PEKSANNAK (sim tu Rev. Fr. Joseph Ro Nei Thang), December 25, 2020.

PEKSANNAK

Thuthangtha sim tu Rev. Fr. Joseph Ro Nei Thang

Christmas Ni, December 25, 2020.

Siarding: Isaiah 52:7-10; Ps 98:1-2, 3-4, 5-6; Hebru 1:1-6;

Gospel John 1:1-18

          Emmanuel kan Bawipa Jesuh Khrih ih suahni ah leitlun khuazakip ih a ummi Bawi Khrih ah duhdawtmi nu le pa, u le nau pawl, nan zatein “Merry Christmas” tiah cibai ka run lo buk hai. Naute Jesuh hnenah tla “Happy birthday” tiah cibai buk cio uhsi. Tuihni cu kan zate ih nuamni puaipi asi. Kan hngak hlap zetmi Christmas puai pi cu a ra thlegn zo ruangah asi. Cun Christmas puaipi cu leilungpi puaipi asi, ziangahtile Jesuh Khrih ih rundamnak cu mizapi thawn a seng ruangah asi. Cuhlei ah Christmas puai cu Christian pawl lawngin kan tuahlo ih daan dang pawlin tla an tuah fingfing asi. Pathian belotu Communist pawl hmanin Christmas puaipi cu an tuah asi. Kannih Catholic Kohhran in Christmas puai cu lungawi emem in kan tuah ih (Liturgy/Biaktawinak thawn) ahcun ni 8 rei in kan tuah asi ti kha mangsal uhsi. Mirang ttong incun Octave Christmas kan ti ih December ni 24 zan ihsin thokin January 1 ni tiang kan tuah ttheumi asi. December thla ni 25, Christmas ni ih kan siar dingmi pawl tla cu Isaiah 52:7-10; Ps 98:1-2, 3-4, 5-6; Saam a sawnnak ah “Vanrang hnuai mi hmuahhmuah in kan Pathian ih rundamnak cu an hmu zo asi” tiah asi pei. Cun Bible siar hnihnak ahcun Hebru 1:1-6 tiang; Gospel John 1:1-18 tiang pawl tla ansi pei. Tuih kum Christmas ni ih kan ruah khawm dingah ka hrilmi cu “PEKSANNAK” tiah asi pei.

          Tuihni kan siarmi Thuthang ttha John 1:16-17 ah “A famkim zetmi a zaangfahnak thawn kannih cu in thluasuah zo ih a thluasuah cu pakhat hnu pakhat in pek asi. Pathian in Daan cu Moses hnen ihsin a pek; asinain zaangfahnak le thutak cu Khrih Jesuh sung ihsin a pek asi” tiah in zirh. A ngaingai ahcun Falam ttong in lehmi Bible ah thluasuah pakhat hnu pakhat ti hi a dik lemlo asi. Mirang Bible ziangmi version poh kan zoh khalle thluasuah asimi blessing timi ttongfang hi kan hmu theilo asi. Mirang Bible kan zoh tikah cun grance upon grace, grace for grace, grace after grace ti vekin kan hmu theimi ansi. Grace timi cu blessing asi deuh lo. Grace cu zaangfahnak veel asi. In the definition of the Catechism of the Catholic Church, "grace is favor, the free and undeserved help that God gives us to respond to his call to become children of God, adoptive sons, partakers of the divine nature and of eternal life. Grace is a participation in the life of God.” Asullam cu “grace timi zaangfahnak veel cu Pathian ih fa le ah kan can theinak ding hrangih a mithmai ttha kan ngahnak asi, cun tlaklo nacingin a lakin kan ngahmi Pathian ih bawmnak hi asi. Grace timi cu Pathian ih nunnak kan hlawm ngahnak tla hi asi” tiah Catholic Kohhran ih Pathian thuzirnak ca-uk ah in zirh asi. Kan Bawipa Jesuh Khrih thawngin Pathian ih a famkimmi a zaangfah thinpemnak sung ihsin kannih Amaih hmuihmel vekin serhsiammi milai pawlin a zaangfahnak veel cu pakhat hnu pakhat kan ngah asi ti duhnak asi. Amah Jesuh Khrih thawngin Pathian in ziang hmuahhmuah cu a serhsiam ih Jesuh Khrih tello in Pathian in zianghman a serhsiamlo tiah tla kan hmu. Himi thawn peh par awin Rome 11:36 ah “Ziangahtile ziang hmuahhmuah cu Amahih serhsiam mi, amah ruangih ummi le amah hrangah ansi ttheh. Pathian hnenah kumkhua in kumkhua tiang sunlawinak cu um ringring ko seh” tiah asi. John 3:16 ah “Pathian in leitlun minung pawl hi a duhdawt tuk ruangah a Fapa neihsun in pek asi” tiah kan hmu. Khami kha Christmas ih sullam asi. Christmas cu peksannak tiah tla a sullam a um asi. Pathian in amah le amah in pek asi. Pathian in minung tisa semnak a lak asi timi cu Christmas thuthuk asi. 

          Bawi Khrih ah duhdawtmi nu le pa, u le nau pawl a tlun ih Bible catlang pawl le Christmas sullam pawl le kanmah ih nunnak dinhmun kha zoh in ruat cio uhsi. Rome Cakuat 11:36 ah Paul in in zirh vekin ziangzongza cu Bawipa hnen ihsin a si tiah kan hmu. Ziangzongza cu Bawipa ih serhsiammi asi. Cun ziangzongza cu BAWIPA THAWNGIN asi tiah Cathianghlim nih in sim. Ziangzongza kan ngah theinak, thluasuah kan co nak, cycle kan lei theinak, fimnak le thiamnak kan ngahnak, hnattuan kan ngahnak, yahto kan kai theinak, hril awknak ah hrilnak conak tivek pawl, ti le rawl khop-kham tein kan nei theinak, khualtlawnnak ah tluang tein kan feh theinak, camibuai kan awngnak, cak le dam in kan um theinak, kan nunnak rengreng tla siseh Bawipa ih thawngin kan ngahmi asi. Kan ttuanmi pawl kan hlawhtling vivo ah khawte lam ihsin khawpi lam ah kan va pan theinak, motor bike ihsin motor car lei theinak dinhmun ah kan rak hlawhtling, di-inn ihsin rangva inn, rangva inn ihsin nankat inn, nankat inn ihsin taih-inn ngaingai tiah kan sak thei vivo tla cu Bawipa thawngin asi. Kan rawl ei dan tla kan zoh tikah lairawl kawhhol einak ihsin fangcangbuh ei theinak, vainim tisop einak dinhmun ihsin fangcangbuh ei theinak dinhmun ah, hang hnah hangrah in le einak dinhmun ihsin sa ei theinak dinhmun ah, rawl thawthaw ei theinak dinhmun ah kan kai theinak pawl hmuahhmuah tla cu Bawipa thawngin asi. A zaangfahnak veel pakhat hnu pakhat kan co ruangah asi. Bawipa tello in kanmah tein kan tuah rero, kan ttuan rero hmanah zianghman kan san tlai theilo.  

          U le nau pawl, neta bik ih ta cu sein khaw hmuh pakhat asi. Cumi cu “ziang hmuahhmuah cu BAWIPA HRANGAH” tiah asi. Bawipa thawngin kan ngahmi a zaangfahnak veel le thluasuahnak pawl hi AMAH HRANGAH kan hmang maw hmanglo so timi hi asi. Kan fimnak le thiamnak pawl, kan yahto kaimi pawl, kan sumdawng tuahmi ah kan hlawhtlinmi pawl, camibuai kan onnak pawl, kan cahnak, nunnak, damnak pawl, khual kan tlawnnak ih kan tluangmi pawl, kan thlacammi vekin kan ngahmi thluasuah pawl, kan leimi motor pawl, cycle pawl hi BAWIPA HRANGAH kan hmang maw? Bawipa kan peksan maw? Bawipa hrangah asiih Bawipa kan pek siang maw? Kan nunnak hi amah Bawipa hrangah kan hmang maw? Bawipa nih in dilmi tthen hra tthenkhat teh firlo tein dik zetin kan pek ttheu maw? Bawipa a bumtu Khrihfa kan si maw? Ruat sal uhsi.

          A Fapa hman zuahlo in tah tthim theilo siannak thawn ziangzongza in petu Bawipa Pathian in Naute Jesuh Khrih thawngin Christmas thluasuah in run toih hram seh. Amen.