Pathian ih ta maw khuavang ih ta? (sim tu Rev. Fr. Dominic Hnin)

Pathian ih ta maw khuavang ih ta?

Thuthangtha sim tu Rev. Fr. Dominic Hnin

Zarhkel (32) nak, November 10, 2020, Nihnih ni

Siarding: Lk. 17:7-10

            Fimthiamnak ca-uk cu Khrih suahhlan kum zakhat (BC 100) hrawng ah Egypt ram, Alexandria Khua pi ih rak nganmi a si ih Greek tong in an rak ngan. Himi ca-uk cun sualhrampi thu le thih hnu ih nunnak thu in sim. Hivek ih thihnawnlonak thu, kumkhuanunnak thu pawl hi kannih Khristian pawl kan thih ih kan phumawk caan ah kan siar tam in kan rel tam theu. Kan siarnak ih kan hmuhmi "a ra len caan" timi cu ni netabik thuqhennak ni khi a sim duh mi a si. Khatlam zawng ih kan rel a si le Pathian ih hnatuannak, kan thih hnu ih Pathian ih thuqhennak a si. Mei tleu cu ziang si pei a sim duh san? Kan siarmi Bible catlang hi Daniel 12:3 sung ta thawn kan zoh tlang a si le mei tleu ti ih sullam kan hmu in kan thei thei ih cu cu nehnak ih hmuithlam pawl, langnak pawl an si.

            Israel miphun pawl cun runtupa Messiah a rat tik ahcun Israel miphun pi in miphun dang hmuahhmuah tlun ah thuneihnak a nei ding ti ah an zum in an pom. Kan siarmi sung ih a sim duh bik mi sawn cu Israel miphun ih thuneihnak hnak in miding pawl cun mi depde le misual pawl parah nehnak a co nak thu a si sawn.

            Pathian in minung cu amai hmuihmel keng in in tuah ih siatral theilo dingin in tuah. Asinan, khuavang ih nahsiknak ruangah thihnak cu leilung ah a lut ih khuavang thawi pehtlaihtu pawl, khuavang ih milai pawl in cui thihnak cu an tep in an tuar a si. Himi kan Bible ih "thihnak" a ti mi hi "misual" pawl lawng ih hmuhton ding a si ruangah, taksa le ruangpi ih "thihnak" si loin thlarau ih "thihnak" a rel duhmi a si sawn ti a lang fiang.

            Kan bible in "khuavang ih nahsiknak" ti in a hmang ih cumicu Semtirnak ca-uk, (Gen 3; 10:1; Sir 5:23 ih kan hmuhmi "tlaksiatnak" khi a khihhmuh a si. Adam cu Pathian ih hmuihmel keng ih tuahmi a si ruangah le sersiammi hmuahhmuah parih thuneihnak a neih ruangah khuavang cun a halhsik ti a fiang.

            Minung cu thihnak zinzawh kan si tikah Pathian ih milai kan sinak, a hmuihmel kan kennak pawl cu a lak ah maw an can thluh, ti ih ruah ding a um. Kan pipu ro, Adam le Eve ih tlaksiatnak ruangih kan co mi ro an si. Cu lawng si lo in himi zawn ih "Pathian ih ta maw khuavang ih ta, thihnak le nunnak " timi hi kan lei tisa ih nunnak le thihnak hnak in kan thlarau ih thihnak le nunnak khi a sim duhmi sawn a si. Curuangah lei tisa ih thihnak cu mi-aa pawl, khuavang ih milai pawl, ih hmuhnak ahcun thihnak le hloralnak ti in an hmu nan a dingmi thlarau hrang ahcun kumkhua ramdaihnak lam an pan a si sawn, ziang ah ti le an thlarau cu Pathian ih hnen ih a um ruangah a si.

            "Miding pawl ih thlarau cu Pathian ih kut sungah a um" ti ah kan Bible cun a rel.  Deu 33:3 ahcun "Bawipa in a minung pawl cu a duhdawt ih, Amah ih ta pawl cu a humhim a si." ti-in siseh, Is 62:3 ahcun "Bawipa ih kut sungih sunlawinak lukhuh na si ding" ti ih a ti vek in Pathian ih humhim an si ding thu a sim.

            Hi thu pawl kan zoh khawm, kan khaikhawm tikah Pathian ih thuthennak caan ni netabik ni ahcun Pathian a tihzahtu miding pawl le mitha pawl cu Pathian ih humhimnak ngah in misual, mi thalo le mi depde pawl ih parah nehnak an co ding ti a si. Curuangah Saam hla kan sakmi khal ah a dingmi thlarau pawl ih thlacamnak au-aw, Pathian thangthatnak au-aw kan hmuhnak a si.

            Thuthangtha kan siarnak ih kan hmuhmi thuqhimnak cu kan Bible sungah hmun dang ah hmuh ding a um lo, amah Luke lawng in a hmang. Himi tahthimnak in biaknak lam hruaitu pawl ralrinnak in pek. Ziangah ti le kannih pawl cu Pathian ih hnatuantu men kan si ih bawi kan si lo.

            Luke ih nganmi thuthangtha cu - total dedication - an timi pekawknak pumhlum ti khal in an ko pahah theu. Ziang ah ti le zokhal Pathian ih parah mawhthluknak le thuthennak a tuh theitu kan um lo, a thupek mi le a khuakhannak pawl thlun ding, tuah ding le famkimter ding fang kan si.

            Hnen-um thu a rel sal lala. Asinan Luke 12:35-37 sung ahcun ralring ringring ih um dingah hnen-um pawl cu thucah an si. An bawipa ih rat caan an theih lo ruangah tim tuahcia ih ralring ding an si thu kan  hmu. Tuisun kan siarmi Bible ahcun "ralring uh" timi tongfang a hmang lo na-in, hnenum ih hnatuan umtudan a rel. Hnen-um ih hnatuan cu fiang te in a pho suah duh ruangah a si bik. Lk 22:24-27 ah Bawipa Jesu cu hnen-um, siahhlawh dinhmun in kan hmu ih Luke 23:6-25 sung khalah Jesu cu kan hrangih harsatnak tuartu Siahhlawh - miring tong in - the suffering servant - ti in kan hmu. Jesu ih kan hrangih a tuarnak le kan rundamnak hrangih Pathian a rian nak thu langter duh le pho suak duh ah a si.

            Biaknak lam hruaitu pawl cu Pathian ih Lo a thlawh sak tu, Pathian ih hnatuan an si vek in Pathian ih sabit hmuan a simi a Kohhran ah tha te ih hna tuan ding in le Pathian ih tuurun asimi a Kohhran cu tha te ih zoh ding in a forhfialnak a si.

            Hitivek ih Pathian hna an tuannak ah mah le mah zohsang awk ding a um lo, porh awk ding a um lo, uansuan awk ding a um lo, kan tuah, kan tuan ding hrimhrim a si.

            Ni netabik ni ah Pathian ih humhim kan si theinak dingah le nehnak co tu kan si theinak dingah Pathian ih fa kan sinak ihsin a rah suakmi kan hnatuan, Pathian fa ih ziaza, cu dingfelnak thawn nun pi thei zuam cio uh si.