Pathian ih rawngbawl tu nupa pawl (May 21.5.2020)

1Cuih hnuah Paul cu Athens ihsin a feh ih Korin khua a thleng. ²Cutawkah Pontus ramih a suakmi Judah mi Aquila a tong. Aquila cu a nupi Prisilla thawn Italy ihsin a ra tlanmi an si. Ziangah tile Rom siangpahrang Klaudius in Judah mi hmuahhmuah cu Rom khua ihsin a dawi ruangah an tlan. Paul cun a va tong hai ih, ³an hnenah a caam ih anmah thawn hna a ṭuan. Aquila le Prisilla cu puanthlam tuah in pumcawmmi an si ih anmah vekin Paul khal puanthlam tuah in a pum a cawm aw ve. ⁴Sabbath nitinte in sinakok ah Judah mi le Grik mi pawl an thinlung fiangter dingah thu an ruah aw, an el aw ṭheu.

⁵Masidonia ihsin Silas le Timote an ra thlen tikah Paul cu a tikcu neihmi hmuahhmuah in Pathian thusimnak ah a hmang ih Jesuh cu Messiah taktak a si tiah Judah mi hnenah a sim ciamco. ⁶Annih in Paul cu an engtai ih ṭong siava tla in an leh tikah Paul in a lungkimlonak langternak ah a hnipuan ih leivut kha a thinta ih, “Nan hloral a si ahcun nanmah ih mawh a si ding! Kei i mawhthluk hlah uh! Atu ihsin Zentail mi hnenah ka feh ding!” tiah a ti. ⁷Curuangah a feh ih Zentail mi Titias Jastas an timi pa inn ah a um; Titias Jastas cu Pathian a biatu a si ih a inn cu sinakok kiangte ah a um. ⁸Sinakok uktu upa bik Krispas khal a sungkhat pawl thawn Bawipa an zum; cule Korin khuami tampi tla in Pathian thu cu an thei ih an zum ruangah baptisma an lak.