Rundamnak le Thukham Thar (sim tu Rev. Fr. Lucas Tha Ling Sum) June 9, 2021

Rundamnak le Thukham Thar

Thuthangtha sim tu Rev. Fr. Lucas Tha Ling Sum

June 9, 2021

Siarding: 2kor 3: 4-11; Saam 99: 5-9 (9); Mt 5: 17-19.

            Zumtu u le nau, Pathian in thlawsuah lo pe hram seh tiah, RVA ihsin thlaza ka lo camsak a si. Tuittum ah “Rundamnak le Thukham Thar” timi thu kan hlawm aw tlang pei. Hmaisa ah Baibal ngai ta hrih uhsi.

Mt 5:17-19 “Moses daan pawl le profet pawl ih thuzirhmi siatsuah dingah a ra, tiah I ruat hlah uh. Cupawl siatsuah dingah ka ra lo, an zirh mi pawl kimter dingah ka ra sawn a si. Hihi cing ttha uh. Lei le van a um sung cu daan sungih daanterek bik pakhat hman a hlo lo ding, ziang hmuahhmuah a kim ttheh hlan cu pakhat hman a hlo lo ding. Curuangah zokhal sisehla thukham sungih a thupi lo bik pakhat te hman kha a thlun lo ih midang khal thlun lo dingin a zirh ve a si ahcun amah cu vancung uknak ah mi tenau a si ding. Cule zokhal sisehla daan kha a thlun  ih midang khal thlun ve dingih a zirh a si ahcun amah cu vancung uknak ah mi thupi a si ding.”

            Zumtu u le nau, tui kan theih vekin Bawi Jesuh in mipi pawl hnenah “Moses daan pawl le profet pawl ih thuzirhmi siatsuah dingah a ra, tiah I ruat hlah uh”, a timi thu thawn pehpar aw in Moses daan pawl le profet daan pawl hi, ziang an si, timi a tawi zawng in zoh hmai sa uh si.

            A pakhatnak ah Moses daan pawl kan timi cu ziang an si? Jew miphun pawl in Baibal Hlun lolen Thukam Hlun kan timi hi, tthen hnih ah an tthen. Semtirnak, Suahlannak, Puithiam Hnattuan, Mipum Siarnak, le Daan Peksalnak kan timi Baibal Thukam Hlun ih a hmasa bik panga pawl cu Moses rori ih ngan mi a si, tiah Jew pawl in an zum. Curuangah cuih cauk panga pawl cu “Torah” tiah an ko. Atican cu “daan” tinak a si. Himi hi Bawi Jesuh ih “Moses daan pawl” tiih a ti mi an si.

            A pahnihnak ah “profet daan pawl” kan timi cu ziang an si, timi kan zoh bet pei. Mitu ih kan sim mi Baibal Thukam Hlun ih a hmaisa bik panga pawl siar lo Baibal Thukam Hlun ih a um lai mi cabu dang pawl hmuahhmuah cu “profet pawl” tiah ttongfang kam khat in Jew miphun pawl in an ko.

            Curuangah Bawi Jesuh ih Moses daan pawl le profet daan pawl tiih a ti mi cu Baibal Hlun pumpuluk lolen Baibal Hlun zaten, a ti nak a si.

            Bawi Jesuh hi leitlun ih a um lai ah biaknak lamih upa pawl in, mipi pawl ih thlun thei lo ding tiangin daan tampi cu Thukham Pahra ah an bet ciamco. Curuangah mipi pawl cu mangbang le vansang in an um. Daan an tlun thei cawk lo. Cutik ah mipi hrek khat in Bawi Jesuh a rat asilen daan pawl hi a siatbal thei men, tin an ruat. Asinan Bawi Jesuh cun hitin a sim: “Moses daan pawl le profet pawl ih thuzirhmi siatsuah dingah a ra, tiah I ruat hlah uh. Cupawl siatsuah dingah ka ra lo, an zirh mi pawl kimter dingah ka ra sawn a si” a ti. Thukham Parah ah daan tampi an bet rero nan a famkim thei cuangah lo tinak, Bawi Jesuh in a khih hmuh a si. Ziang mi daan a sam lai a si pei?

            Pharasi pawl le daanthiam pawl in daan tlun men in rundamnak ngah a theih, tiah an zum. Asinan, duhdawtnak tel lo ih daan tlun menmen cu a tawk hrih lo a si. Bawi Jesuh in hi tin fiang ten in sim: “Pathian duh mi tuahnak ah Daanthiam pawl le Farasi pawl hnak  in nan fel sawn lo ahcun vancung uknak ah nan lut thei lo ding” a ti (Mt 5:20). Daanthiam pawl le Farasi pawl hi duhdawtnak tel lo ih daan tlun tu pawl an si.

            Zumtu u le nau, thianghlim Paul in Rome khua ih um mi zumtu pawl hnenah ah hitin ca a kuat: “thukham pawl hmuahhmuah cu, ‘nangmah le nangmah na duhdawt awk bangin nan inn hnen khal duhdaw aw, timi thukham sungah a kim ttheh a si” tiah a ti (Rom 13:9). Cun Bawi Jesuh khal in hitin (John 13:34) sungah in sim. Thukham thar ka lo pe, “Keimah ih ka lo duhdawt vek in pakhat le pakhat nan duhdaw aw ve pei, in ti. Duhdawtnak daan timi hi rundamnak kan ngah thei nak ding hrangah a ttul tengteng mi daan a si.

            Thuthangttha ngai tu nan zaten, innhnen duhdawt thei sinsin dingin Pathian in thlawsuah lo pe hram seh! Amen.