Pathian ih zangfah lainatnak maksakzia (simtu Rev. Fr. David Mangte)

Pathian ih zangfah lainatnak maksakzia

Thuthangtha simtu Rev. Fr. David Kap Cin Mang

July 4, 2022

Kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu thuthangtha a rak ngaitu nan zate parah thleng hram seh ti’n cibai ka run lo buk hai a si.

Kumpi kumkhat ah thla 12 kan nei ih cumi sungin tu ah thla 6 kan hmangliam zo ruangah kum hrek rori kan hmang zo tinak khal a si. A luanciami thla 6 sung ah kan duhmi le kan duhlomi thil tampi kan tonmi a um cio ko ding. Kan tontehmi pohpoh hi Pathian ih thuneihnak thuai ih um an si thluh. Thil tha kan tonmi parah Pathian hnenah lungawi thu sim phah in le, thil thalo kan tonmi thawngin nundan zir in, a tanglaimi kan caan te hi a tha bik le a sunglawi bik in hmang thei dingah thluahsuah zangfahnak Pathian hnenah dil tlang uh si.

Cule, thlacam bawm ding in dil tu pawl hmuahhmuah in kan lo mang ringring ko; niti’n Missa sumnak kan tuahmi khal kan zate hrangah a si timi khal hitawk RVA thuthangtha simnak ihsin run lo theihter ka duh a si.

Tuini ih kan Cathianghlim siarmi pawl kan zoh tikah, Bawipai’ zangfah lainatnak le duhdawtnak maksak zia langtertu lawnglawng an si.

A veikhatnak ih kan siarmi Hosea 2:16,17-18, 21-22 sung kan zoh a sile, Israel mi pawl in an phatsan rero ko nan, a cem theilomi a duhdawtnak langter dingah a nupi ih a thitsal ding thu Pathian in Hosea hmangih a rak phuanmi thuhla kan thei.

A ngaingai teih kan ti a si ahcun, Pathian in Israel mi pawl a nupi ih a thit taktak cu, a Fapa neihsun a run thlah tikah a si. Prophet Hosea hmangih a rak phuan ciami cu Jesuh Khrih ah a ra famkim tinak khal a si. Curuangah Fapa Jesuh Khrih a zumtu hmuahhmuah cu, Pathian ih thitmi mo thar a silole, Israel miphun thar kan si. A va sunglawi tak em…. A nupi ih in tuahtu Pathian cu thangthat cio uh si……

Saam sawnnak ih kan siarmi sung khalah, Bawipa cu mi nunnem le zangfah lainatnak thawn a khat tu a si ti’n kan biak Pathian ih thatnak kan aupi a si.

Gospel ih kan siarmi Mt 9:18-26 sungah minung sinak a latu kan mopa Jesuh Khrih hmangin Pathian in a zangfah lainatnak maksak zia a langternak thu kan thei. In zangfahnak a tum zia cu, Jesuh Khrih ih minung a sinak thawngih mangbangza a tuah mi lawng si loin, a hrukmi hnipuan hmang hman in a thil ti theinak a rak langter a si. Kum 12 sung rori thidok nat tuartu nunau nu in zumnak thawn Bawipai’ puan zimte a tham tikah, leitlun siibawi thatha pawl ih damter theilomi a natnak hi hmakhat teah mangbangza in a hlo cih mai.

Khai hnipuan in huham a nei a silo nan, Bawipai’ hrukmi puan a si ruangah amah parih a zumnak kha puante thamnak in a rak langter tikah khai nunaunu in a rah a rak hmu taktak a si cu.

Tulai san khal ah, kan Bawipa Jesuh Khrih hi a taksa ruangpi thawn in umpi nawn lo nan, a rundamnak hnatuan pehzulh dingah a rak dinmi Kawhhran hmangin minung fimnak ih theihthiam thei lomi le minung thiamnak ih ti thei lomi mangbangza tampi a langter hrih ko. Cumi mangbangza a kutcak hmu thei dingah khi san lai vek thotho in zumnak hi a rak thupi tuk.

Palm Sunday ni ah Puithiam pawlih thluasuah pekmi thulhfau hnah hman khi Pathian in a kutcak langnak ah a hmang thei ko. A tong-teptu rori ih in simmi a si. Thianghlimti kan timi Puithiam pawl ih thluasuah pekciami tidai sinsin tla cu ziangtluk in Pathian in a kutcak langnak hrangah a hmang timi cu a tong-tep tu kan tam ko ding. Cuvek thiamthiam in Saints kan timi Mithianghlim pawl ih rak hman dahmi thilri thawn khal Pathian ih kutcak langmi tampi a um ve lai.

Ti duhsan cu, Pathian thawn a pehparmi thil pohpoh hi zumnak thawn kan hmang a si ahcun, Pathian ih huham langnak an si thluh tinak a si. Hi pawl ziangruangah an cang thei ti a sile, Pathian ih in zangfahnak a tum tuk le a maksak tuk ruangah a si bik.

Bawipai’ tongkam a centu le a taksa a ei theutu nang le kei sinsin tla cu ziangtluk in Pathian in a kutcak langnak hrangah in hmang duh ding….. Bawipai’ hman dingah kanmah le mah kan pe-aw cio pei….

Tuini kan siarmi Gospel sung thotho ah, sinakok hotu bawi ih fanu cu a thi zo mi a si nan, Bawipa Jesuh in a kut a vun kaih vete’n a nung ih a thosal mai ti a si.

Hi thil cangmi in kan Bawipa cu natnak lawng silo, thihnak par tiang hman ih thuneitu a sinak a lang ter…… Hitawk zawn khalah a thupi bikmi pakhat cu nauhak nute ih pa, Sinakok hotu bawi ih zumnak hi a si…..

Pathian cu zangfah lainatnak thawn a khatmi a si. Zumnak a nei ngaingai tu pawl in a zangfahnak cu a tak in an hlawm ngah ringring. Nang le kei teh kan zum taktak maw?

 

Add new comment

3 + 6 =