Pathian thawn pehtlai awknak thar (sim tu Rev. Fr. Joseph Ro Nei Thang) May 7, 2021

Pathian thawn pehtlai awknak thar

Thuthangtha sim tu Rev. Fr. Joseph Ro Nei Thang

May 7, 2021 (Pasca caan Zarh 5 nak, Ninga ni)

Siarding: Tirh. 15: 22-31; Saam 57: 8-12; Jn 15: 12-17.

          RVA Falam Chin Service ah thlarau rawl thianghlim a zawh ringrintu Bawipa Khrih ah duhdawt zetmi nu le pa, u le nau pawl, kan Bawipa Jesuh Khrih ih zaangfahnak veel, Pa Pathian ih duhdawtnak le Thlarau Thianghlim ih pumkhat sinak cu nanmah thawn um hram seh tiah cibai ka run lo buk hai. Thosaltu tu Jesuh Khrih in hnangamnak lo pe ringring hram seh tiah thla za ka run lo cam sak hai. Tuihni cu Pasca caan sungih Kaar 5 nak, Tlawngkai ni 5 ni, 2021, May thla ni 7 ni asi. Tuihni kan siar dingmi Cathianghlim pawl cu Tirhthlah 15:22-31 tiang; John 15:12-17 tiang pawl pawl ansi pei. Tuihni ih kan ruah khawm tlang dingmi cu “Pathian thawn pehtlai awknak thar” tiah asi pei.

          Khuahlan lai ah Serhsiamtu Pathian in a serhsiammi Adam le Ave te kha amah rori in a biak asi. Hmu theilomi Pathian in Adam le Ave te hnenah ziangmi tuah ding, ziangmi tuahlo ding, ziangmi ei ding, ziangmi kha ei lo ding tiah a sim asi. Eden hmuan sung ah thingkung a phunphun a um; hmuan lai fang ahcun thingkung phunhnih an um; phunkhat cu nunnak thingkung, a dang pakhat cu a ttha a sia thleihdan thiamnak thingkung tla ansi. Pathian ih eiterlomi thingkung, a tham hmanah thamlo dingin a khammi thingkung cu a ttha le a sia thleihdan thiamnak thingkung ih rah kha asi. Adam le Eve in cumi thingkung ih rah cu an ei tikah sualnak sungah an tla asi. Noah hi Pathian in tinbaw sak dingah thu a pek ih Pathian ih simmi thu a ngai ruangah amah le a innsungsang minung 8 hi himnak an ngah asi.

          Vunzim tannak thawngin Pathian in a milai pawl thawn pehtlainak a tuah asi. Semtirnak 17:10-12 ah Pathian in Abram hnenah “Nangmah le na tesinfa pawl in ka thukam nan fekternak dingah mipa hmuah hmuah vunzim an tan thluh pei. A tu thokin mipa pohpoh cu niriat anti ni ah an vunzim nan tan ding; nan innsung suak sal pawl siseh, ramdam ih nan leimi sal pawl siseh, nan tan thluh ding. Himi cu Keimah le nanmah karlakih thukamnak langternak asi ding” tiah a ti asi. Cumi vunzim tan duhlo ruangah miphun cimitnak asi tiah asi. Semtirnak 17:14 ah “Vunzim tan a duhlomi pa cu thukam a thlun lo ruangah a miphun sung ihsin hlon asi ding” tiah fek zetin Pathian in thu a pek asi. 

          Moses san ahcun vunzim tannak thawn a tawk nawnlo ih Pathian ih thukham 10, a thupekmi pawl le a daan pawl thlunnak thawngin milai pawl cu Pathian thawn pehtlainak an tuah ttheu asi. Pathian ih thukham pakhatnak a thlun nawnlo in Baal pathian khawzing a biaktu Israel mipi pawl kha Carmel tlang ah Bawipa ih Prophet Elijah in a singkhaw hai asi. Baal ih prophet pawl cu 450 ansiih Bawipa ih prophet cu prophet Elijah lawng hi asi. Raithawinak hrang cawcang an pekih Baal pathian a betu prophet pawlih thlacamnak pawl cu Bawipa in a thei saklo ih Bawipa ariantu prophet Elijah ih thlacamnak cu Bawipa in a saang asi. Prophet Elijah in Baal ih prophet pawl cu a kaiter ih Kishon tiva ah a hruai hnu ah a thah thluh asi. Siangpahrang Saul cu Bawipa ih thupekmi a thlunlo ruangah a siangpahrang sinak lal tokham cu a cemral ta asi. Curuangah Hebru 1:1-2 ah “Hlan lai-ah Pathian in kan pupa pawl hnenah a prophet pawl hmangin a phunphun in voi tampi thu a rak sim. Sikhalsehla hi ni netabik lam ahcun kan hnenah a fapa thawngin thu in sim asi” tiah kan hmu thei. Tuih caan rori ahcun a Kawhhran thawngin thu in sim asi tiah kan ti thei. Ziangahtile Bawipa Jesuh Khrih in ziang hmuahhmuah cu a Kohhran sungah a pek ttheh asi. 

          Kannih Khrihfa san ahcun vunzim tannak cu a ttul nawnlo asi tiah tuihni kan siarmi Bible a voikhatnak ah in zirh asi. Tirhthlah 15:24-25, 28-29 ah “Hithawkih kan pawl sung ihsin nan hnenah a ra thlengmi tthenkhat in an ttongkam in harsatnak an lo pekih an lo buaiter ti kan thei. Hitiih an ra tong tikah kannih ih kan fialmi ansilo. Curuangah kan tong aw khawmih kanmah sung ihsin hrilmi palai pawl nan hnenah kan hun thlah. Thlarau Thianghlim le kanmahih lungkim tlangnak kan nei ih hi a tanglam ih daan pawl siarlo a dang thilrit nan parih ret ding kan duhlo: Milem biaknak rawl nan eilo pei; hngawng rekih thahmi sa nan eilo pei; cule nupa sualnak nan tuahlo pei. Himi pawl tuahlo in hrial thei asi ahcun a ttha thluh ding” tiah an ngan tiah kan hmu. Himi cu Thlarau Thianghlim ih hruainak thawngin Tirhtlah pawlih thurelcatmi in zumtu pawl, abikbik ah Antioch khawlipi ih zumtu Khrihfa pawl hrangah lungawinak a suahter asi. Zumnak hi kan rundamnak hrangah a thupi zetmi asi. Zumnak kan nei ahcun tipilnak co a ttul asi. Khuahlan lai ah Pathian ih fale ah cang dingah vunzim tannak a ttul nain tuihsan ahcun cumi ai ah Tipilnak sacrament lawng a ttul asi. Cuti cun Pathian ih fale ah kan cangih Pathian thawn pehtlaihnak kan nei thei asi. 

          Tuihni kan siarmi Thuthang ttha ahcun Pathian thawn pehtlaihnak kan nei theinak dingah Jesuh Khrih in “Nan hnenah thukham thar ka lo pe: Ka lo duhdawt vekin nannih tla pakhat le pakhat duhdawt aw uhlaw” tiah Jonh 15:12 ah in zirh asi. Tuihni kan siarmi Thuthang ttha ahhin sukso duhdawtnak le a phei zawng duhdawtnak kan nei ttul zia in zirh asi. Sukso duhdawtnak kan ti tikah sersiamtu Pa Pathian nih in duhdawt vekin a mah kha kan thinlung zate thawn, kan fimnak zate thawn le kan thazaang neimi hmuahhmuah thawn duhdawt ding kan si asi. Cun a phei zawng duhdawtnak kan ti tikah “kanmah le kanmah kan duhdawt aw vekin mi hmuahhmuah tla duhdawt ding” tiah asi. Nunau tilo, mipa tilo, hrin le hnam tilo, hmel ttha-hmelsia tilo, milian-farah ti umlo in duhdawt thluh dingah Bawipa nih in zirh asi. Cumi duhdawtnak ah kanmah lam ihsin peksan nak tla a um ding, kan liam caan tla a um ding asi. Mahih nunnak pek siang tiang hmanah a ttul asi tiah tuihni kan siarmi Bawipa Jesuh Khrih ih ttongkam ah kan thei asi. Cumi pawl cu Pathian thawn pehtlaihnak thar pawl asi. 

          Bawipa ih Thi le sa sacrament kan sang tlang. Bawipa thawn pum khat ah pehtlaihnak kan nei. Bawipa ih Thi le sa huham thawn midang pawl parah Bawipa ih neimi duhdawtnak thinlung nei ve ding kan si asi. Calcutta khua ih Mother Theresa in “Bawipa ih Thi le Sa cu duhdawtnak thawn kan saang ih Missa a ttheh tikah Bawipa ih pekmi duhdawtnak thazaang thawn mipi pawl lakah duhdawtnak kan hmuh asi. Kan cohlangmi Missa sungih Bawipa cu a lengih mifarah le miharsa pawl hnenah siseh, ngaktthah le kutdawh pawl hnenah siseh kan tong sal ttheu asi” tiah ati asi. Aw, mithianghlim pawlin Pathian thawn pehtlaihnak thar an nei ringring asi. Thlacamnak thawn lawng a tawk hrihlo ih cangvainak thawn duhdawtnak hnattuan ttuan dingah tla a ttul lai asi. 

          A ngaitu nan zate ih hnenah Bawipa nih thluasuah lo pe hram seh!