Pathian ih zaangfahnak vel (sim tu - Rev. Fr. Joseph Ro Nei Thang)

 “Pathian ih zaangfahnak veel”

Siarding: Efesa 1:1-10; Luka 11:47-54

          Bawi Khrih sungih duhdawt zetmi nu le pa, u le nau pawl “Kan Pa Pathian le Jesuh Khrih in zaangfahnak veel le daihnak lo pe hram seh” tiah cibai ka run lo buk hai. Tuihni cu 2020, October thla ni 15, Tlawngkai nilini asi. Cun October thla ni 15 ni cu Avila khua ih St Theresa ih puaini tla asi. Curuangah himi hmin latu pawl “Happy feast day” tiah cibai ka run lo buk hai. Tuihni ih kan siar tlangmi Pathian ih ttongkam pawl cu Efesa 1:1-10 tiang le Luka 11:47-54 tiang pawl tla an rak si pei. Tuihni ih kan ruah khawm dingmi cu “Pathian ih zaangfahnak veel” tiah asi pei.

          Tuihni ih Bible a voikhatnak cu “Pa Pathian ih lungkimnak vekin Khrih Jesuh ih tirhthlah keimah Paul in Khrih Jesuh thawn nan pehzom awknak ah rintlak ih a nungmi, Efesa khua ih a ummi mithianghlim pawl, nan hnenah hi ca hi ka lo kuat. Kan Pa Pathian le Jesuh Khrih in zaangfahnak le daihnak lo pe hram seh. Kan Bawipa Jesuh Khrih ih Pa le a Pathian cu thangtthat si ko seh! Ziangahtile Khrih thawn kan pehzom awknak thawngin kan thlarau hrang van thluasuah a phunphun kan hnenah in pe. Khrih thawn kan pehzomnak thawngin Pathian in kannih cu Amahih hmaika ah mithianghlim le mawhneilo si dingin leilung a serhsiam hlan hmanah amahih ta ah in rak hril zo. In duhdawt ruangah Pathian in Jesuh thawngin a fale ah in canter ding cu a lungawi zawng le a duh zawng in rem a rak ruat cia asi.

          A sunglawimi a zaangfahnak le a duhdawtmi a Fapa thawngin laksawng in pekmi ruangah Pathian cu thangtthat siko seh. Ziangahtile Khrih a thihnak thawngin kan sualnak cu ngaidam asi zo ih a luatmi kan si zo. Pathian in a zaangfahnak cu kan hnenah tam zetin in pek ruangah a zaangfahnak cu a va tum lawmmam so! Pathian cun a fimnak le a thuukmi a thuneihnak in a tumtah ciami cu a tuahsuak ih Khrih sungin a kimter a duhmi a thuthup cu kan hnenah a langter zo. Tikcu caan a kim tikah Pathian in famkim zetin a tumtahmi cu: van ah siseh, leilung ah siseh, siammi thil hmuahhmuah hi a finkhawm ttheh ih Khrih kha lubik ih ret dingah asi” tiah kan siar thei. 

          Himi kan siarmi Pathian ttongkam ah zaangfahnak timi hi voi tam nawn kan rak hmu. Mirang Bible kan siar tikah Falam Bible thawn malte an bang aw deuh lo. Mirang Bible ahcun grace timi a um; blessing timi a um, mercy timi a um. Khami pawl cu Falam Bible ah zaangfahnak tin an ti thluh hai asi.

          Falam ttong in zaangfahnak kan ti tikah mercy tla asi, grace tla asi, pity tla asi. Curuangah grace cu zaangfahnak veel tiah ka let duh. Zaangfahnak veel cu Pathian ih nunnak sungih ka va tel theinak asi. Grace is the participation in the life of God tiah Mirang ttong ih nganmi Catechism of Catholic Church ah kan hmu thei. Grace timi zaangfahnak veel cu Pathian ih tahtthim theilo mi laksawng asi. Pathian ih zaangfahnak veel cu Pathian nih a lakin in run pekmi laksawng asi, cun undeserved help timi kan tlak lo nain kan ngahmi bawmnak tla asi tiah in zirh bet asi. Zaangfahnak veel cu phun 2 a um asi. Pakhatnak ah “Sanctifying grace timi thianternak zaangfahnak veel asi”. Cun a pahnihnak ahcun “Actual grace timi bawmnak zaangfahnak veel asi.”

          Thianternak zaangfahnak veel cu Pathian ih nunnak kan hlawm ngahnak asi. Pathian in Adam le Eva te cu sentlung lei ihsin a serhsiam lai ah an hnar kua ihsin Pathian in nunnak thaw a pek dah asi. Pathian in nunnak a pekih cuti cun a nungmi ah a cang asi. Cumi nunnak cu kan ruangpumpi ih nunnak asi. Kan thlarau ih nunnak cu a nungmi Pathian in amah hmuihmel vekin in serhsiam asi (Semtirnak 1:26-27) ah kan hmu thei. Pathian cu thlarau lawng asiih kan thlarau ah amahih hmuihmel a kengmi kan si asi.  Kan thlarau in nunnak a nei ringring theinak dingah thianternak zaangfahnak veel kan hlo terlo a ttul. Adam le Eva te in Pathian ih nunnak pekmi cu an hloter. Pathian ih pekmi thianternak zaangfah nak veel cu an thlauter ih Eden timi nunnak hmuan ihsin dawi suaknak an tuar asi. Asinain Jesuh Khrih ih a thihnak le a thosalnak huham thawn Adam le Eve te hlotermi thianternak zaangfahnak veel cu in ngah sak sal asi. Thiang Thlarau a ttumnak thawngin zumtu pawlih nunnak ah Thiang Thlarau ih biakinn pi ah khoh hnget zetin thazaang a pek bet asi. Thianternak zaangfahnak veel cu sualnak kan tuah ngah pang asile a hlo thei asiih sualthlahnak ttha tein kan tuah sal asile kan ngah sal ding ttheu asi.

          Thianternak zaangfahnak veel pawlih tthathnemnak pawl cu 1> Pathian thawn pehtlainak nunnak kan ngah; 2> Sual hrampi ihsin luatnak kan ngah; 3> Thiang Thlarau ih biakinnpi ah in canter asi; 4> Kumkhua nunnak co theinak khuan kan nei asi. 

          Bawmnak zaangfahnak veel cu Pathian ih tahtthim theilomi bawmnak asi. Himi veel in kan comi thianternak zaangfahnak veel kan hlo terlonak dingah in bawm asi. Sualnak cu leilung tlunah a khat ringring ih rundamnak a cotu milai pawlin Pathian ih nunnak nei ringring dingah bawmnak an ttul asi. Thianternak zaangfah nak veel cu sualnak ruangah a hlo thei. Sual lo tein um dingah Pathian ih bawmnak kan ttul. A cuih Pathian in bawmnak cu bawmnak zaangfahnak veel asi. Bawmnak zaangfahnak veel in thianternak zaangfahnak veel cu a kilkhawi a kilveng asi. 

          Tuihni kan siarmi Bible kha ruat sal thlang uhsi. Pathian in a zaangfahnak thawn kan Bawipa Jesuh Khrih thawngin in rak hril asi. In hril sannak cu Pathian ih ro kha co dingah kan si asi. Cumi kan co theinak dingah nitin kan nunnak ah “mithianghlim le mawh neilo si dingin” leilung a sehsiam hlan hmanin nang le kei cu in rak hril zo asi. Curuangah mithianghlim le mawh neilo si dingin kan Bawipa Jesuh Khrih thawngin vancung thluasuah hmuah hmuah cu kan hnenah pek ttheh kan si zo asi tiah tuihni kan siarmi Efesa 1:3-4 ah kan hmu thei. Cun kan Bawipa Jesuh Khrih thawngin Pathian thawn pehthlaih theinak zaangfahnak tumpi tla kan co asi in ti. Khami cu Adam le Eva te ih hloter dahmi thianternak zaangfah nak veel asi kha in run sim duhmi asi. Khrih ih thihnak thawngin kan sualnak ihsin ngaidamnak kan ngahih miluat ah kan cang zo. Satan ih kut sung ihsin luatnak kan ngah, thihnak ihsin kan thlarau in luatnak a ngah zo. Nunnak thar kan ngah sal zo. A hlo mi thianternak zaangfahnak veel cu kan ngah sal zo asi. 

          Bawi Khrih ah nu le pa, u le nau pawl, Pathian thawn pehtlaihnak nei thei dingin zuam ringring uhsi. A ttongkam thawn siseh, a thi le sa thawn siseh, thlacamnak thawn siseh, mi harsa pawl bawmnak thawn siseh, Pathian thawn pehtlaih ttheu uhsi. Sualnak pawl cu hrial in kan sual ngah pang asi khalle sualsirnak thinlung ngaingai thawn sualthlahnak tuah ringring uhsi. 

Pathian ih zaangfahnak veel cu nan zate ih parah um ringring hram sehlaw. Amen.