Rawl ei caan a nei lo nain, thlacam caan a nei (Rev. Fr. Peter Zin), January 23, 2021.

“Khrih Hrang ih Aat”

Thuthangtha sim tu Rev. Fr. Peter Zin

January 23, 2021.

Siarding: Hebru 9:2-3, 11-14; Saam 47: 2-3,6-9; Marka 3:20-21.

           “Jesuh cu a aa zo,” tiah mi in an ti ruangah a sungte pawl in amah kilkhawi dingin an feh.” 

          RVA in thuthangṭha a ngaitu duhdawtmi nu le pa, u le nau pawl, nan zate hnen ah Bawipa ih pek mi thlarau thazaang le hnangam daihnak pawl cu um ringring hram seh. Tuni January 23, 2021 (Zarhte) ni ih kan siar ding mi Bible pawl cu Hebru 9:2-3, 11-14, Saam 47: 2-3,6-9 le Gospel cu Marka 3:20-21 pawl an si. Kan siar dingmi Gospel cu a tawi zet te asi ih himi Gospel tawite siar in tuni ah thlarau thazaang kan lak tlang ding in ka lo sawm.

Marka 3:20-21, ka siar ta ding.

20 Cule Jesuh cu inn ah a tlung. A hmaisa vek thotho in mi tam ngaingai an ra ih Jesuh le a dungthluntu pawl cu rawl ei caan hman an nei lo. 21 Cuih thu cu a sungte pawl in an theih tikah, “Jesuh cu a aa zo,” tiah mi in an ti fawn ruangah amah kilkhawi dingin an feh.

          Bawi Jesuh hi minung pawl ih rundamnak hrang a hnaṭuannak caan hi a tawi zet kan ti pei ih (kumthum lawng a si ih) a hnaṭuan a tam zet. A caancaan ah cu tuih kan thei mi vek in rawl ei caan hman a nei lo. Hi rawl ei caan hman a nei lo ti a si tikah ka thin sung te ah a suak mi cu rawl ei caan a nei lo nan thlacam caan a nei ringring timi te hi si. Kanmah thawn cu a linglet nasa tin ka hmu. A tlangpi in kan zoh a si le mi tam sawn cu thlacam caan kan nei lo hman ah rawl ei caan cu kan nei ringring. Cuti asiruangah Bawi Jesuh thawn kan bang aw lo nak pakhat cu Bawi Jesuh hrangah thlarau rawl, thlarau thazaang a thupi sawn ih, kannih in thaksa rawl, taksa thazaang hi a thupi sawn ah kan ret lai tinak asi. 

          Hiti vekin rawl ei caan hman nei lo tiangin Vancung Uknak thuthangṭha sim in a um rero tikah mipi in ‘Jesuh cu a aa zo’ tiah an ruat, ‘a aa zo, a hman nawn lo’ tiin an hmu. Bawi Jesuh cu kan thei vek in mifim hmuahhmuah lak ih mifim bik, culawng silo in fimnak ih a hram thoknak khal a si. Asinan minung mit hmuh ah mi aa vek a bang. A tang lam kan siar bet a sile ‘Jesuh cu Beelzebul in a kai zo a si’ tiah an puh mi khal a rak um, ‘khawsia uktu bawi ih huham in khawsia pawl a dawi thei a si,’ an ti. Bawi Jesuh cu Pathian Fa asilole Pathian asinan mi hrekkhat in Satan huham neitu ah an puh. 

          Kannih zumtu pawl a caancaan ah cu Khrih kan zumnak ruangah mi aa kan bang caan asilole mi in mi aa vek ih in hmu caan a um ve ding, a um khal a um rero zo mi a si. Mi Thianghlim hrekkhat pawl kan zoh asile a thok ah mi in a aa zo, a thluak a hman nawn lo ti vek tiang ih mi in an hmu mi pawl khal an rak um ve. Thuṭhimnak ah Lourdes khua ih Bawinu Mary a hmu tu St. Benedette khal cu Bawinu Mary a hmuh nak thu ah a mah le mi dam lem lo a si bet fawn ih a thluak a hman nawn lo vek in a hmu tu khal an rak um. Christian si ruang ih mi ih zohsuam, mi ih hrem tivek khal tampi kan thei ṭheu ko ding. Ziangruangah tile kan tuah mi hi a dik lo, aat hna ah an ruat ih an mah ih zummi, an mah ih tuah mi sawn kha a ṭha sawn ah an ruat. Christian lak hman ah kan nih Catholic pawl in kan tuar deuh bet lai, mi in kan tuah mi hi a dik lo zet, aat hna zet ah a ruattu an um. Kan tuah mi hrekkhat pawl hi zumnak nei lo tu hrangah cu aat hna zet vek a bang. Thuṭhimnak ah kan Pawlpi sungih kan tuah mi hmuahhmuah, kan neih mi hmuahhmuah lak ah a sang bik cu Bawipa Thisa hi a si. Himi hi zumnak tel lo in mit menmen in kan zoh a si le sangreu rang te a si ih a man tla cu kawl ram tangka in hman fangli fangnga hrawng lawng asi. Asinan zumtu pawl hrang ah cu a sunglawi bikmi a si ih lei tlun mi fimfim tampi in thok in khua te bik ih cathim lo bik tiang khuk bil in, lu kun in kan biak. A zum lo tu hrang ah cu aat hna zet vek khi a si.

          Duhdawt mi u le nau pawl, Pathian thu thawn pehpar in mi in mi aa, mi bang lo, a hman nawn lo an lo ti tikah na thin nau hlah, nangmah kha mi in mi aa an lo ti hlan ah kan Bawipa Jesuh Khrih kha a aa zo tiah an rak ti zo a si. Bawi Jesuh in a dungthluntu pawl hnen ah ‘zozo khalin nanmah thah hi Pathian hnaṭuan ih an ruah caan a ra thleng ding’ tiah Johan 16:2 ah a ti vek in mi aa ti lawng hman silo in hrem nak tiang khal kan tuar men thei. Johan 16:1 nak ah cu ‘nan zumnak ihsin nan tluksawn lonak dingah hi thu hi ka lo sim,’ tiah mi ih in dodalnak ding thu pawl in sim cia a si.

          Cun thil pakhatkhat kan tuah tikih aung-min-nak kan ngah nak dingah, kawl ṭongin yo-tut-chin, a-yo-a-mo an timi hi a rak ṭul zet ṭheu. Thuṭhimnak ah guitar tum thim a duh zet tu pawl kan zoh a si le, mi hrek khat cu a thim cu an duh zet nan a caancaan te, an man caan asilole an peih caan lawng ah an tum, mihrek khat cu rawl ei caan hman thei lo, thil dang tuah ding hman thei lo, guitar tum ah yo-tut zet in, mi aa vek tiang bang in cumi guitar lawnglawng ruat in a tum tu khal an rak um. Cumi minung phun hnih kan zoh tik ah an thimnak khal a bang aw thei hrimhrim lo. Aat thlak zet tiang in a tum ringring tu cu an thim deuh rengreng. Hla sak lam ah khal siseh, leknak (aa-ka-sa) lam ah khal siseh, ziangziang khal ah siseh aat thlak khop thiangin a tuah tu, a ṭuantu pawl hi hlawh tlinnak an hmu tam deuh ṭheu.

          Cuvek thotho in Pathian lam hnaṭuannak khal ah a si. A caancaan teah veikhat veihnih te ṭuanve, tuahve, a caancaan te lawng ah thlacam ve tu pawl le, Pathian thu lawnglawng ruat ih nung tu khal cu an bang aw thei ve lo. Pathian lam khal tuah phahphah, mi thil khal fir phahphah, ṭongkam in siseh tuahnak in siseh mi hrangah a ṭha lo mi tuah phahphah tivek in kan um caan ah ziang thawng kan bang ti si le guitar tum cu thiam duh zet nan a caancaan te, peih caan te lawng ih guitar tum tu vek kan bang ih thlarau lamah ṭhanso nak a um thei ngaingai lo a si.

          Kan Bawipa Jesuh Khrih vek in Vancung Uknak hrangah mi ih mi aa tikhop tiang in thilṭha a tuah ngamtu siding in zuam cio uh si. Jesuh Khrih hrangah, asilole a mah ruang ah mi ih mi aa an lo ti a sile riah sia lo in lungawi thei sawntu si ding in zuam sawn uh si. Jesuh Khrih hrang ih aat cu leitlun fimthimnak men ih fim hnak in a ṭha sawn ih a mah hrangih kan aat man vancungah kan laksawng cu a tum ve ding asi.

Fr. Peter Lal Zin Thang (Hakha Diocese)