Rahtha Rah Ding Cun (sim tu Rev. Fr. Polycarp Thawngte)

Thei/Rahtha Rah Ding Cun

Thuthangtha sim tu Rev. Fr. Polycarp Khaw Nei Thawng

May 2, 2021 (Thosal hnu zarh (5) nak, zarhpi ni

Siarding:Tirh. 9: 26-31: Saam 22: 1Jn 3: 18-24: Jn 15: 1-8.

          Thusim thiam hminthang, mithianghlim cang dingih tawlrel rero laimi, Bp. Fulton J. Sheen in nitlaknak lam ram (ram thangso pawl) ahcun Kross tel-lo Khrih an pom ih nisuahnak lam ram (ram tlasia, thangso lo pawl) ahcun Khrih tel-lo mi Kross an pom a rak ti dah. Harsatnak pomlo Khristian pawl le Khrih tel lo ih harsatnak pomtu Khristian pawl kan ti mai ke. Bawipa amah rori in amah zumtu pawl cun mai thinglamtah/kross phurhih a dungthlun ding a rak ti. Cuih thinglamtah ziang a si ticu kan thei thluh ciami a si. Nitin kan ton, kan tuarmi zoihzaih harsat pawl hi an si. Ziangruangah Bawipa in harsatnak phurhter in duh sak timi hi tuini kan siarmi Thuthangtha thawn kan ruat tlang hnik pei uh.

          Tuini kan Thuthuthangtha Jn 15:1-8 cu Cabit kung thuhla a si ih tuisan Laitlang dinhmun ahcun mi tampi ih theih fiang ol ding a bang. Bawipa in kei cu Cabit kung ka si ih ka Pa cu a cingtu a si; nannih cu a hnge nan si in ti. Ka Pa cun Cabit hnge pawl cu tan tahrat in a thenfai a ti. Cucu an rah tha sinsin, an rah tam sinsin nak dingah a si. Nannih cu ka lo simmi tongkam ruangah thenfai/ tanzo mi nan si in ti. Ahramthok ih kan rel vekin Bawipa in simmi tongkam cu thudik a siih acuih thudik cu harsatnak kan ton ding hrimhrim hi a si. Cuih harsatnak kan tonmi hin rahtha kan rah thei a tul si. Tuhrawng Paska hnu veikhatnak Cathianghlim kan siar theumi hi Tirhthlah, dungthluntu pawlih mission thu a si. Steven a thih hnu cun Khristian pawl hremnak an tuar sinsin, harsatnak an tong sinsin ih raltlaan dinhmun ah an thleng. Asinan cuih an thlaannak thawngih Thuthangtha an karhzai ter vivo ti kan thei. Cucu si, harsatnak ruangih rahtha tha kan rah tamnak ding zia. 

          Kan dunglam pi ah Covid parih lungawinak tin thu ka rak rel dah zo ih tulai fangih ukawknak ruangih harsat kan tuarmi thu thawn pehpar in ruah tlang bet ka duh. Ramkhel/ramkhelh Naingnganzi politics le tics lo lam cu ka theithiam hnuaihni lo, ka rel duhmi khal a si lo; biaknak lamih kan hruaiawknak le kan ukawk daan pawl khal ram ukawknak thawn a pehtlaih ruangah zumnak thu thawn ka rel duhmi a si. Ralkap uknak a tha titu kan um pang maw cu thei lo, kan um pang khal le kan zumnak thawn a kalh ti cu pakhatnak ah kan thei ding duh a um. Kan Bawipa khalin hruaiawknak, ukawknak thalo si a rak do rero. Curuangah a dungthluntu pawl hnen ah, zo hman sazapa ti hlah uh; kei cun ka rualpi tiah ka lo ko a ti-ih athetpha auhphih hruaiawknak, (tlunlam upa)2 ti ringring ih tihnak thinlung thawi nun khawsaknak hi a rak dokalh a si. Ziangahtile tihnak thinlung in hnangamnak in pek theilo vekin zumnak lamah khal thansonak in pe thei lo a si. Cuihruangah tuitum ih do thlengnak thu ah keimah te ka rak ti rero mi cu Catholic zumtu dinhmun in kan tuah thei daan ding tampi a um. Cu cingih daitei’ kan um men ih kan tuar men a si ah cun rah tha rahtu silo in a-nghe tan ruangih cerh sal tum lo ih caar lan ta mi cabit hnge kan si ding. Meithal kai ih do ding tinak a si lo. Meithal ai-ih kan hriamhrei thazet Rosary kai ih kan donak ding, Maythla thla sunglawi kan thleng thlang. Hmunkip ah duhphorh dingin an au rero bangin kannih in Rosary kai in duh phorh ding kan zuam ve pei uh. RC pawl kan hlawknak hi au ciamco tul lo’n Rosary le Bawipai Thisa leenpinak thawn duh kan phoh theinak a si tin ka ruat nan tu tiang ka hmu ngiangai hrihlo. Kan ram dinhmun kan zoh tikah Biakinn sung, innsung, phayashin hmai ih thlacam ding caan a si nawn lo tin khal ka rak ti rero zo nan kan Falam lam dinhmun tla cu a daidap zet hmang ka ti. Ziangtin hi kan ram ukawknak ruangih harsat kan ton mi pawl hin zumnak, ruahsannak, le duhdawt rah tha tam sinsin in in rah ter thei ding ti hi ruat tlang uh si.

          Anetabik ah cahawk ka duh mi cu zumtui dinhmun ahhin, Kawlram siseh, US siseh, khuiram khal va si sehla Party-1 lawng kha zatek kimih kan tanpi ding a si thei lo; NLD a si khal ah zatek kim ih amah lawng tan ding a si thei lo. Ti duhmi cu ziangvek thil an tuah khal a si le Amen thluh ding a si thei lo; kan zumnaknak thawn a kalhmi parah kan do ding mi a si. Atu kan neh lo ruangah kan baan san ding a si lo vekin, atu kan neh ruangah kan cawl hahdam ding ti khal a silo.  Thil thalo a cem ti a um thei lo. Kan nunsung kan do dingmi, kan phurh dingmi kan thinglamtah, silole, rahtha kan rah sinsin theinak dingih in cep tan rero nak, thenfainak a si.

          Mt 11:6 sungih Bawipa in “Ka parih thinlung thukthunnak a nei lotu cu mi thluasuak an si” a timi lakih a tel ve tu kan si theinak dingah kan zate parah Ziangkimtithei Pathian in thluasuah in pe hram seh. Pa le Fapa le Thiang Thlarau ih hmin in. Amen.