Pathian ih mithmai ttha kanhmu theinak dingah (February 19, 2021)

Pathian ih mithmai ttha kanhmu theinak dingah

Thuthangtha sim tu Rev. Fr. Joseph Ro Nei Thang

February 19, 2021 (Friday after Ash Wednesday)

Siarding: Isaiah 58:1-9; Ps 51:1-2, 3-4, 16-17;  Mt 9:14-15.

          Bawi Khrih ah duhdawt zetmi nu le pa, u le nau pawl, tuih hrawngih kan Kawlram hi boruak tthalonak thawn a khat ringring ih kan thinlung hi buainak le thinbangnak thawn a khat, cun kan hna tla a ngam thei dah lo. Curuangah u le nau pawl “nan zate ih parah Jesuh Khrih pekmi hnangamnak um hram seh” tiah thla za ka run lo cam sak hai. Tuihni cu 2021, February thla 19, Vutcam culh hnu Tlawngkai ni 5 ni asi. Tuihni ih kan siar dingmi Bible pawl cu Isaiah 58:1-9; Ps 51:1-2, 3-4, 16-17. Sam a sawn:- “Maw Pathian, tangdornak le a kekkuaimi sualsirnak thinlung cu na hnong lo ding” tiah asi. Thuthang ttha ah Mt 9:14-15 tiang pawl ansi pei. Tuihni ih kan ruah khawm tlang dingmi cu “Pathian ih mithmai ttha kan hmu theinak dingah” tiah asi pei. 

          Duhdawt zetmi u le nau pawl, Ulh caan asilole vua tikcu caan ahcun thlacam zuam sinsin ding, rawl ulh ding, duhdawtnak le zaangfah zawnruahnak nei in a hlu peknak lamah zuam sinsin ding kan si asi ti thu pawl tla hi Catholic Kohhran nih in zirh asi tiah Vutcam culhni lole vua luhni ah kan thei zo asi. Curuangah tuihni ih siarmi Bible pawl kan zoh sal tikah rawl ulhnak thu, tangdornak le thinlung kekkuainak thawn sualsirnak thu pawl hi ansi. Tuihni kan siarmi Bible a voikhatnak cu a dikmi rawl ulhnak tiah a thulu rengreng ah a um asi. Isaiah 58:6-11 ah “Kei ih ka duhmi rawl ulhnak cu thircikcin bangih nan mihremnak le kawn vekih mi a delhtu a hmanlo in mi nan tuahnak pawl hi hlon ttheh uhla nan hremmi pawl hi luat thlang hai seh. Nan ti le rawl cu mi thawn ttawm aw uhla nan inn tla cu inn neilo mifarah pawl hrangah ong uh. Hnipuan hruk ding neilo pawl hnenah nan hnipuan pek uhla nan sungkhat bawm ding tla el hlah uh. Cutikah ka tleunak cu nan parah zinglam nisuak bangin a tlang dingih nan hma tla cu zamrang zetin a dam ding. Nan hnenah ka um ringring dingih ka lo run ding. Nan hnenah ka um ruangah nan him ding. Thla nan cam tikah ka lo let ding, in kawh tikah ka lo sawn ding. Mi nan hremnak hi nan hlon ttheh ih mi nan hmuhsuamnak le nan ttong tthalo pawl nan cemter lawng silo in rilrawngmi pawl an pum nan puarter, mitlasam pawl an ttulmi nan pek asi ahcun a lo kulhtu khuathimnak hi sun nitleu ah a cang ding. Cule ka lo hruai ringring dingih leitlunih thil ttha pawlin ka lo kimter ding. Ka lo damter dingih ka lo cakter ding. Tidai tam zetmi hmuan bangtukin nan si ding. A kang dahlomi ticawm bangtuk nan si ding” tiah Bawipa in a ti tiah kan siar asi. Himi a dikmi rawl ulhnak sungah rawl ulnak, hremnak a phunphun tuartu pawl luat ternak, kan ti le rawl pawl kha miharsa pawl ttawmnak, hnipuan neilotu pawl hnenah hnipuan zemnak pawl an tel asi. Rawl kan ulhih neta caan ah kan ei sal ding ah ret sung asi lo. Kan ulhmi ti le rawl kha midang va tthen ding sawn asi. Cumi pawl cu zaangfahnak hnattuan, karuna hnattuan pawl an siih tuih ulh caanah a cuangce in ttuan dingah Catholic Kohhran nih in zirh. Zaangfahnak hnattuan kan ti tikah phun hnih an um asi. Cumi pawl cu thlarau lam zaangfahnak hnattuan le ruang pumpi lam zaangfahnak hnattuan tiah ansi.

Thlarau lam zaangfahnak hnattuan ttha pawl tla cu

1> Misual pawl nun simnak,

2> Mimumal lemlo pawl thudik zirhnak,

3> Zumnak nei mal mi pawl hnenah ruahnak ttha peknak,

4> Riahsia lungkuai mi pawl hnemnak

5> Kan hnenih a ra thlengmi tthatlonak pawl parah thinsaunak thawn tuarnak,

6> Kan parih sualnak a tuahtu pawl ngaidamnak le

7> Mithi le minung pawl hrangah thlacam saknak pawl tla ansi.

Cun ruangpumpi lam zaangfahnak hnattuan ttha pawl cu

1> Rilrawngmi pawl hnenah ei ding rawl peknak,

2> Tihaalmi pawl hnenah in ding tidai peknak,

3> Hnipuan neilomi pawl hnenah sinfen ding hnipuan peknak,

4> Thawngtla pawl vehnak,

5> Inn neilo vakvai mi pawl hnenah umnak hmun inn peknak,

6> Mina pawl vehnak le

7> Mithi pawl vuinak pawl tla ansi. Tuihni ih kan siarmi Prophet Isaiah 58 sung ihsin a dikmi rawl ulhnak kan tuah thei asi ahcun Pathian ih mithmai ttha timi thluasuah kan co ding asi.

Cumi Pathian ih mithmai ttha timi thluasuahnak pawl cu

1> Pathian ih tleunak cu kan parah zinglam nisuak bangin a tlang ding,

2> Pathian in kan damlonak kan hmaa pawl tla zamrang zetin a damter ding,

3> Pathian cu kan hnenah a um ringring ding,

4> Pathian nih in rundam hai ding,

5> Pathian nih in himter ding,

6> Kan thlacamnak pawl tla Pathian nih in cohlang ding,

7> Pathian nih thluasuah in pe ding tiah Pathian nih thu in kam asi. A dikmi rawl ulhnak tuah zuam ringring uhsi. 

          Bawipa Jesuh Khrih nih in zirhmi rawl ulhnak thu cu Vutcam culh ni ah kan siar zo, kan hmu zo nain tuihni kan siarmi thawn pehtlaihnak a um ruangah kan nolh sal ta ding. Mt 6:16-18 ah Bawipa Jesuh in miburpi hnenah “rawl nan ulh tikah mititeraw pawl vekin riahsaitnak mithmai thawn um hlah uh. Mihrekkhat cu rawl an ulh ti kha mi hmuahhmuah nih in thei hai seh tiah an mithmai in an langter. Fiang tein ka lo sim: an ngah dingmi an tthatman cu an ngah ttheh zo asi. Nannih cu rawl nan ulh tikah nan hmai phiah in nan sam tla ttha tein hriat uh. Cuti cu zo hmanin nan rawl ulh kha an lo theilo dingih mit ih hmulo nan Pa lawngin a lo hmu ding asi. A thupte ih nan tuahmi a hmutu nan Pa in tthatman a lo pek ding asi” tiah in zirh asi. 

          U le nau pawl, kan thlacamnak pawl cu rawl ulhnak thawn kan bet a ttul hrih asi. Kan rawl ulhnak tla cu zaangfahnak hnattuan ttha ttuannak thawn kan bet a ttul hrih asi. 

          Nan zate in Pa le Fapa le Thiang Thlarau in thluasuahnak lo pe sehla humhimnak tla lo pe ringring seh. Bawipa nih lo um pi ringring hram seh. Amen.