Pathian ih thil khuakhannak (sim tu Rev. Fr. Joseph), March 5, 2021.

Pathian ih thil khuakhannak

Thuthangtha sim tu Rev. Fr. Joseph Ro Nei Thang

March 5, 2021, Homily for Friday of Lent (Week 2)

Siarding: Semtirnak 37:3-4, 12-13, 17-28; Ps 105:16-17, 18-19, 20-21; Matthew 21:33-43, 45-46.

            Bawi Khrih ah duhdawt zetmi nu le pa, u le nau pawl, “kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak pawl cu nan zate thawn um hram seh” tiah cibai ka run lo buk. Bawipa in hnangamnak le cah damnak lo pe hram seh tiah tla nan zate hrangah thla za ka run lo cam sak hai. Tuihni cu Vua tikcu Kar hnihnak ih Tlawngkai ni 5 ni, 2021 March ni 5 ni asi. Tuihni ih kan siar dingmi Bible pawl cu Semtirnak 37:3-4, 12-13, 17-28 tiang; Ps 105:16-17, 18-19, 20-21 tiang; Saam a sawn:- “Bawipa ih mangbangza thil tuahmi pawl cu ciing ttha uh” tiah asi pei; cun thutthang ttha ahcun Matthew 21:33-43, 45-46 tiang pawl an si pei. Tuihni ih kan ruah khawm tlang dingmi cu “Pathian ih thil khuakhannak” tiah asi pei. 

            Tuihni kan siarmi Bible a voikhatnak ah Jacob in a fapa 12 lak sung ihsin Joseph kha a duhdawt cuangnak thu, a duhdawt cuangnak kha langternakah angki fual, bansau ttialpi pakhat a pekih a unau pawlin cumi ruangah an iksik, an huat, duhdawtnak thu hman an sim lo theilonak thu, cun a pa Jocab in Joseph kha a unau pawl va hliahhlai dingin a fialnak thu, a unau pawlin an naupa an hmu tikah duhdawtnak thawn an hmuak lo ih huatnak thawn an hmuakih a thah hman an tumnak thu, Reuben in an naupa cu thatlo dingin ruahnak a peknak thu, cun Judas in sumdawng Ishmael mi pawl hnenah Joseph hi zuar dingin thu a ronih a u le nau pawlin an lungkim ruangah Joseph cu sumdawng Ishmael mi pawl hnenah tangkam 20 thawn an zuarnak thu pawl kan hmu thei asi. 

            Joseph ih thuanthu kan ruat tikah Jacob in nupi pali a nei ih Joseph cu a pa in a duhdawtbikmi a nupi Rachel thawn an nei mi asi. Joseph in naupa Benjamin a nei. A nau Benjamin a suak ttheh ve tein a nu Rachel in a tansan. Nu ih tansanmi le kum upa hnu ih neihmi an si ruangah a pa Jacob in Benjamin le Joseph te cu a duat cuang. Joseph tla cu mifim zetmi asi ih a pa Jacob in a duhdawt sinsin. A u le pawlih huatsuak daan tete pawl kha a pa hnenah a va sim ttheu ih a pa in a fapa pawl cu a kawk phahphah ttheu tikah Joseph ruangah asi tiah a u le pawlin an thei tikah Joseph parah an lungawilo sinsin. Betbet ah a mang manmi pawl kha a nu le pa, a u le nau pawl a sim ttheu ih mang mantu saya pa tiah an zen ttheu asi. Tuihni kan siarmi Bible ahhin Joseph an zuarnak thu kan hmu. Minung rori hi thilri vekin sal ah an zuar asi. Asinain kha tin an zuarnak hi Pathian ih khuakhannak asi tiah tuihni kan siarmi Saam hla ah kan hmu thei. Saam 105:16-17 ah “Bawipa in an ram sungah paampi a tlunter ih an rawl hmuahhmuah a lak ttheh tikah sal ih zuarmi Joseph cu hmai ah a rak thlah sung asi” tiah kan hmu thei. Joseph kha Egypt ram ah a nu le pa, u le nau pawlih hmai ah Bawipa in a thlah sung asi ti kha zo-inso a ruat dah ding? A u le nau pawl in huatnak thu ruangah an zuarmi an naupa cu anmah runtu ah a cang ta si. Cun cutin a can theinak dingah Joseph par ih thil cangmi pawl cu zawh ol tak zetmi, thlun ol takmi thil a um lo. Sal dinhmun in caw vekin an khor, an khua le ram ah an thlen tik khalah mah duhduh in a um thei nawnlo, thil ti sualnak a nei tik ramsa vekin an hrem bet thei.

            Tuihni ih Saam hla sungah Ps 105:18 ah “A ke cu thir cikcin in an ttem, a hngawng ah thir kual an thlaih” tiah a thu kan hmu. Asinain Bawipa in Joseph cu thluasuah a pek vivo ih a thil ti nak poh ah hlawhtlinnak a ngah ttheu. Sumdawng Ishmael pawlin Joseph cu Potiphar hnenah an zuar sinih cunah cu rinsan tlak zetah a cang. Fel zet le sor zetmi ah a cang. Tlangval pek hrawng asi ih a hmel mawinak le a thil ti theinak pawl ruangah Potiphar ih nupi in a uarih Ih pi ding tiangin sual a sawm. Asinain cumi sualsawmnak cu a neh. Joseph in a boss ih nupi thawn a phoh pyan lo. Potiphar ih nupi in Joseph cu a sual sawmnak kha a awngmyin lo tikah amah tu sawn kha sual a puhih Joseph cu thawng ah an thlak. Miding pa cu sualpuh a tuarih thawngah khum a tuar. Tuih san ah tla thil dik thu ruangah thawng tla tu mi tampi an um. Joseph cu Pathian ih humhimnak le thluasuah cotu asi ruangah thawnginn ah thleng hman sehla zo poh in tla amah an rinsan. Pathian pakhat parah titsa neitu asi ruangah Pathian in a kilkhawi ringring asi. Pathian ih khuakhannak le bawmnak thawngin thawngtla mi 2 ih mang a let sakih a lehmi vekin a cang ngaingai. Cuih hnu ah siangpahrang Pharaoh rori in mang a man ih Egypt ram sungih fimnak a phunphun neitu pawlin a mang an let theilo ruangah Joseph cu an va ko. Joseph cu thawng ihsin luatnak a ngah. Siangpahrang hmai ah a thleng cu Pathian ih khuakhannak asi. Pathian ih mangbangza thil tuahmi asi. Siangpahrang ih mang cu dik le hmaan zetin a leh thei ruangah Joseph cu mangbangza in khaisannak a ngah asi. Joseph rori in tla cumi cu a ruat dahlo mi asi.

            Siangpahrang Pharaoh ih thupek vekin Joseph in kum sarih sung rawl retnak gudawng tumpipi tampi in a sakih cumi pawl sungah rawl pawl cu a khawlter asi. Egypt ram sungah kum sarih sung cu patthatnak thawn an khatih cumi caan sung ah rawl tampi an lei ih gudawng sungah an khawl cia asi. Cuih hnu ah kum sarih sung paampi a tlung sal. Patthat kum lai ih an nuam zia cu hngilh ta riei ansi ih a tu ahcun harsatnak an tuar taktak asi. Cumi paampi tlunnak ruangah Joseph ih pa Jacob te innsungsang tla ei ding an nei nawnlo. Asinain Egypt ramah rawl a um zia a thei tikah a fa le pawl rawl va lei dingah a va thlah. Joseph in a unau pawl an rat kha a thei nain a hniksak hai ih neta ahcun amah le amah Joseph asinak cu a phuang. A u le nau pawlin an ttih, an lau tukih an va biak ngamlo. Cutikah Joseph in “I rak naih deuh uh” tiah a ti ih an hei naih tikah Joseph in “Egypt ramih nan rak zuarmi nan nau Joseph kha ka si. Asinain hi ramih in zuar ruangah nan riahsia in mawhthluk aw rero hlah uh. Minunnak run dingah hi tawkih i thlentertu ngaingai cu Pathian asi. Nan tefasin tiang an nun theinak dingah nan hlanah Pathian in i thlenter asi. Mi tampi ka run theinak dingah le nanmah tla nan nun theinak dingah thlahmi ka si. Curuangah hitawk ram ih i thlenter tu ngaingai cu nannih nan silo, Pathian asi sawn” tiah ati. Joseph in amah a zuartu a unau pawlih thil tinak cu a relsia lo ih Pathian ih mangbangza khua khannak asi tiah Pathian a fak asi.

            U le nau pawl, Joseph ih nunnak thuanthu ihsin kannih tla kan nun sungah mangbangza Pathian ih khuakhannak cu a ra thleng ttheu ding asi. Asinain kannih tla Joseph vekin Pathian ih khuakhannak cu hmu thei ttheu uhsi, thei thiam ttheu uhsi. A cancan ahcun Pathian ih khuakhannak cu thei thiam a har. Hniksaknak le harsatnak a ra hmaisa tengteng ding; sihmansehla harsatnak ih dung ahcun Pathian ih tumtahnak le khuakhannak cu a um ringring asi. A tu ah Kawl ram sungih thil cangmi pawl dung ahhin Pathian ih khuakhannak a umlo asi tiah kan ti theilo. Pathian ih duhdan a um ding asi. Thei thiam uhsi, thin fual uhsi. 

            Nan zate parah Pa le Fapa le Thlarau Thianghlim in thluasuah malsawm lo toih hram seh. Amen.