Rawl Khawmtu Ding Dilnak le An Hnaṭuan (sim tu Rev. Fr. Peter Zin), December 5

“Rawl Khawmtu Ding Dilnak le An Hnaṭuan”

Thuthangtha sim tu Rev. Fr. Peter Zin

December 5, 2020 

            “Rawl khawm ding tampi a um nain a khawmtu ding minung an malte. Rawl lak ding neitu bawi hnenah rawl khawmtu ding milai tampi thlah dingah thlacam uh… Feh uhla, ‘Vancung Uknak a nai zo,’ tiah va sim uh. Mina damter uh, mithi thotersal uh, phaarnat a neimi pawl damter uhla khawvang pawl dawihlo uh. Man lo in nan ngahmi kha man lo in va pe uh.”

           Bawi Khriah ah duhdawtmi nu le pa, u le nau pawl, nan dam cio maw? Nan umnak cio ah Pathian in lo kilkhawi hia seh la nan hnenah hnangam daihnak um ringring hram seh. Tuni December 5, 2020 (Zarhte ni) ah kan siar ding mi Bible Cathinghlim thawn pehpar in rawl khawmtu ding asilole Pathian hna a ṭuan tu ding tampi an um thei nak ding in thlacam a ṭulnak le rawl khawmtu ding pawl ih hnaṭual pawl kan ruat tlang dingin le thazaang kan lak cio ding in ka lo sawm duh. Kan siar ding mi Bible catlang pawl a hmaisa ah ka sim ta hrih ding. A veikhat siarnak ah Isaiah 30:19-21, 23-26 tiang asiih hmailam caah cu ṭahnak a um nawn lo nak ding, damnak, hlawhtlinnak nak le lungawinak pawl a ra nak ding thu a sim ih ruahsannak nei dingin simmi thuthang ṭha a si. Saam kan siar dingmi ah Saam 147:1-6 tiang, Bawipa thangṭhatnak hla a si ih, a sawnnak ah cu ‘Bawipa hnen ah ruahsannak a nei tu pawl cu mi lungawi an si’ tiin a si. Gospel kan siar ding mi cu Matthai 9:35- 10:1, 5a, 6-8 tiang a si.

          Tuni kan siar ding mi Gospel sungah ziang kan hmu thei ti si le: Bawi Jesuh cu khuapi ah siseh, khuate lam khal ah siseh a tlawng vivo ih a fehnak khua tin ah an sinakok ah thu a zirh, vancung Uknak Thuthangṭha a sim ih natnak le damlonak phunphun a neitu pawl a damter vivo. Misenpi pawl a zoh tikah a zangfah hai. Ziangruangah tisile ‘khaaltu nei lo tuu vekin awloksong in an um’ a ti. Curtikah Bawi Jesuh in a dungthluntu pawl hnenah thucahnak pakhat a nei ta asi. Cuih a thucah mi cu ziang a si tisile: “Rawl khawm ding tampi a um nain a khawmtu ding minung an malte a si. Curuangah rawl lak ding neitu bawi hnenah rawl khawmtu ding milai tampi thlah dingah thlacam uh,’ ti a si. Himi rawl khawmtu ding asilole Pathian hnaṭuantu ding hi an tam tuk zo, a tawk zo ti hi a um thei lo mi a si. Ziangtik caan khal ah siseh kan ṭul ringring mi a si. 

          Tu nai te asilole tu hrawng kan tipei ih, kan mah Hakha Diocese siangbawi pawl kar lak ah thu ruahawknak mal lai a um mi pakhat cu kan diocese ah hmailam caan ih siangbawi a cang tu ding hi kan mal vivo ti hi a si. Hi thu kan ruahawknak a hrampi cu Pyin Oo Lwin ih kan siangbawi tlawng ah Hakha Diocese in Brother pakhat hman an um lo ti thuthang thawn pehpar in thu kan ruahawk thok nak a si. Ziangruangah tile a hlan ah Pyin Oo Lwin ah siseh, Yangon ah siseh a tlangpi in kan zoh a sile Hakha Diocese in siangbawi tlangkai tu Brother pawl hi an tam bik ringring dah ṭheu asi. Asinan tu kum cu Pyin Oo Lwin kan siangbawi tlawng ah Hakha Diocese in Brother pakhat hman an um lo ti a si. Ziangruangah siangbawi tlawng a kai tu an mal vivo ti cu kan ruat vivo a si le a thu hla tampi a um ko ding. Tu ni ah ka sim duh sawn mi cu Pathian hna ṭuantu ding, rawl khawmtu ding tampi thlah an si thei nak ding ah ziang kan tuah ding. Kan tuah ṭul mi le kan tuah thei mi tla tampi a um ko ding, asinan a hmai sabik ih kan tuah ṭul mi cu ziang asi pei tin kan ruat tikah: hnaṭuantu ding an tam thei nak dingah Bawipa nih ziang si tuah uh in ti timi te kan ruat ṭul ding tin ka zum. Kan Bawipa ih thucah cu; “Rawl khawm ding tampi a um nain a khawmtu ding minung an malte a si. Curuangah rawl lak ding neitu bawi hnenah rawl khawmtu ding milai tampi thlah dingah thlacam uh,’ a ti a si. Bawi Jesuh ih in caah mi vek in a hmai sabik ih kan tuah ṭul mi cu ‘rawl lak ding neitu bawi hnenah rawl khawmtu ding milai tampi thlah dingah thlacam’ nak hi a si. Duhnak taktak thawn thla kan cam a sile cu thla kan cam vek in Pathian in a ṭha bik in in pek ding, in hruai ding a si.

          Cun a pahnih nak ih kan sim duh mi cu Bawipa ih a hril mi a hna ṭuantu ding pawl ih hnaṭuan thu a si. Bawi Jesuh in a dungthluntu pawl a hril ih hnaṭuan ding ah thucahnak thawn a hlah hai. “Feh uhla, ‘Vancung Uknak a nai zo,’ tiah va sim uh,” ati. Hnaṭuan ding in Bawipa ih hril mi pawl ih a hmai sabik hnaṭuan cu ‘Vancung Uknak thu’ sim hi asi. Vancung Uknak a nai zo, ralring in um ringring uh tiah sim ding kha a si. Cun ziang si a cah bet  tisile: “Mina damter uh, mithi thotersal uh, phaarnat a neimi pawl damter uhla khawvang pawl dawihlo uh,” ati. Hi tawkah thlarau lam kha a thupi bikin kan zoh ding ah ka duh. A si, Pathian in a duh a si ah cun kan taksa damnak le Lazaruh a tho ter sal vek in thosalnak khal a si thei ve thotho. Asinan cumi Pakhat lawng kan zoh, kan ruat a si ah cun, Christian pawl na lo le thi nawn lo in maw kan um ding? A cang thei pei maw? Curuangah himi Bawi Jesuh ih a cah mi kan zoh tikah thlarau lam in kan zoh, kan ruat ding ah a ṭulnak a si. Taksa damnak hnak in, thlarau damnak hi a thupi sawn. Taksa nunnak hnakin , thlarau nunnak hi a thupi sawn. Curuangah Bawipa ih a thlahmi a hnaṭuan tu ding pawl, rawl khawmtu ding pawl ih hnaṭuan cu minung pawl ih thlarau harhdamnak le nunnak hrang hi a pakhatnak a si. Cun tuni ih kan siarmi sungin a netnak ih a cah ta mi cu ‘man lo in nan ngahmi kha man lo in va pe uh,’ ti a si. Pathain hna asilole thlarau lam hrang hna kan ṭuan tikah sumdawng pawl vek in paisa ngah ding, a miat ngah ding kha ruat lo in kan ṭuan a ṭul a si. 

          Duhdawt mi nu le pa u le nau pawl, lo nei tu kan Pathian ih hmuan dum sungah hnaṭuan tu tampi an um thei nak ding hrangah lo neitu Pathian hnan ah dil cio uh si. Cun a hril mi a milai pawl khal in an ṭuanvo kha ṭha tein an ṭuan cio thei nak ding hrang khal ah thlacam sak cio uh si tiah ka lo sawm duh. A ngai tu nan zaten Pathian in lo thluasuah hram seh

Fr. Peter Lal Zin Thang (Hakha Diocese)