Pumkhat Taktak Sinak

Rev. Fr. Joseph Ro Nei Thang ih thuthangtha simmi (May 28, 2020)

Tirhthlah 22:30, 23:6-11; Ps 16:1-2, 5+7, 8-9, 10-11; John 17:20-26

Leitlun khuazakip ih ummi Bawi Khrih ah duhdawt zetmi nu le pa, u le nau pawl, cak le damin nan rak um cio hai maw? Thlarau Thianghlim a thlahtu kan Bawipa Jesuh Khrih hmin in cibai ka run lo buk hai. Nan zate parah Thlarau Thianghlim in hnangamnak le damnak lo pe hram seh tiah thla za ka run lo cam sak hai. Tuihni cu Paska caan sungih zarh sarihnak, Tlawngkai nilini, 2020 May thla ni 28 ni asi. Tuihni kan siar dingmi Cathianghlim pawl cu Tirhthlah 22:30, 23:6-11 tiang; Ps 16:1-2, 5+7, 8-9, 10-11 tiang asi pei ih Saam a sawn ahcun “Maw Bawipa, I humhim hram aw, nangmah ka lo rinsan asi” tiah asi pei. Cun Thuthang ttha ahcun John 17:20-26 tiang tla an si pei. Tuihni ih kan ruah khawm dingmi cu “pumkhat taktak sinak” tiah asi pei. 

Tuihni kan siarmi Pathian ih ttongkam a voikhat ah Paul in taya zone ah amah le amah Pharisee asinak thu a phuangih cun an zumnak asimi thihnak ihsin thawhsal nak thu pawl a sim asi. A simmi thu ruangah Pharisee pawl cu an lungawi ko nain Sadducee pawl cu an lung an awi theilo: ziangahtile annih in thih hnu thawhsalnak siseh, vancungmi siseh, thlarau siseh an zum lo asi. Pharisee pawlin cu cumi pawl cu an pom ttheh asi. Sadducee pawl cu biaknak lamah lawng silo in naing-ngan- yay lam ah tla hotu pawl ansi ih Rome uktu pawl thawn rualremnak nei ringringtu pawl ansi. Pharisee pawl cu Rome kut sung ihsin luat dingah zuam ringringtu pawl ansi. Sadducee pawlin Moses ih nganmi Semtirnak, Suahlannak, Puithiam hnattuan, Mipum siarnak le Daanpek salnak pawl lawng hi an pomih Pharisee pawlin cun Thukamnak hlun sungih ta hmuahhmuah an pom thluh asi. Sadducee pawl cu puithiam upa sungtel pawl ansi ih Pharisee pawl cu biaknak lamah a hleifuan in zuammi mi menmen pawl ansiih titer aw mi pawl ansi. 

Tuihni ih kan siarmi Cathianghlim a voikhatnak ah Paul ih thusimmi ruangah Sadducee pawl le Pharisee pawl cu an pomdaan an bang awlo ruangah an tthen tthek aw asi tiah kan hmu thei. An buainak deuhdeuh ruangah Paul tla an thlek tum ttheh asi. Paul cu mipi lak ihsin an vung hruai ih ttankulh ih fehpi dingin ralkap pawl thu a pek asi. Paul cu harsatnak a phunphun a tong nain “Paul, zianghman ttih hlah. Jerusalem khawpi ah keimah tettikhaan tu na si vekin Rome khawpi khalah keimah tettikhaantu rak si aw” tiah a mangah Bawipa in thazaang a pek asi. Bawipa tettikhaan dingah harsatnak a phunphun kan ton tikah Bawipa in “ttih hlah aw, ka lo um pi, ka lo ttanpi hai” tiah in ti ve asi. Amah kha va pan cio uhsi.

Bawi Khrih ah duhdawtmi nu le pa, u le nau pawl, tuihni kan siarmi thuthang ttha sungah Bawipa Jesuh in a kawhmi a tirhthlah pawl hnenah pumkhat taktak tein an rak si theinak dingah tthla a cam sak asi tiah kan hmu thei. Bawipa Jesuh in a Tirththlah pawl hrang lawng ah thla a cam sak si lo ih an thuzirhmi a zumtu pawl hrangah khal pumkhat taktak an si thei ringring nak dingah thla a run cam sak asi. 

Zawnruahnak neilo in mahih hrang lawng diriamnak, duhhamanak, miphun thlaih- dannak pawl a um tikah tthen-ttheknak a um asi. Tthen-tthenak cu pumkhat sinak ih ral tumpi asi. Bawipa Jesuh in pumkhat taktak hrangah thla a camih Bawi Jesuh vancung ah a kai hnu ahcun Kohhran sungah remlonak tete a rak um phah ttheu asi. Jew miphun pawl le Gentile miphun pawl cu zumtu an can hnu ah buainak tete a rak um phah ttheu. Cumi cu Tirhthlah pawlin an phyishin thei asi. Deacon pawl ordination an peknak thawngin siseh, cun Jerusalem council meetingpi an tuahnak thawngin siseh an buaimi pawl kha an phyishin thei asi. 

Tuih san Jesuh Khrih ih duh sakmi pumkhat sinak cu tthen-tthek tuahtu tampi in ziang an siarlo ih Kohhran a thupilo, Jesuh Khrih kan zum takah tiah an ti ttheu. Cuvek pawl hrial dingah Bible nih in sim. Rome 16:17-18 “u le nau pawl, tthen-tthek awk nak a suahpitu le zumnak a buaitertu le nan pomciami zirhnak a doldaltu pawl cu ralring uh tiah ka lo forh. Annih cu pawl hlah uh. Cubangtuk thil a tuahtu pawl cu Bawi Jesuh Khrih hrangih hnattuantu pawl ansilo. An pum cawmnak hrangih ttuantu pawl ansi. An ttong naal daan le an miporh thiam daan pawlin mizaraan pawl cu an bum ttheh asi” tiah fiang keukeu in in sim asi. Ralring ttul zet asi. Ttong an thiam zet ding, miporh an thiam zet ding, you tube in maw silole online in maw an lo bum ngah ding. Ralring kan ttul hrimhrim asi, mah ih zumnak cu thazaang ngah nawnlo caan a um ding; cuih caan ah thang vekin a lo awk pang ding ruangah ralring uhsi. Titus 3:10-11 “Tthen-ttheknak a suahtertu kha ralrinnak a malbik voihnih pe ta aw; cuih hnu ahcun a pawl khal pawl nawn hlah aw. Cubangtuk minung pawl cu mi borhhlawh le misual asi ti na thei ih a sualnak in hnonmi asiter” tiah tthen-ttheknak a tuahtu pawl ralrinnak pek a ttul zia in zirh asi. Ralrinnak pekmi tla duh cuang lo ahcun misual le mihnaihnoktu asi tiah ruat men ding asi. Jesuh Khrih in tla Mk 3:24-25 “Ram pakhatkhat cu tthen tampi ah a tthen awih anmah le anmah an do awk ahcun cuih ram cu an tthekdarh thluh ding. Innsang pakhat sungah pakhat le pakhat an do awk ahcun cuih innsang cu an tthekdarh ttheh ding asi” tiah in zirh. John in a cakuatnak 2John 1:9 ah “Zokhal Khrih ih thuzirhnak sungah um lo in a hleifuan in a nungtu cu Pathian a neilo asi” tiah fiang zetin in zirh asi. Judas in cun a cakuatnak 1:19 “Himi pawl cu tthenttheknak  a suahtertu le tisa duhnak ih a ukmi le Thlarau neilotu pawl ansi” tiah in zirh fiang. Tthen-ttheknak a tuahtu pawl cu John incun “Pathian neilotu” a tiih Judas incun “Thlarau neillotu” tiah a ti asi. Pathian neilo le Thlarau Thianghlim neilo ahcun Jesuh Khrih teh a nei thei pei maw? Nei hlah, Chrih ih ral ah a cang ding lo maw? Tthen-ttheknak um lo dingin Pathian ih duhmi asi. Pathian ih duhmi cu dungtunin maih tisa duhnak thawn Kohhran sungah buaithlaknak a suakter asi. Cuvek tthen-ttheknak um lo dingah Galati 5:12 “a lo hnaihnoktu pawl hi an lamzin zawh lawlaw in an til tla per aw lawlaw sehla ka va duh so” tiah Paul in nasa takin an cizaai lo dingah a beisei asi. 

Tthen-ttheknak cu kan hrial ttul tengteng mi asi. Pa le Fapa le Thlarau Thianghlim, Bawi pathum pathian pakhat cu pumkhat sinak ih hram thawhnak asi. Pumkhat kan si thei ringringnak dingah remnak, zawnruahnak, duhdawtnak, zaangfah lainatnak timi pawl cu kan nei hrimhrim a ttulih huat awknak, duhhamnak, hamttamnak, hau awknak, mah hrang lawng diriamnak le thlaihdan awknak pawl cu kan hrial ttul hrimhrim mi pawl ansi. Jesuh Khrih ih thla in cam sak vekin nang le kei tla thinlung rual tein nung thlang uhsi. 

A ngaingai ahcun BAWIPA JESUH IH THI LE SA cu pumkhat taktak kan si nak ih hrampi asi. Mirang ttong in Bawipa thi le sa cu “COMMUNION” tiah kawh asi ttheu. Communion timi cu pumkhat sinak tiah a sullam a um asi. Sang hlom khat kan hlawm tlangih Bawipa ih khuat-haai tla kan hlawm tlang nak thawngin Khrih thawn pumkhat kan cang asi. 

Nan za teih parah Pa le Fapa le Thlarau Thianghlim in thlawsuah lo toih hram seh. Amen.