Pathian ih Zangfahnak Cotu

Thuthangtha sim tu Rev. Fr. Peter Zin 

March 6, 2021.

            A netabik ah a thinlung a hung fim ih, ‘Ka pa ih hlawhfa pawl cun ei cawk lo in rawl ei ding an nei; asinain kei cu hinah ei ding zianghman nei lo in ka thi cuahco thlang! Ka tho pei ih ka pa hnenah ka feh ding. Ka pa, Pathian parah le na parah ka sual zo. Na fapa si dingah ka tlak nawn lo; na hnaṭuantu na sal pakhat ah i tuah hram aw, tiah ka va ti pei,’ tiah a ruat.

           Thuthangṭha a ngaitu duhdawtmi nu le pa, u le nau pawl, Bawipa kan Pathian in ṭhat lo nak le ṭih nungza ral phun za kip lak in a lo hum him hai hram seh la hnangam daihnak a nei tu si hram uh tiah thlacam saknak thawn ka lo cibai hai a si. A tu lai fang ih kan ram thu buainak ruangah ram dang ih a um mi kawlram mi pawl hman thin bang in an um cio ih kawlram sungih a um mi pawl hrang sinsin cu ziang tlukin nan thin a bang ding ti cu thei theih a si. Ziang tlukin kan thin bang le harsa in kan um hman ah, khat lamah a thupi sawn mi kan thlarau nunnak ding khal cu kan hngil saul lo ding cu a thupi zet mi a si. Ziang vek caan le ziang vek thu khal ah siseh mi ih mawhnak, mi ih sualnak ih sin kan mah lam ih mawhnak sawn, sualnak sawn ah a cang vivo lo nak ding kha cu kan ralring dingah a thupi zet mi a si. Ṭhatnak le ṭhatlonak an do aw tikah a thoknak ah cu ṭhatlonak nih a neh deuh vek a bang ṭheu. Asinan a netnak ah cu ṭhatnak nih a neh sal ṭheu. Ziangruang ah tile Pathain cu ṭhatnak a tuah tu pawl hnen lam in a ṭang ruangah a si. 

            Tuni thlarau thazaang kan lak tlangnak dingah tuni kan siarmi Bible pawl zohin Pathian cu duhdawtnak le zaangfahnak nei tu a si ih cumi a zaangfahnak a co tu kan si theinak ding thu ruat in thlarau thazaang kan lak tlang dingin ka lo sawm duh. Kan siar dingmi Bible a veikhat siarnak ah Mikah 7:14-15, 18-20 tiang a si ih Pathain in a minung pawl parih ngaidamnak a ngeihnak, a duhdawtnak, a zaangfah lainatnak a neihnak le cumi pawl hrangih thlacamnak pawl kan hmu thei si. Saam kan siar dingmi cu Saam 103: 1-4, 9-12 tiang a si ih a sawnnak ah ‘Bawipa cu zaangfahnak le lainatnak a nei,’ tiin a si ih kan Pathian cu zaangfah lainatnak nei tu a si nak a lang ter. Gospel kan siar ding mi cu Luka 15:1-3, 11-32 tiang a si i ‘a hlo mi fapa’ tiih kan thei ṭheu mi Bawi Jesuh ih sim mi tahṭhimnak pakhat a si. Himi tahṭhimnak sungah fiangzet le langzet in kan hmu thei mi cu Pa ih zaangfahnak le duhdawtnak hi a si.    

Bawi Jesuh in hi tahṭhimnak a simnak san cu veikhat ah siahkhongtu pawl le misual tiih hnonmi pawl tampi Bawi Jesuh thusimmi ngai dingah a hnenah an ra. Cutikah Farasi mi pawl le Daanthiam pawl cu an phunzai ih, “Hi pa hi hnonmi misual pawl a rak kom ih an hnenah rawl tla a ei!” an ti. Curuangah Jesuh in hi tahṭhimnak a sim nak a si. 

            -Jesuh ih a sim mi cu, “Mi pakhat in fapa pahnih a nei ih a nauta sawn in a pa hnenah, ‘Ka pa, ka co dingmi rothil atu ah i pe aw,’ tiah a dil. Curuangah an pa khal in a ro thil hmuahhmuah cu a ṭhen ih a fapa pahnih cu a zem hia. Ni rei lo teah fapa nauta sawn cun a comi thilri pawl a zuar ṭheh ih a ngahmi tangka thawn inn ihsin a suak. Ram hlapi ah a feh ih tenrennak zianghman um lo in a tangka cu a duhduh in a thehvorh ṭheh men. A neihmi hmuahhmuah a hmang ral ṭheh. Cule cuih ram sungah paampi a tlung ih neihmi zianghman a nei nawn lo in a um. Curuangah cuih ram ih mi pakhat hnenah a hna ṭuan sak dingah a feh ih cupa nih vok kilkhawi dingin a lo ah a fehter. Vok rawl hman kha puar zet in ei ding a duh tiang in rilrawng a tuar. Asinan zohman in ei ding zianghman an pe lo. 

            -A netabik ah a thinlung a hung fim ih, ‘Ka pa ih hlawhfa pawl cun ei cawk lo in rawl ei ding an nei; asinain kei cu hinah ei ding zianghman nei lo in ka thi cuahco thlang! Ka tho pei ih ka pa hnenah ka feh ding. Ka pa, Pathian parah le na parah ka sual zo. Na fapa si dingah ka tlak nawn lo; na hnaṭuantu na sal pakhat ah i tuah hram aw, tiah ka va ti pei,’ tiah a ruat. Curuangah a pa hnenah kirsal dingin a pok. “Lam hlatpi ih a rat rero lai kha inn ihsin a pa in a hei hmu. A zangfah ngaingai ih va tlan tahrat in a fapa kha a kuah ih a hnam. Cule, ‘Ka pa, Pathian parah le na parah ka sual zo. Na fa tiih kawh ding ka tlak nawn lo,’ tiah a ti. Sikhalsehla a pa cun a hnenum pawl a ko ih, ‘Zamrang in ra uh! Hnipuan ṭha bik rak keng uhla hrukter uh. A kut ah zunghruk hrukter uhla a ke ah kedam dam uh. Cule caw faate a thau bik kha va that uhla lungawinak puai tuah uh si! Ziangahtile hi ka fapa cu a thi zo nain a nungsal; a hlo zo nain hmuhsal a si,’ tiah a ti. Cuticun lungawi puai cu an tuah. “Culaifang ah fapa upa sawn cu lo ah a rak feh. Lo ihsin a ra tlung ih inn kiang a ra thlen tikah hlasak thawm le laam thawm pawl a rak thei. Cuhrangah hnenum pakhat a ko ih ‘Ziangso an tuah ciamco?’ tiah a sut. Cuih hnenum in, ‘Na naupa a ra kirsal zo, himdam teih a ra kirsal ruangah na pa in a thaumi caw faate a thah,’ tin a sim.

            -Fapa upa sawn cu a thin a heng tuk ih innsung hmanah a lut duh nawn lo. Curuangah a pa a ra suak ih innsung ah ra lut dingin a rak leem nan a fapa cun, ‘Vun ruat hnik! Kum hizat liangluang sal bangin na hna ka ṭuan ih na thu veikhat hman ka lo el dah lo. Ziangso kei i pek? Ka rualpi pawl thawn nomnak puai tuahnak ah me pakhat hman i pe dah lo! Sikhalsehla hi na fapa cu hlawhhlang pawl thawn nomnak ah na thilri hmuahhmuah a thehvorh ṭheh ih na hnenih a ra kirsal tikah a thaumi caw faate na thah sak!’ tiah a pa cu a ti. A pa cun, ‘Ka fapa, nang cu ka hnenah na um ringring ih ka neihmi thil hmuahhmuah hi nangmah ih ta an si. Asinan na naupa cu a thi ih atu ah a nungsal; a hlo zo nain atu cu ka hmusal; cuhrangah lungawi aipuang in puai tuah tlak hrimhrim a si,’ a ti.

            Himi Bawi Jesuh ih sim mi thuanthu sungah a thupi bik in Pa le a fapa pahnih an tel. Pa cu Pathian a ti duhnak a si ih duhdawtnak le zaangfahnak neitu, thinsau zet mi Pathian a si ti kha kan hmu thei. Fapa pahnih cu minung pawl kan zate ai awh tu an si ih fapa upa sawn pa ih din hmun vek ah maw, nauta sawn pa ih din hmun vek ah kan um ti kha mah le mah ruat cio ding kan si. Nauta sawn pa cu a mah le a mah ka sual zo ti a thei aw ih sualsir in a pa hnen ah a kir sal. A upa sawn cu a mah le a mah ka ṭha tiah a ruat aw ih a poi bik mi cu a u nau parah ngaithiamnak a nei lo. Duhdawtnak khal a nei lo. A taktak ah cu a a nau pa sualsir in a tlungsal mi parah lungawi in um ding sawn hi a si. Asinan cu ti siloin iksiknak in a khat. An pa cu duhdawtnak le zaangfahnak nei tu a si. A fapa pahnih par ah duhdawtnak le zaangfahnak a nei veve. Asinan an pahnih ten cun a zaangfahnak le a duhdawtnak an thei thiam lo. A nauta sawn pa in lawng ṭha ten a co ngah a si. Ziangruangah tile a upa sawn pa cu a mah in a pa ih kawhnak kha a el ruangah a si. 

            Sualnak lak ah a besia bik kan ti pei maw, a poimawbik mi cu Pathian ih kawhnak ngai duh lo in elnak hi a si. Minung cu kan zaten sual nei mi lawnglawng kan si. Kan sualnak bel te cu a bang aw lo. Pathain in kan zate in a mah hnen ra ding in in sawm, in ko. Fapa nauta sawn pa vek in sual sir in kan kir a si ah cun Pathian in lungawi zet in in hmuak ding ih laksawng in pek ding asi. A upa sawn pa vek in Pa ih duhdawtnak thei lo in mah ih ṭhatnak lawng hmu, mi ih sualnak lawng hmu, mi ih siatnak lawng zoh in le duhdawtnak, ngaithiamnak nei lo in iksik nak thawng kan um a si le cu Pa ih inn asimi vancungram sungah kan lut ngah lo ding a si. 

            Duhdawtmi nu le pa, u le nau pawl, sualsirnak le tangdornak nei in Pathain kawhnak ngai in Pathain ih zaangfahnak a co ngah tu si thei ding in zuam ringring uh si.

            Fr. Peter Lal Zin Thang (Hakha Diocese)