Relhnak Thabik (sim tu - Rev. Fr. David Kap Cin Mang) February 10, 2023

Relhnak Thabik

Thuthangtha sim tu - Rev. Fr. David Kap Cin Mang

February 10, 2023 (Friday)

Siarding: Gen 3: 1-8/ Ps 32: 1-2, 5-7/ Mk 7: 31-37.

Mk 7: 31-37.

Nan rak dam cio ko maw? RVA Falam Service ihsin cibai ka run lo buk hrih hai a si.

Kan Bawipa Jesuh Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu nanmaih hnenah um hram seh law!

Tui tum ah “Relhnak Thabiak” timi thulu thawn hlawmawknak run neih ka duh a si.

Hmaisa ah tuini a voikhatnak ih kan siarmi Cathianghlim ka run lo siarsak ta ding: Semtirnak 3:1-8

Cun Pathian ih tuahmi hmuahhmuah lakah rulpi cu a hrokhrawl bikmi ramsa a si. Rulpi cun nunau hnenah, “Hmuan sungih thingkung pakhatkhat ih rah nan ei lo pei tiah Pathian in a lo ti ngaingai maw?” tiah a sut. Nunaunu cun, “Hmuan sungih thingrah hmuahhmuah kan ei thei ko,” asinain hmuan laifangih a ummi thingrah cu kan ei thei lo, ziangahtile a cuih thingrah cu “Nan ei lo pei; a tham khal nan tham lo pei, nan ei asile nan thi ding a si, tiah Pathian in, in ti,” tiah rulpi cu a ti. Rulpi cun, “Cutin a si lo, nan thi hrimhrim lo ding. Nan ei asile nan ei ni in nan mit a vang dingih Amah Pathian vekin a tha le a sia theihthiamnak nan nei ding, ti kha Pathian in a theih cia ruangah a lo khamnak a si,” tiah nunau hnenah a sim. Cuticun nunaunu in hmuan laifangih thingkung mawi zia le a rah thawt ding zia cu a hmu ih fim cu ziangtluk duhnungza so a si ding, tiin a ruat. Curuangah thingrah cu a lo ih a ei. Cuih hnuah a pasal a pek ih anih khalin a ei ve. Thingrah an ei theh ve tein an mit vang in theihtheinak an nei ih lawngte ih um an si kha an thei aw. Curuangah theipi hnah an thitkhawm ih an hup aw. A cuih zanlam simnem ah Bawipa  Pathian cu hmuan sungah a ra. A rat thawm an theih tikah a hnen ihsin hmuan sungih thingruul lakah an relh.

Duhdawtmi u le nau pawl, mitu ih kan run siarmi sungah milai sualnak sungih an rak tlaknak le cuih sualnak ih rah hmaisabik thuhla kan hmu thei a si. Cuih rah cu ningzahnak a si. Adam le Eve khal an sualnak a vun theihawk vete’n an ning a zak ih an relh ti asi.

A tha le sia theihtheinak thingrah timi hi ziang a si pei timi hi ruah awm zet a si ti’n ka hmu. Hi ka ruah tikah ka thinlung sungih ka pawl suakmi cu, Pathian in a sia mi zianghman a sersiam lo timi hi a si. A sersiam mi hmuahhmuah a zoh tikah a tha ti’n a hmu ti a si. Curuangah a thalo mi thil, a silole, a sia mi thil cu sualnak le sualnak ihsin ra suakmi pawl lawng an si tinak a si.

Adam le Eve khal in khai thingrah an ei vete’n an vun fiang puppi mi cu, an sualnak le sualnak ih rah kha a si mai. Khai sualnak ih siatsuah hmaisabik mi cu zalennak a si. Pathian hmai ah zalen zet ih tlang thei nawn lo’n ningzahnak le phuhrungawknak thawn an khat tikah, relhnak hmun an hawl a si.

A tanglam kan vun siar vivo a sile, phuhruangawknak ihsin a rami thil thuhla kan hmu thei. Cumi cu, khat le khat parih sual puhawknak a si.

Tuisan khal ah milai daan cu a danglam cuang lo. Ruahnak famkim nei mi kan si cun, thil tha le tha lo, tuah ding mi le tuah lo ding mi thil kan thleidang thiam thluh ko. Cumi thei nacing in, tuah dingmi tuah duh lo’n tuah lo ding mi sawn kan tuah duh theu.

Cuti’n tuah dingmi tuah lo’n tuah lo dingmi sawn kan tuah tikah, Pathian hmai ah kan ning a zak ih kan phuhrung aw ih amah pan ding hnakin a hnen ihsi’n tlan tahrat ih relh kan hmang theu. Cuihsin, kan kiangkap pawl parah mawhphurh kan duh. Cumi in kiangkap minung pawl thawn kan karlak ah buainak a suah ter sinsin theu.

Mihrek cu Pathian hnen ihsin relh lanta thei dingah an ruat ih Pathian hnen pan duh nawn lo’n an dungtun lanta theu. An ka cun, biaknak lawm tawi pehpar lo kha a zalen sawn, a nuam sawn ti’n an aukio theu nan, an thinlung muril sung ahcun, phuhrungawknak le thlaphannak a reh taktak thei cuang lo. Ziangah tile, Pathian hnen ihsin relh theih a si ngaingai thei lo.

Curuangah relh kan duh a si ahcun, relhnak tha bik kan hawl thiam a tul. Cumi cu Amah Pathian a si. A zangfahnak rinsan in a hnen kan pan ih kan sual kan phuan tikah, a ngaidamnak kan co ih zalennak thawn kan khat. Cumi cun lungawinak thawn in khat ter ih, kan kiangkap minung pawl hnen khalah lungawinak a suahpi ve a si.

Tuini Saam kan siar mi kan zoh tik khalah Pathian cu kan relhnak thabik a si zia David in a rak hmuhfiang ruangih a phuahmi a si. Kan zate’n kan vun ngaitlang ta pei:

A mawhnak ngaithiam a simi le, A sualnak thlah sak a simi cu mi thluasuak a si. Bawipa in sual a puh lomi le, A lung sungah mibumnak a neilotu cu mi thluasuak a si. Cule na hnenah ka sualnak cu ka phuang; Ka thil tisualmi pakhat hman ka pheh lo. Ka sualnak cu na hnenih phuang dingin ka ruat cat; Cule nangmah in ka sualnak cu i ngaithiam òheh a si. Nangmah a lo tlaihsantu hmuahhmuah in, An harsat caan ah na hnenah thlacam hai seh. Tilik lianpi a thlen tikah an hnen a thleng lo ding. Nangmah cu ka relhnak hmun na si. Harnak in i hum ding. Nangmah ih i run ruangah I runnak cu hla in ka sak ding.

Saam Hlabu 32:1-2, 5-7