmu cia tikah a lau tukih “Maw ka Pa, a cang thei asi ahcun hi tuarnak kuat-hai ihsin i luat ter hram aw! Asinain ka duh vekin si lo in na duh vekin si ko seh” tiah thla a cam asi ti kha Mt 26:39 kan hmu thei. Pathian ih thu kan thlun theinak dingah thlacamnak kan nei ringring a ttul; tukforhnak kan pahsuak theinak dingah teima zetin thla kan cam a ttul ringring asi ti thu in zirh. 
• Bawi Khrih ah duhdawt zetmi u le nau pawl, Pathian ih thu kha kan thei ih kan tuah suak lo ahcun nelrawn parah sakmi inn vekin asiih kan theimi vekin kan thlun suak, kan tuah suak asi ahcun lungpi parah dinmi inn vekin a fek asi tiah Bawipa nih tuihni kan siarmi a ttongkam ihsin in zirh. “Pathian ih thu kan thei nain kan tuah suak lo ahcun mah le mah bum awnak asi. Kan theimi Pathian ih thudik kha tuah suak ding kan si asi” tiah James bung 1:22 ah in zirh asi. 
• Bawipa Jesuh in “zokhal sisehla Vancung ih a ummi ka Pa ih duhnak a tuahtu hmuahhmuah cu ka nu, ka u le ka nau pawl an si” tiah Mt 12:50 ah fiang zetin in zirh asi. Bawi Jesuh in thu zirh a ttheh tikah misenpi lakih nunau pakhat in “a lo hringtu le a lo tuamhlawmtu nunau cu mithluasuak a va si so” tiah a ti ih Jesuh nih cun “Pathian ih thu a thei ih a thlun suak taktak tu pawl cu mithluasuah ansi sawn” tiah Luka 11:27-28 ah Pathian ih thu thlunnak a thupi zia in zirh fiang asi. 
• Bawipa Jesuh vekin siseh, Bawinu Mary le thianghlim Joseph vekin siseh, vancungmi pawl le prophet thianghlim pawl vekin siseh, mithianghlim pawl vekin siseh Pathian ih thu le duhnak pawl kan thlunsuak theinak dingah Pa Pathian in zuam theinak thazaang thluasuah in run toih hram seh. Amen.