Pathian ih Thukham 10 (sim tu - Rev. Fr. Joseph Ro Nei Thang) July 23, 2021

Pathian ih Thukham 10

Thuthangtha sim tu - Rev. Fr. Joseph Ro Nei Thang

July 23, 2021

Siarding: Ex 20: 1-17/ Ps 19: 8-11 (Jn 6: 68)/ Mt 13: 18-23

            Radio Veritas Asia Falam Chin service ah leitlun hmun tinkip ihsin thlarau rawl a zawh ringringtu Bawi Khrih ah duhdawt zetmi nu le pa, u le nau pawl, kan “Bawipa cu nanmah thawn um hram seh” tiah cibai ka run lo buk. Tuihni cu 2021, July thla ni 23, caankel kaar 16 nak tlawngkai ni 5 ni asi. Cun July thla ni 23 ni cu Sweden ramih St Bridget puaini asiih St Bridget ih hmin latu hmuahhmuah “Happy feast day” tiah ka run lo cibai hai. Tuihni ih kan siar dingmi Pathian ih Bible pawl cu Suahlannak 20:1-17 tiang le Mt 13:18-23 pawl tlan ansi pei. Tuihni kan ruah khawm tlang dingmi cu “Pathian ih thukham 10” tiah asi pei.

            Tuihni kan siarmi Bible a voikhatnak hi Pathian ih thukham pahra asi. Curuangah ah Pathian thukham 10 in ziangmi tuah dingah le ziangmi tuahlo dingah in kham timi pawl hi kan thei a ttul ngaingai asi tiah ka ruat.

  • Pathian thukham pakhatnak ahcun “Keimah cu Bawipa, na Pathian ka si; Keimah siarlo pathian dang na biaklo pei” tiah asi. Hi thukham number pakhat in Pathian lawng biak dingah ttuanvo kan nei asi. Pathian cu zumnak thawn siseh, ruahsannak thawn siseh, duhdawtnak thawn siseh kan biak pei. Hi thukham number pakhatnak in “Pathian pakhat lawng upat lo in le a diklo in kan biak tikah siseh, Pathian pakhat lawngih neimi thil famkim le thil ttha kha midang ah kan pe tikah sualnak a um asi. Thimnak ah:- Pathian lawng a famkimmi kha ‘kha pa cu a famkimbik’ kan ti tikah Pathian pakhat lawngih famkimnak hi kan hngilh cu cumi pa kha a famkim asi tiah kan ti tikah sualnak a um asi. Zumank thawn pehpar in Catholic Kohhran member pakhat hi Kohhran dang ah a tlansan tikah siseh, zumnak pakhatkhat parah a zumlonak parah siseh, a ttullo in daan dang pawlih biaknak ah a va tel tikah tikah sualnak a tuah asi. Ruahsannak pehpar in Catholic pakhat in Pathian parah ruahsannak nei nawnlo in a thin cem tikah le amah ruahnak menin thil a tuah tikah sualnak a tuah asi. Thutthimnak ah rundamnak hi amah zuamnak thawn a ngah thei ti le rundamnak cu mah zuamnak ttullo in Pathian in lawnglawng ruangah asi tinak asi. Duhdawtnak thawn pehparin Catholic pakhat in sualnak pakhatkhat a tuah tintein duhdawtnak parah sualnak a tuah asi. Pathian zuk le lem, Bawi Jesuh zuk le lem, Bawinu Mary zuk le lem, mithianghlim pawlih zuk lole milem pawl cu kan mitthlam ah cuanter in upatnak pekin thla kan cam hi asi. Cumi pawl tla thluasuah pek an ttul asi.
  •  
  • Pathian ih thukham pahnihnak cu “Bawipa, na Pathian ih hmin cu ziang siarlo le duhdah in na hmanglo pei” tiah asi. Hi thukham in Pathian le mithianghlim pawl le thianghlim thilri pawl le thianghlim thukamnak pawl hi upat dingah ttuanvo kan nei asi. Pathian ih hmin hi upat lo, kan duhduh in kan au, Jesuh Khrih hmin in tiah asilolo kan tuah tikah sualnak an um asi.
  •  
  • Pathian ih thukham pathumnak cu “Bawipa ih ni cu thianghlim tein nan ulh pei” tiah asi. Bawipa ih ni cu thianghlimter dingah le amah biak dingah ttuanvo kan nei asi. Hi thukham ih in khammi pawl cu a ttullomi hnattuan nak le Pathian ih ni hngiltertu sipuazi tuahnak pawl ansi. Zarhpini cu colhni tiah tla kawh asi ttheu ih Pathian tla a cawl vekin kannih tla cawl ding kan si. Zarhpini ah tthatnak kan tuah ding, mina veh ding, thlacam sak ding asi. Zuri sabahnak hrang le taksa nomnak hawl ding hrangah colh ding ni asilo asi.
  •  
  • Pathian ih thukham palinak cu “Na nu le na pa tla, upat aw” tiah asi. Kan nu le pa pawl hi duhdawt ding, tuamhlawm ding, cawm ding, kilkhawi ding, upat ding le an thusimmi pawl ngai dingah ttuanvo kan nei asi. Hi thukham in ram uktu le ram hruaitu pawl tla upat dingah in zirh asi. Cuhlei ah hnattuantu le hnattuan neitu pawl tla khat le khat upat awk dingah in zirh asi. Nu le pa pawl khallin fanau le pawl parah cawm ding, fim thiamnak pek ding le zumnak lamah picangter dingah zirh dingin ttuanvo an nei ve asi.
  •  
  • Pathian ih thukham panganak cu “Mi va that hlah” tiah asi. Hi thukham in kanmah le kanmah siseh, mi hmuahhmuah ih nunnak siseh kilkhawi dingah le kham dingah ttuanvo kan nei asi. Minung ih nunnak cu a thianghlim ih a sunglawi, ziangahtile Pathian ih hmuihmel vekin serhsiammi, fapa Jesuh Khrih ih rundammi, Thlarau Thianghlim ih umnak biakinnpi asi ruagnah asi. Himi thukham in a dinglo in mithahnak, kanmah le midang ih nunnak siat suahnak pawl in kham asi. Cuhlei ah abortion timi nu pum sungih nau thahnak, euthanasia timi zaangfah tuk ruangah mithahnak, suicide timi mah le mah thah awknak, direct sterilization timi a thu umlo in nau-inn hlonnak, quarreling timi hau awknak, anger timi thinhengnak, hatred timi huatnak, revenge timi rehrulkirnak, drunkenness timi zuri tuknak, drug addiction timi muyit say suainak, reckless driving timi siikaan neilo in motor mawnnak, bad example timi ziaza ttha hmuhnak pawl tla in kham asi. Mah le mah kham awknak ih mithah ngah pang tihi ngaidam um asi tiah in zirh asi.
  •  
  • Pathian ih Thukham paruknak cu “nu le pa sualnak na tuah lo pei” tiah asi. Hi thukham ah thianghlim tein um dingah le kan cangvai daan ah a ttha a sia tthleidan thiamin ralrinnak nei dingah ttuanvo kan nei asi. Tayawin lettthatnak siarlo nu le pa pawl awk lo dingin in zirh asi. Hi thukham in a balmi hmuahhmuah siseh, kan ttong daan, kan thil zoh daan, kan cangvai daan hmuahhmuah thianghlim dingah in zirh asi. Hi thukham in kwin ttaihnak, nupa sualnak, letthat hlan hmunkhat in um ih pawl awknak, innsang neicia pawl phohpyannak, fakhamnak, hlawhhlannak, mading kyinhnak, nu le nu+ pa le pa pawl awknak le umkhatnak pawl tla in rak kham asi.
  •  
  • Pathian ih Thukham pakuanak cu “Mi innsangpi tla na daw lo pei” tiah asi. Pathian ih thukham paruknak le pakuanak hi pehtlaihnak an nei asi. Hi thukham in kan hiarnak le kan ruahnak pawl sup tttentto dingah in zirh asi. Mah ih ta silomi hi long saklo ding, cuhnak in duhdawtnak nei in upat sawn ding asi.
  •  
  • Pathian ih thukham pasarihnak cu “Midang thilri va fir hlah” tiah asi. Hi thukham nih in khammi pawl cu fifirnak, mibumnak, midang ih thilri lak sak in thuhnak, midang ih thilri siatsuah saknak pawl tla ansi. Kan fir ngah pangmi thilri pawl hi pek sal dingah ttuanvo kan nei asi. Peksal a theihlomi pawl cu kuan sal ding kan si asi.
  •  
  • Pathian ih thukham pahratnak cu “Midang thilri tla va daw hlah” tiah asi. Pathian ih thukham pasarihnak le pahranak pawl hi pehtlaihnak an nei asi. Hi thukham in kan nei mi parah lungkim dingah le midang ih neimi parah lungawi dingah ttuanvo kan nei asi tiah in zirh asi. Hi thukham nih in midang thilri pawl parah hiarnak le dawnak neilo dingah le midang ih hlawhtlinnak parah tla iksik lo dingah in zirh asi.
  •  
  • Pathian ih thukham pariatnak cu “Thuphan va sim hlah” tiah asi. Hi thukham in ziang hmuahhmuah ah thudik sim dingah a bikbik in midang ih hmin thannak pawl simsiatlo dingah ttuanvo kan nei asi. Hi thukham in thuphan pernak, thu ruahnak neilo in thutthenak, thuthuhmi phuan saknak, midang relsiatnak, simlo dingin thukammi sim phuannak pawl hi in kham asi.
  •  
  • Bawipa ih pekmi thukham kan thlun thei cio nak dingah Bawipa Pathian in thluasuah in toih ram seh. Amen.

Add new comment

19 + 1 =