Rah Ttha le Rah Sia (sim tu Rev. Fr. Lucas Tha Ling Sum) June 23, 2021

Rah Ttha le Rah Sia

Thuthangtha sim tu Rev. Fr. Lucas Tha Ling Sum

June 23, 2021

Siarding: Seem 15: 1-12, 17-18; Saam 105: 1-4, 6-9 (8); Mt 7: 15-20.

            Khrih ah duhdawtmi u le nau, Pathian in thlawsuah lo pe hram seh, tiah RVA ihsin thlaza ka lo camsak a si. Tui tlawngkai ni thum, June thla ni 23 sun ih kan siar mi Baibal Mt 7:15-20 sung ih ta thawn pehpar aw in ‘Rah Ttha le Rah Sia” timi thulu ah hmang in Pathian thu ruat khawm uh si. Hmaisa ah Baibal ka ron siar ding:

Mt 7:15-20.

            “Profet deu pawl khi ralring uh; an lenglam cun tuu bangin nan lakah an tlang; asinan an sunglam cu cinghnia hrang vek an si. Mi ziangvek an si, ti cu an tuah mi in nan thei ding. Hlingkung ihsin sabit a rah dah lo; lenhling khal in theipi a rah dah keel lo. A harh dam mi thingkung ttha cun rah ttha a rah ih thingkung ttha lo cun rah sia a rah. A harh dam mi thingkung cun rah sia a rah thei lo ih thingkung ttha lo cun rah ttha a ra thei ve lo. Cule rah ttha a rah lomi thingkung cu an hau ih meisa sungah an paih ttheu. Cuvek in profet deu pawl cu an tuahmi in, nan theithiam ding.”

            Zum tu u le nau, Bawi Jesuh in a dungtlun tu pawl, bum an ton lonak dingin le rah ttha an rah theinak dingah ralrinnak a pek a si. Profet pawl khi va ralring uh, a ti. Ziangruangah tilen, profet deu pawl an um ruangah a si. Theih awl ding zawngih kan sim asilen, thuthangttha simtu le zirhtu tampi an um nan a tak ih thuthangttha sim tu an si thluh lo. Leitlun pumcawmnak le hminthannak duh men ih thutthangttha phuang tu an um. Curuangah ralring ten um uh, a ti nak a si.

            Cuti asilen profet ngaingai le profet deu pawl cu ziangtin thlei dan theih an si? Bawi Jesuh in an rah in zoh uh, a ti. Hi “rah” kan timi te hi ziang so a si? zum vek ih nun asilen cuih nuncan ziaza cu “rah” tiah kawh theih a si. Bawi Jesuh cun, mi ziangvek an si ti cu an tuah mi in nan thei ding, a ti. Profet deu le deu lo cu an tuah mi lolen an nuncan ziaza in thlen dan an theih a si. 

            Zumtu u le nau, Bawi Jesuh ih san lai ih profet deu tampi an rak tum vek in tui kan san khal ah profet deu thawi bang aw mi Pathian thu simtu tampi an um. Hi kan baibal thianghlim sung ihsin Bawi Jesuh in ralring uh, tiah in sim a si. Kan hnen ih thuthangttha simtu le phuang tu pawl ih nuncan ziaza tthaten, thlir ciau uh si. Ralring ten, um ciau uh si. Thlakhal camsak ciau uh si. Ziangruangah a si, tilen rah ttha a rah lomi thingkung cu an hau ih meisa sungah an paih ttheu a si, tiah Bawi Jesuh in fiangten in sim. Ttih a nung tuk. Curuangah thuthangttha sim tu pawl hrangah siseh miih bum mi kan si lonak ding hrangah siseh, thlacamciau uh si. 

            Cun a pahnihnak ih tuittum kan baibal ih in zirh mi cu rah ttha ra thei dingin zuam uh, ti mi a si. Profet deuh pawl ih bum thei lo dingih ralrin men lawng a tawk hrih lo. Bawi Jesuh in nang le kei rah ttha kan rah lo ding a phang tuk. Rattha a ra lo mi theikung cu an hau ih meisa ah an paih ttheu a si, a ti. Ttongdang ih kan sim asilen zianghman tthatnak tuah mi kan nei lo ih sualnak lawnglawng a tuah tu kan si pang ah cun hell ramah kan feh ding, tinak a si. Hell meisa sungih paih mi silo dingin ralrin a ttul.

            Cutin asilen ziangtin so rah ttha kan rah thei ding? Mitu ih kan thei vek in (1)nak ah profet deu pawl lolen a tak ih thuthangttha phuang lo tu pawl ih dung, thlun pang lo ih ralring tei um ding (2)nak ah thuthangttha kan thei mi le kan zummi nunpi ding (3)nak ah cat lo bang lo ih thlacam ringring ding a si. 

            Rah ttha rah thei dingin Pathian in nan zaten thlawsuah lo pe hram seh. Amen.