Pathian ih thlawsuah sunglawi Paisa (sim tu Rev. Fr. Lucas Sum)

Pathian ih thlawsuah sunglawi Paisa

Thuthangtha sim tu Rev. Fr. Lucas Tha Ling Sum

November 7, 2020

Zumtu u le nau, Pathian in nan zaten a thar in thlawsuah lo pe hram seh.

Tuittum ah “Pathian ih thlawsuah sunglawi Paisa” timi thu thawi ten ruah tlang hrih uh si. Bawi Jesuh in ziangkim kan tuah le kan ttuan nak ah rinsan tlak kan si theinak dingin, a hleice in sum le pai thu ah rinsan um, kan si theinak dingin le leitlun sum le saw ruangah a mah kan dung tun lo nak dingin thu in zirh a si. Hmaisa ah Baibal ca tlang kan siar hrih pei. 

Matthai 19: 9 - 15. “Cule Jesuh in, ‘Cu ti a si ruangah  hitin ka lo sim: leilung tlun thil ri thawn rualpi tuah uh, ziangah tilen leitlung thilri a cem tikah kumkhua a hmun mi inn nuam ah luh ter nan si ding. Thil fate ih rin tlak a si mi cu thil tumpi khal ah rin tlak a si ding; thil fate thu ah zumtlak lo a si mi cu thil tumpi khal ah zum tlak lo a si ding.  Leitlun thilri nan tawl rel nak hman ah rin tlak lo nan si ah cun ziang tin so len nak taktak cu nan hnen ah pek nan si thei ding? Culen mi dang thliri par hman ah rinsan tlak nan si lo ah cun nan mai co ding mi ngai ngai cu zo in so a lo pek duh ding?

Mi pakhat cu bawi pahnih ih sal a si thei lo. Pakhat a hua dingih pakhat kha a duh ding; pakhat hnen ah rinsan tlak in a nung dingih pakhat tu cu a nau tat ding. Pathian le tangka cu nan rian tlang thei lo ding, tiah a ti.

Cui thu pawl cu Farasi mi pawl in an theih tikah tangka duh tu pawl an si hrangah Jesuh kha an hnih san. Jesuh in an hnen ah, mi senpi hmai ah cun mi ding bik ah nan lang aw ter; asinan Pathian cun nan thinlung a thei ttheh. Ziangah tilen mi nung in man nei zet ih nan ruah micu Pathian mit hmuh ah cun zianghman a si lo.” 

Zumtu u le nau, mitu ih Baibal kan siar mi thawn peh par aw in a pakhat nak ih kan ruah khawm dingih ka duh mi cu Pathian hmai le minung hmai ah rinsan tlak kan si maw, timi a si. Mitampi cu Pathian hnen ah vei tampi thukam kan tuah nan  tlun thei lo in kan um pang theu. Cun Pathian hnen lawngah silo in kan nupi kan pasal hnen khal ah thukam nak kan tuah theu nan tlun thei lo in kan um pang theu. A tawi zawngih kan sim asilen rinsan tlak lole zumtlak loin kan um pang theu. Curuangah Bawi Jesuh in nitin ih kan nunnak ah zum tlak le rinsan tlak kan si thei nak dingin tui ttum ah a thar in in sawm a si.

Cun a pahnih nak ah paisa hi Pathian ih in pek mi laksawng a si ih ziang tin kan hmang, timi ruat bet hrih uh si. Zumtu u le nau, Pathian in thlawsuah a phunphun in pe. Tthimnak ah a hrek cu zotthim tlak nu le pa in pe, a hrek cu fanu ttha le fapa ttha in pe. Cun a hrek cu mawinak le tthatnak in pe. Cun mi hrek khat hnenah lennak a in pe. Ttongdang ih kan sim asilen paisa in Pathian in thluah suah in pe a si. 

Asinan kan ralrin ding mi pakhat cu paisa hi a ttha bik le ttih a nungbik mi lak sawng a si, timi hi a si. Paisa hi ttha tei kan hman thiam a si ah cun kan nunnak a si. Asinan, kan hmang thiam lo a si ah cun kan thlarau thih nak tiang a cang ter thei a si. 

Bawi Jesuh in hitin ralrin nak in pe a si: “Mi pakhat cu bawi pahnih ih sal a si thei lo. Pakhat a hua dingih pakhat kha a duh ding; pakhat hnen ah rinsan tlak in a nung dingih pakhat tu cu a nau tat ding. Pathian le tangka cu nan rian tlang thei lo ding, tiah a ti.

Zumtu u le nau, paisa ruangah a dik lo le hman lo in hna kan ttuan pang maw? Paisa kan nei nan bomttul pawl bawm lo in kan um pang maw? Paisa ruangah Pathian teh kan dung tun pang maw? Bawi Jesuh in ralring tei um dingin in sim a si.

Sum le pai thu ah rinsan tlak zet ih kan um thei dingin zuam sin uh si.

Ziang kim kan tuah nak ah Pathian a pakhatnak ah re ciau uh si. 

Thuthangttha ngai tu nan zaten Pathian in thlawsuah lo pe hram seh. Amen.