Ralrinnak ihsin Timtuahnak ah (sim tu Rev. Fr. Dominic Hnin), November 24, 2020

Ralrinnak ihsin Timtuahnak ah

Thuthangtha sim tu Rev. Fr. Dominic Hnin

November 24, 2020

Siarding: Rev. 14:14-19; Ps. 96:10-13 ; Lk 21:5-11

• Tuisun ih kan siarmi Bible hmaisabik cu Thuphuan sungta a si. Thuphuan hi theihthiam harzet Bible a si. Tuisun kan siarmi Bible catlang cu Thuphuan 14:14-19 a si ih leilung tlun rawl khawm caan thu kan hmu.

• Kan thu rel ding mi fiang deuh ding ah himi sungih a telmi vancung minung pawl paziat ti kan zoh pei. (1) Milai fapa vek a si ih mero parih a totu, (2) Biakinn sung ihsin a ra suak hmiasabiktu vancungmi, (3) Biakinn sung ihsin favah thawi a ra suaktu vancungmi, (4) meisa tlun ih thuneitu vancungmi ti-in pali kan hmu.

• Cui pali lakah mero parih a totu le biakinn sung ihsin a ra suak hmaisabik tu cu kop khat in zoh sehla, neta pahnih khi kopkhat in zoh sehla kan fiang deuh ding.

• Hmaisa kop khat in fang an at ih neta kop khat in sabit an lo ii an sawr. Himi in caan netabik ih thutthennak a khih hmuh.

•  

• Mero parah miai fapa vek a to ka hmu a ti. Himi cu Daniel 7:13 sungih kan hmuhmi vek a si. Dan 7: 13 ahcun "minung a bangmi pakhat ka hmu. Mero par in a ra ih kumkhua ih a nungmi hnen ahcun a feh ih a hnenah a thleng" ti a si. Mero parih a totu hi Jesuh a khih hmuh hmang kan ti lai ah a dang vancungmi thu a rawn ngan bet ruangah le cui vanungmi in thu a peknak kan zoh tikah Jesuh a si hmel lo. Si le, zoso a si ding? Vancungmi pakhat in kan hmu. 

• Cui mero parih a totu cun a kut ah namkul - favah - hriamzeet a keng. Biakinn sung ihsin a ratu vancungmi ih thupeknak ruangah mero parih a totu cun rawl cu a at ih rawlcuam ah a ret. Mk 4:29 ah "a fang a cut tikah hnattuantu pa in fang at caan a cut ruangah fangatnak favah in a fang cu a at" a ti.

• Mt 13:39 ahcun "rawl khawmtu pawlcu vancungmi an si" ti in kan hmu. Mero parih a totu vancungmi in fang a at ti thu kan hmuh tikah a minung pawl thu tthen dingih a rat u Bawipa, mittha pawl, fang ngai pawl, cu vancung ih a hruaitu ding Bawipa ih hmuihmel a keng. Curuangah mero parih totu vancungmi cu vancungmi menmen siloin, a minung pawl lawrkhawm dingih a ra mi Bawipa a si. Misual pawl thutthennak ih kawh an si hlanah mittha pawl cu lawrkhawm an si ding.

•  

• Cun khat lamah, neta ih a ra langtu vancungmi pahnih cu sabit rah help dingah le sawr dingah an ra ti kan hmu. Himi catlang hi Joel ih simsungnak cu run phorhsuahsal a si tikah Pathian ih thin hengnak thu lam a si.

• Joel 3:13 ahcun "rawl lak a cu, nan namkawi suah uh; Ra uh, sabit ra sawr uh. Sabit sawrnak khur a khat, ralca beel an liam. An sualnak a nasa ngaingai a si." a ti. Hitawk hmun ahcun rawl khawmnak le sabitti sawrnak hmuithlam cu Pathian ih ralkap pawl le Judah parih thu poimawh thlentu pawl ih doawknak a khih hmuh.

• Is 63:1-6 sungah Pathian ih thin hengnak cu sabit sawrnak thu thawn a tahtthim. Sabit ti le milai thisen cu rualran in a hmang. Pathian in amah dodaltu pawl cu sabit bangin a sawr thluh ii, a ral pawl ih thisen cu sabit ti bangin a li demdem thei ti kan hmu. Curuangah himi sabit sawr timi thucu Pathian ih thinhengnak ni, Hellram a khih hmuh.

• Rev. 14:7 sungah "Pathian upat uhla a maksaknak thangtthat uh! Ziangah tile miphun kip an thu rel nak caan a thleng zo. Van le Leilung, tifinriat le cirhtiput hmuahhmuah a tuahtu kha bia uh!" ti in kan hmu. Ti duhsan cu thutthen dingin Bawipa cu a ra ding tiah ralrinnak pek an rak si zo ih cui ralrinnak pekmi, thukam ciami cu tuah a famkimter a si.

•  

• Thuthangttha kan siarmi lam kan zoh a sile, Luke ih hrang ahcun caaan netabik thu le hla a si. Caan netabik kan ti tikah thihnak, thutthennak, Vancungram le Hellram thu asi. Tuisun ih kan siarmi Thuphuan thawn kan zoh tlang a sile netabik caan thu an si veve.

• Thuthangttha ngantu Luke cun Jerusalem Biakinn pi a siatral thluh ding ti thu simphah in ralrinnak a pek. Thuphuan cun rawl khawm caan le Pathian ih thinheng caan thu sim in ralrinnak in pek. "Tu ih na hmuhmi thil maksak le mawinak pawl cu sankhuk daih a si lo" ti mi an langter.

• Cuti asile sankhuk daih cu khuitawk in, ziangti-in kan ngah ding? Bawipa in "ii zum uh, keimah cu vancung ihsin a rungttummi nunnak sangreu ka si. Hi sangreu a eitu cu kumkhua an nung ding (Jn 6:35, 41, 51)" a ti. Jesuh kan zumnak le a fialmi kan tuahnak cu kumkhua nunnak hrangah a si.

• "Hmailam hrangih zumnak a umlo ahcun tui caan khalah hnattuan a a ttul nawn lo" ti a si. Kan hmai lam hrang kan ruah tikah zumnak a neitu ih hrang ahcun tui mithmuh theih hmuahhmuah cemral hmanseh, kan thlarau cu sankhuk a nung ding ti kan zum ruangah kan thlarau hrangah "timtuahnak" kan neih a ttul. Tu ih kan hmuh le kan theihmi ralrin peknak pawl cu cui kan thlarau hrangih timtuah dingih sawmnak a si.

• Curuangah tui caan ih thil thleng pawl parah lung hlo lo te-in, himi thil thleng pawl cu ralrinnak ah hmangin, netabik caan, thutthennak caan hrangah timtuah awcia uhsi.