Pathian ih thukam innpi (sim tu Rev. Fr. Dominic Hnin), December 20, 2020.

Pathian ih thukam innpi

Thuthangtha sim tu Rev. Fr. Dominic Hnin

Hngah caan Zarh linak, Zarhpi ni (December 20, 2020)

Siarding: 2Samuel 7:1-5, 8-11, 16; Ps. 89:2-5, 27, 29; Rom 16:25-27; Lk. 1:26-38.

• Hngahnak caan zarhpi netabik kan thleng thlang. Messiah hmuak dingin kanmah le kanmah tiim kan tuah awk caan a mal vivo. Tui a tanglaimi caan ah mah le mah rem tthatawk tum uhsi tiah ka lo sawm duh hmasa.

• Tuisun kan siarmi Bible pawl ah Pathian ih thu kam pawl kan hmu. Hmaisabik kan siarmi Bible ah Pathian in milai hrangih inn a saksak ding thu a kamnak kan hmu. Cun  Rome cakuat sungah himi thukam cu mi hmuahhmuah hrangah a si a ti. Cui thukam mi pawl famkimter dingah Thuthangttha sung ah runtupa ih suahnak ding thuthannak kan hmu ih cucu Pathian ih thu kam a si.

•  

• Tuisun kan siarmi Bible hmaisa, 2Samuel cauk sung ah, Siangpahrang David cun Pathian ih hrangah inn tthate sak a tum. Asinan amah Pathian in prophet Nathan thawngin a rawn dawn. Ziangah tile amah Pathian sawnin, milai hrangah inn a rawn saksak ding ruangah a si. Milai hrangah Paathian in inn a saksak ding ti cu ruah ngam cu a silo, hmanseh, milai khawkhan siloin Pathian ih khawkhan a sisawn.

• Cui Pathian ih khawkhan cu, tuisun a voi hnihnak ii kan siarmi Bible, Rom 16:25-27 sung ihsin cangantu Paul cun, "a sansan in thuh ringring a rak si mi thuthuk cu, netabik caan ahcun pholang a si ih cucu Jesuh ih suahnak ah a si" a ti.

• Asinan cumi Jesuh ih suahnak hi voi tampi cu mipi in kan rak co hlang lo ttheu. Ziangah tile kan ruahnak le Pathian ih khawkhan daan a bangawklo ruangah a si.

• Pathian ih miphun asimi Jew miphun pawl in Messiah cu a suah ihsin mi cungcuang a si ding ti ih an rak ruah lai ah, Messiah cu a maksak mi tangdornak thawn, Bethlehem ihsin a rat tikah Jew pawl in an rak cohlang lo. Messiah a rat hlanah Elijah a ra hmaisa dingih ralrinnak in ra pe ding ti in an ruat ih Elijah ih "ralrinnak petu" hnattuan cu John ih "lam sialnak" thawn a ra zo ti an rak hmuh thiam lo tikah an rak cohlang lo.

• Himi ihsin "fimnak" kan lak dingmi cu "na ruahnak vek in si lo-in Pathian ih khawkhan daan vekin Messiah cu a ra ding" ti hi a si.

• Asile, kan Bible sung ihsin in simmi Pathian ih khawkhan cu ziangvek in a um?

• Pathian in a vancungmi Gabriel cu Galilee ram, Nazareth timi khawte ah, amah ttihzahtu falahim Mary ih hnenah a thlah hmaisa. Hmuihmel le ruangrai zoh ttheitu milai pawl ih hrang ahcun, Mary cu a soisel ding kan hmu tampi men ding. Asinan Pathian cun a pawnleng hnak in thinlung sung a zoh. Curuangah Pathian ih hrang ahcun Mary cu a tling tlak tinak a si.

•  

• Jew pawl ih hrang ahcun Judea ram hi an nunphung le an sakhua ih hmun laidir a si, an nunphung le sakhua hrangah Judea hnak ih thupi a um lo. Cu laifang ah Pathian ih khawkhan in Jew pawl cu Judea ram ihsin Galilee ram ah a rak hruai ii cuihmun ah "thuthannak" a rak tuah.

• Vancungmi in Mary hnen ih thu a rawn thannak ah (1) Vancungmi Gabriel cu Mary hnenih a langnak, (2) Mary ih a rak theih thiamlo le a mang a rak bang nak, (3) thu thanmi nemhngetnak hrangih hmuhsaknak, (4) Naute ih sinak relfiangnak ti in kan zoh thei.

• Pathian in mipi pawl hnen ih thu sim a duh tikah prophet pawl a rak hmang ttheu ti kan thei. Cun voi hnih khat ahcun an zan mang ti vek ah Pathian in khih hmuhnak a rak pe. Asinan tu ahcun amai Vancungmi rori a thlah. Hiti ih fialnak in Pathian ih khawkhan cu ziang tluk in a thupi ti a langter.

• Vancungmi in Mary hnen ah "na parah daihnak um ko seh, Bawipa cu na hnenah a um ih thluasuahnak tampi a lo pek" a ti. Hivek ih "Bawipa na hnenah um seh" ti vek hi an rak hman phah ttheu. Thluasuah peknak ttongkam a si. Duh um zet ttongkam a si. Asinan Mary ih hrang ahcun thil thar, thu thar a si. A rak thei thiam lo. A khawruah hmuah a har thluh.

• Mary ih khawruah harnak cu Vancungmi cun zoh men lo-in thukam a pe bet. Naute na von ding ih fapa nah hring ding" ti ih a ti bet tikah Mary ih hrang ahcun a thupi sinsin. Pasal neih man thlang a si tikah, ziang tivek din hmun ah nau vawn a theih ti khal cu a thei. Mipa thawn um tlang lo in nau vawn a theihlo ti khal a thei. Curuangah "kei cu falahim ka si" a rak ti. Tiduhsan cu "mipa thawn kan um tlang dahlo, na simmi hi thil cang thei a silo" tinak a si. Himi ah Mary in Pathian ih khawkhan cu a rak el tinak siloin minung sinak ah thudung, thuhmai zoh in thu a rel a si sawn.

• Himi zawn ciah ah nulepa pawl hnenih thucah ka duhmi cu "kan fa kan nau pawl khi tawng mawhthluk ih mawhthluk lo dingin le thu umdan an rel mi khi ttha te in ngaisak ding in ka rawn sawm duh. Thu umdaan hman rel ngam lo ko kan tuah a si le an hmailam tthansonak ding hrangah dawnkhamtu a rawng cang thei. Thu umdaan sim thiam dingin zirh sawn uhsi.

• Mary in "falahim ka si, a cang theilo ding" a tinak cu vancungmi in "a cang thei" a ti. Cumi nemhngetnak ah vancungmi cun Elizabeth ih nau pai thu a sim. Elizabeth cu a kum a upa tukzo ih fa a nei thei nawn lo ti ih ruahmi a si. Asinan, a tar hnu ah nau a pai. Pathian in "mi cing" a sinak cu a damter ih nau a neiter. Pathian ih hrangah "a cang thei lo tivek a um lo." Khatlam ah, Elizabeth ih nau vawn cu "a cing nak" a damter nak men a si ih Mary ih nau vawn cu mipa tel lo in a si ruangah a thupi in a maksak hlei ce.

• Vancungmi in "minung ruangah si loin Pathian ih huham ruangah" ti ih a sim fiang tikah Mary khal cun Pathian ttihzahnak thawn "na simvek in ka parah thleng ko seh" a rak ti.

• Vancungmi in, hrin a si lai dingmi naute ih thu a rel tikah "Pathian ih Fapa," a ti, " Bawipa in David bangtukin Siangpahrangah a tuah ding" a ti. "A uknak a cem dahlo ding" a ti. Minung ttangneem ih rawng suak a bang nan, hnangamnak ttangneem a petu taktak cu amah a si sawn.

• Mary cu Pathian ttihzahtu a si ruangah "ee law" a ti thei. Asinan khatlam ahcun Joseph thawn nei aw ding in "ham zu" an put awk zo. Cutikah Joseph ih theih lo in nau a pai a si le lungto ih denthat ding tiangin Mary ih hrang ahcun a rap thlak. Pathian ttihzahnak le leitlun harsatnak timi a hmai ah retsak a si, a hril ding cu a mai ttuanvo. Mary cun Gabriel ih aw "ttih hlah" timi cu thei in le a nunnak thaap in "na sim vek cun ka parah si ko seh" a rak ti ngam. Pathian ka zum ti-ah kan ti ttheu nan "ka rawl ei ding a ttul sisi" ti-ah kan Pathian cu kan phatsan ttheu.

•  

• Mary bangin Pathian ih khawkhannak cu na nun ah "ee law" rak ti ve aw la na hrangih Pathian ih a rawn sakmi innpi, a cem dahlo mi a uknak ah na beu ngah ve ding.

•