"Pek bet mi maw, Laksak mi so nasi?”

"Pek bet mi maw, laksak mi so nasi”

"A nei mi in nei lo mi hlawm uh, then uh, pe uh, bawm uh!"

Bawi khrih ah duh dawt mi nu pa u le nau, ruangpum le thlarau ih dam cahnak, lungawinak cu nan zate parah a thar in thleng hram she tiah thlaza ka cam. Tui sun Nov ni (20) sun ih Bible cathiang hlim kansiar mi Lk 19:11 – 28 sung in Pathian thu kan hlawm aw tlang pei tiah ka lo sawm. Kan thu lu ih ka hril mi cu “Pek bet mi maw, laksak mi so nasi”ti a si.

Kan Bawi pa Jesuh ih in zirh mi thuhla tam pi sungah; A nei mi in nei lo mi hlawm uh, then uh, pe uh, bawm uh, ti pawl hi tam zet in kan hmu thei. Thutha le thuhman a siih, ngaimawi, zohmawi, tla a si. Asinan tuisunih in zirhmi ahcun tam nei cia kha pek bet uh nei lo mi kha a neihsun hman laksak uh a ti. Theih harsa le thu lam dang zet a si. Kau deuh le thukdeuh ih fiang thei ding in thu pa thum in kan ruat khawm hnik pei. Bawipa cun hnen un (10) pawl cu tang ka fang khat cio a pek, Amiat, a thang hawl cio ding in a fialih an tuanvek ten laksawng co ding in thu a kam. Unau, Pathian in ziang in pe, ziang in fial, ziangthu in kam ti hi lo theih lo i theihtul mi a si.

Pathian in ziang in pek: Jn 3: 16 Pathian in lei lung hi a duhdawt zet ruangah a fapa neihsun a pek. Pathian in kan hrang ah Jesuh Khrih in pek. Jn 14: 9 ah “Kei mah i hmu tu cu kapa hmu ansi. Jesuh in a ti, Hnen um pawl cu a Bawipa nih siangpahrang zuk cuang tangka a pek.  Kan Pathian in i pek mi Jesuh cu lei le van ih Bawipa Pathian a maih muihmel cuang in pek. Hmuh thei lo Pathian cu hmuh theih Jesuh ah a leng. Kan zaten Pathian ih hmuihmel keng i sersiam kansi. Hnen um pawl in tangka fang (1) cio bang rep teih an co vek in Pathian ih hmuihmel Jesuh Khrih ih pian zia bang rep tein kan co cio. Minung pakhat i sersiam kansi thawh ah Pathian thawi bang aw deuh cuangce deuh kan um lo. Hnen um pawl hnen ah tangka karh zai ter uh ti i, Kan Bawipa ih cah vek in kannih zumtu Khrihfa pawl khal in kan co mi Pathian hmuihmel le Jesuh ih nun cu pumpak kan nun ah karh sin ter ding le than ter sin ding ih fial kansi. Tuan vo kan nei.

Khrih parih kan zumnak, kan sinak le duh dawtnak a thang vivo a sile Jesuh cu kan hnen ah a thang liam vivo ve. Kan tong kam kan ziaza le kan thin lung ah Jesuh in hmun a la vivo ih thuthangtha phuannak le ngainak ah siseh thangtha thla sak le thla cam nun ah kancak vivo. Cuticun kiangkap hrangah mibawmtu, mi hnentu lung awinaksuah pi tukansithei vivo. Minung hrangah thluasuah kan si. Khawm nak lam le Pathian thuhla lam khal ah rual pi mi dang tampiJesuh hnen ah kan  rat pi. Hnen um te cun siangpahrang zuk cuang tang ka (10) Bawipa hnenah a rak thlen pi. Jesuh Khrih hmuihmel cuang kan pumpak nun le Jesuh hmuihmel cuang rualpi pawl tla Pathian hnen ah kan rat pi hnen un tha, mifel ram sungah ro tha co aw tiah kan Bawipa in thu in kam ve asi.