Ralthatnak Thuthup (sim tu Rev. Pius Cung), December 14, 2020.

Ralthatnak Thuthup

Thuthangtha sim tu Rev. Fr. Pius Kei Lian Cung

December 14, 2020.

Siarding: Mipum24:2-7,15-17;   Saam 25; Mt 21:23-27.

          RVA Falam Service insin, thuthangtha  ngaitu u le nau pawl Jesuh krih ih pekmi remdaihnak, lungawinak, nan parah thleng hram seh. December 14, niih kan siarmi Bible cangpawl cu Mipum 24:2-7,15-17/ Saam 25/ Mt 21:23-27/ tla an si. Kan siarmi pawl sungin “Ralthatnak Thuthup” thu ruat khawm u si. Leipar nitin kan nunnak ahhin thutha le thusia tampi a um. Zapi ih theihtha an um ih, mipi ih theih tullo le theih thalo khal tampi an um. Thlarau thu khalah zapi ih theih awlte Pathian thuhla tampi a um vekin mihrek khat lawngih theihmi, comi, thlarau thuthup tampi a um ve. Thlaraulam thuthup pawl cu, mipi ih theih ding sian lo ruangih thuhmi an si lo.  Zumtu kan zate ih kan theih tul zetmi thuthup, thuthuk an rak sisawn. Kan theih a har deuh ruangah thuthup tinak a si ih, zapi hmaiih phuanglang rero ding kan si. Tuisun ih kan Bible siar mi pawlkhal hin thuthup tampi in zirh. Thlarau mit meng in ruat tlang, zir tlang u si. 

          1. Mipum 24:5-6; ah “Israel mi pawl ih puanthlam cu an mawi a si. A tluantluan ih ciin mi Ungkung bang in, tiva kiang hmuan pawl an bang. Bawipa ih ciinmi khukthli vek, tidai kiangih sidar thing vek an si” tin kan siar. Himi hi Balaam ih tongmi a si ih Bawipa Pathian ih fial mi a si. Jordan tiva ih nisuahnaklam Moab hmunrawn ah Isarael mipi pawl cu riahbuk sam in an riak. Cucu Moab ram Siangpahrangih Balak in a hmuh tikah a tih ih, a thin a phang. Balak cun Israel pawl camsiat tu dingah Balaam cu a sawm. Balaam cun Isarael pawl camsiat ding aiah, a lawm a thangthat. Balak le Balaam cun Peor tlangzim in Israel cu an hei cuan. Balak cun ral tumpi in a hmu ih a tih. Balaam cun Pathian miphun thiang a hmu ih an mawinak le an thatnak a hmu. Zumtu le zumlo tu pawl kan danawk nak cu himi ciah hi a si. Kan hmuh, kan ton mi hi a bang aw konan, hmuhdan le cohlan dan cu sun le zaan tlukin a dang aw viarviar siko. Balak nih ral ih a hmuh mi cu Balaam cu duhnungza in a hmu. Balaam in ziangruangah duhnungza in a hmuthei tile thuthup a thei. Pathian ih zirhnak, simfiangnak a co ngah. Balak cun a siangpahrang thuneihnak le laksawng a phunphun hmangin Balaam hnenah Israel pawl camsiat ding vei thum rori a hnek, a fial rero nain, Balaam in a duh hrimhrim lo. Raltha ten a el men. Ziangruangah tile Siangpahrang Balak hnak in Pathian Bawipa thu a ngai sawn. A tluantluan te, artlang ih buk an sak mi cun Israel pawlih lungrual zia a lang. Tiva kiangih, ungkung, khukthli kung le sidar thingkung vek an sinak cu furthal ti loin a hriing dildel, hnemdai a pe, uaini le ro ni a nei lo, hninghno zet in Pathian miphun cu a nung ringring tinak a si. Kan zumnak le kan thlarau nun hi uaini, carni, um lo in nungter ring2 usi. Hnahthar cerhter in hnemdai petu si thei hram u si. Tiva kapih thingkung cun thal niling a tih lo. Ka hram ah tidai tampi a um ti mi thuthup a thei ih a ral a tha. Balaam in Israel pawl a tih lo, Pathian miphun an si timi thuthup a thei ngah. Balaam in Siangpahrang Balak khal a tih lo, Pathian ka lamah a tang ti fekten a thei. Zumtu u le nau kan nunah hin tihmi kan nei maw? ziangso tih ding a um? Bawipa ih thutum, thuthup hi hmufiangtu, congahtu sihram usi. A uai, a car lomi nunnak kan ta a si. Amen.

          2. Mipum 24:17; “Hmailam tikcu caan sung khi ka hei zoh ih, Israel miphun ka hei hmu a si. Cui miphun sung ihsin, Arsi bangtuk in a tleumi Siangpahrang a suak ding. Deirel arsi bang in Israel miphun sungih sin a suak ding”. Balaam hmang in Pathian ih tongmi a si. Pathian ih miphun thiang Israel cu an mawi ih, an nungringring timen in a tawk hrihlo. Hmailam ih an sunlawinak ding khal thukamnak an co ngah. Deirel arsi bangih tleuding, mawi ding Siangpahrang khal an lak in a suak ding. Cucu Jesuh Krih kan Bawipa  a si. Israel pawlih mawinak, thatnak cu Balaam in a hmungah ih hmailam ih an sunlawi sinsin ding khal a hmu cia. A va sung lawi ve. Culai ah Balak cun thatnak lam zianghman a hmu lo. Tihnak in a khat, thuthup a nei lo. Zumtu krifa pawlih kan tulzet mi khal hihi a si. Tui kan dinhmun le kan sinak ahhin Bawipa pekmi duhnungza le mawinak, thatnak tampi kan hmu thiam a si le hmailam ih sunlawinak ding khal tampi kan hmuhbet sin ding a si. Mai dinhmun ih lungawi thei lo, mai sinakih Pathian remruat tithei lo krifa tampi cun hmailam ih sunlawinak thawm huham hmuh sin ding cu a har zet. A thup aw rero ding si ko. Balaam hnenih thuthup zirhtu Bawipa in kannunnak ih thatnak, mawinak tampi hmuthei dingin in zirh hramseh. Hmailamih hmuhton dingmi sunlawinak le thawmhuham khal in fiang ter hram seh. Deirel arsi bangih hlaw pempem ih a thleuvang mi Jesuh kan nei. Kan mah khal arsi bang tuk in kan tleuve lai ding a si. tih ding a um lo, raltha u si.

          3. Saam 25:7 “Ka no laiih ka mawhnak le ka thil tisualmi pawl i ngaidam hram aw. A thleng aw dah lomi na duhdawtnak le na thatnak ruangah, maw Bawipa kei hi i hngilh hram hlah aw” tin kan siar. Mawhnak le sualnak nei lawnglawng kan si. Ningzah mualphonak le cawhkuan tuartlak lawngte kan si. Sihmansehla mawhnak, sualnak, zingzahnak le cawhkuannak pawl hi kumkhua in an hmun lo. Kumkhua ih a hmunmi cu Bawipa ih duhdawtnak a si. Ziangtik hman ih thlengaw dah lo mi cu Amai thatnak lawng a si. In duhdawt ih, in ngai thiam, a thatnak in in cei mawi. Ka tlaklo, ka thiamlo tiih dungsip ih thup aw rero ding kan si lo. Bawipaih, in ngaithiamnak le in cawisannak thuthup tepngah in raltha u si, hmai nor u si. 4nak/Mt 21: sungih, kan hmuhmi cu; Jesuh cu Biakinn sungah thu a zirh rero laiah puithiam upa pawl le hotu pawl an ra ih, “ziangah so hibangtuk thil hi na tuah? Zo in so thu a lo pek?” tiah an sut. Jesuh in “Johan ih Baptisma a pek kha Pathian thu in maw, minung thu in so a pek” tiah a sut sal. Pathian thu in, ti ding le Jesuh an tih, minung thu in ti dingah le mipi an tih. ‘Kan thei lo’ an ti. Jesuh in kei khal zothu, ziangthu in ka tuah ti ka lo sim lo ding a ti. Mitam sawn an sinain Jesuh a mah pakhat lawng hman an tih. Thuthup an thei lo, an nei lo. Jesuh cun Biakinn pi hi ka Pa ih inn ti a thei, ka inn a si ti khal a thei ih a ral a tha. Tih ding a nei lo. Thu a ra suttu pawl siseh, misenpi khal siseh a tih lo lawlaw. “Pa ka hnenah a um ih a Mai duh mi ka tuah a si’’ timi thuthup fekten  a kai. Raltha le hnangam in a tuan dingmi a tuan, a sim ding mi a sim. Pathian ih rundamnak thukammi cu Jesuh Krih ah a famkim ih, cuithucu kan nunnak ih nunpi ding le midanghnen ih phuang sin ding in Thiangthalrau in in umpi, in zirh. Thuthup theifiang vivo in raltha in hmai nor u si. Thuthangtha ngaitu le simtu kan zate parah Bawipa ih in duhdawtnak, in Rundamnak, lungawinak le ralthatnak thluasuah kumkhua in hmun camcin hramseh. Pa le Fapa le Thiang thlarau hmin in, Amen.