Rahttha rah dingin kawh mi kan si

Rah tha rah dingih kawhmi kan si

RVA a rak ngaitu duhdawtmi nu le pa, u le nau pawl, ahmaisabik ah, kan Bawipa Jesuh Khrih ih zangfahnak, Pa Pathian ih duhdawtnak le Thiangthlarau ih pawlkomnak cu nanmaih hnen ah um hram seh ti’n cibai ka run lo buk hai a si.

Tuini kan siarmi Cathianghlim pawl kan zoh tikah, a voi khat siarnak ta siseh, Gospel thuthangtha ta siseh, mani kan siarmi ih peh lawngte an si. Mani ah, pumsa duhnak le thlarau duhnak timi duhnak daan pahnih kan sungih a um thu kan thei zo. Tuini kan siarmi Rom 8 sungah, pumsa duhnak in thihnak ah in thlenpi ih thlarau duhnak cun nunnak le daihnak ah in thlenpi a ti.

Mani kan siarmi thuthangtha sungah nun thlengnak dingih, mahlemah cekawk fel a thupit zia kan thei zo. Tuini kan siarmi Lk 13 sung khal ah, nun thlengnak um lo cun, hlohralnak a si zia le acuih nunthlengnak  ih rah cu kan nun ih langter ding a thupit zia kan thei sal.

Kan Bawipa Jesuh in saulsirih nunthlengnak a thupit zia cu a rah lomi theipi kung tahthimnak thawn a sim. Cumi tahthimnak ah, “Hmuan neitu pa in a theipi kung cinmi a rah le rah lo a zoh theu ih a rah a hmuh dah lo tikah, hmuan kiltu hnen ah hau mai aw; ziangahso leiram tha a ei rero ding a ti. Cu tikah, hmuan kiltu in ‘Bawipa, kum khatte cu zuah hrih ko aw. A kimvel in leilung ka lai dingih dawm ka burh hrih ding. Cule a hnakum ah rah a rah asile lungawiza a si ding; a rah thotho lo asile hauter leh siseh,’ a ti” tiah a sim.

Hi rah a rah lo mi theipi kung tahthimnak in Pathian ih thinsaunak a langter a si. Theipi kung in zumtu pakhat cio ih dinhmun a khihhmuh. Pathian in milai dinhmun ih in sersiam hi rah tha rah dingah a si. Asinain, Paul ih cakuat sungih kan hmuh vekin kan sung lam ih in uk theu tu daan phun hnih ruangah, rah tha kan rah caan a umih rah thalo kan rah caan khal a um. Rah tha rah ding cun, thlarau ih uknak kan thlun a tul. Pumsa uknak lawng kan thlun tikah, rah tha kan rah thei lo. Rah tha rah ding cun, thlarau ih ukmi kan si a tul. Thlarau ih ukmi pawl ih rah cu Paul ih cakuat mi thotho a simi Galati cakuat sungah fiang zet in kan hmu thei. Cuih rah pawl cu: duhdawtnak, lungawinak, hnangamnak, thinsaunak, mi zangfahnak, thatnak, rintlak sinak, nunnem tangdornak le sup theinak tla an si(Gal 5:22).

Rah tha a rah lo tu cu hau kan si mai ding. Asinain, kan hrangih Pathian zangfahnak a tumzia cu dawm phunphun burhih theipi kung a tuamhlawm rero tu, hmuan kiltu pa dinhmun ah a Fapa neihsun kan Bawipa Jesuh Khrih in run thlah sak a si. Sual sungih a tla zo mi le pumsa duhnak ih a uk zo mi, milai in rah tha rah ding hi thil ol a si nawnlo. Curuangah Pathian in Fapa Jesuh Khrih in peknak a si.

Jesuh Khrih thawn kan pehzom lo ahcun, ziangtik hmanah rah tha kan rah thei lo ding. Rah tha kan rah thei ringring nak dingah, Jesuh Khrih in amah le amah in pek lawng si lo in, kan hrangih dawm thatha a simi Sacrament pawl khal in pe bet a si. Ziangtluk lungawi za so a si.

Leipar kan nun sungah, beidonnak a phunphun kan tong ko ding. Kan kiang le kan kap kan zoh tikah, buainak a phunphun kan hmu theu fawn. Cumi lakah, rah tha rah thei ringring ding hi a ol lo lawlaw. Huatawknak lakah, duhdawtnak rah tu ding kan si; riahsiatnak lakah lungawinak rah tu ding kan si; beidonnak lakah hnangamnak rah, tuahmawhnak lakah thinsaunak rah, siatnak lakah thatnak rah, mi puarthau pawl lakah nunnem tangdornak rah, hi rah tha pawl rah ding ih kawh mi kan si.

Cutiih rah tha rah thei ding cun, Jesuh Khrih thawn kan pehzom awk ringring a tul. Jesuh Khrih thawn nitin a pehzom aw tu si kan zuam cio pei.

 

Add new comment

2 + 8 =