Sabit hnge nan si (sim tu Rev. Fr. Lucas Sum) May 5, 2021

Sabit Hnge Nan Si

Thuthangtha sim tu Rev. Fr. Lucas Tha Ling Sim

May 5, 2021

Siarding: Tirh. 15: 1-5; Saam 122: 1-5; Jn 15: 1-8.

          Zumtu u le nau, RVA Falam ihsin cibai ka lo buk! Pathian in nanzaten thlawsuah lo pe hram seh. Tui ttumah “Sabit Hnge Nan Si” timi thu hlawm aw tlang uhsi. Hmaisa ah Pathian ttongkam kan ngai ta hrih pei.

Jn 15:1-8) “Jesuh in, “Keimah cu sabit hri ngaingai ka si ih ka Pa cu hmuan neitu a si. Rah a rah lo mi ka hnge tla cu a tan ttheh ih a rah mi hnge kha a thiannak dingah le rah tam sinsin a rahnak dingah a thianfaiter a si. Nannih tla cu thu ka lo zirh mi thawngin nan thiang zo. Keimah thawn pehzom uhla kei khal nanmah ka lo pehzom ve ding. Sabit hnge cu amahte lawngin rah a rah thei dah lo; sabit hripi thawn a pehzom awk lawngah a rah thei a si. Cubangtukin keimah thawn nan peh zom awk lo ah cun nan rah thei hrimhrim lo ding.

          Keimah cu sabit hri ka siih nannih cu a hnge nan si. Zokhal ka sungah a um ih kei khal a sungih ka umcih mi cu rah tampi a rah ding; ziangah tile keimah tel lo cun zianghman tuah thei mi nan nei lo. Zokhal keimai sungih a um lo mi cu sabit hnge an hlon ih a car mi bangtuk a si ding. Cubangtuk hnge pawl cu an khawm ih meisa sungah an hlon ih a kaang ttheh. Keimai sungah nan um ih ka ttongkam hi nan sungih a um ve ahcun nan duhmi pohpoh nan dil tikah nan ngah ding. Rah tampi nan rahnak hin ka Pa ih sunlawinak nan langter ih cuticun ka dungtluntu nan can theinak a si.”

          Zumtu u le nau, mitampi in milai hi khui tawk ihsin a ra mi kan si ih khui tawk ih kirsal ding kan si, timi hi kan ruat ttheu lo. Kan Baibal Thianghlim ih in sim bang in milai cu Pathian ih sersiam mi kan siih Pathian ih ta kan si. Ttongdangih kan sim asilen milai cu Pathian hnen ihsin a ra mi kan siih Pathian hnenih kir sal ding kan si, tinak a si. Himi fangte ah hin thuk zet ih kan ruah ding mi pakhat a um. Cumi cu ziang a si tilen Pathian hnen ihsin kan ra nan Pathian hnen ah kir sal loin hmun dangah kan feh pang pei maw?, timi a si. Fiang deuh ih kan sim asilen vanram kai lo in hmun dangah kan feh pang pei maw?, timi a si.

          Matthai 16:26 ah hitin kan hmu: “Mi pakhat in leilung pumpuluk co khal sehla a nunnak a hloh ah cun ziang tthathnemnak so a um? Zianghman a ttha hnem lo a si, tiah Bawi Jesuh in fiangten in sim. Ti duhsan cu Jesuh thawi pumkhat kan si a ttul; vanram kai tu kan si a ttul, tinak a si. Curuangah mitui kan siar mi Cathianghlim ihsin Bawi Jesuh in a mah thawi kan pehzom awk ding a ttul dan in sim a si. “Kei cu sabit hri ngaingai ka si. Nan nih cu sabit hnge nan si. Sabit hnge cu amah tei rah a rah thei lo vek in nan nih khal nanmah ten rah nan rah thei lo a si. Sabit hnge cu a hripi thawi an peh awk lawngah rah a rah thei a si. Cubangin nan nih khal kei mah sungih nan um a ttul a si. Culawngah rah nan rah thei ding a si, in ti.

          Zumtu u le nau, ziangtin sabit hri a si mi Jesuh thawn kan pehzom aw thei pei? Ziangtin rah ttha kan rah thei pei? Ziangtin vanram kan kai thei pei? Himi thu thawn pehparh aw in a thupi zet mi phun thum tuah ding kan nei a si. (1)nak ah sacrament pawl kan san a ttul a si, ahleice in sual thlahnak sacrament le Bawi Jesuh ih Thi le Sa kan san ttheu ding a ttul a si. Cun (2) nak ah mipar ah tthatnak tuah ding, timi a si. (3) nak ih Bawi Jesuh thawi kan pehzom awk thei nak dingih kan tuah ding mi cu Pathian hnen ih thlacamnak a si.

          Zumtu u le nau, sacrament kan saang ttheu, mi parah tthatnak kan tuah ih Pathian hnenah tangdornak le rinsannak thawi thla kan cam ringring a si ah cun Jesuh thawn kan pehzom aw dingih rah ttha tampi a rah thei tu kan si ding a si.

          Thuthangttha ngai tu nan zaten rah ttha tampin rah thei dingin Pathian in thlawsuah tampin lo pe hram seh. Amen.