Satan fa le Pathian fa (sim tu - Rev. Fr. Joseph Ro Nei Thang), February 12, 2021.

Satan fa le Pathian fa

Thuthangtha sim tu - Rev. Fr. Joseph Ro Nei Thang

February 12, 2021.

Siarding: Seem. 3:1-8; Ps 32:1-2, 5,6,7; Mk. 7:31-37.

          Leitlun hmun tinkip ihsin RVA Falam Chin Service a rak ngai ringringtu Bawi Khrih ah duhdawtzetmi nu le pa, u le nau pawl, “Kan Bawipa Jesuh Khrih ih pekmi rem daihnak cu nan zate thawn um hram seh” tiah hmaisabik ah cibai ka run lo buk hai. Tuihni cu 2021, February ni 12, Tlawngkai ninga ni asi. Cun kan Kawlram ih phidaungsuhni tla a rak si. Tuihni kan siar dingmi Pathian ih ttongkam pawl cu Semtirhnak 3:1-8 tiang; Ps 32:1-2, 5,6,7 tiang. Saam a sawn: “A sualnak ngaidam sak a simi cu mithluasuak asi” tiah asi pei. Cun Thuthang ttha Mark 7:31-37 tiang pawl ansi pei. Tuihni ih kan ruah khawm tlang dingmi cu “Satan ih fa le Pathian ih fa” tiah asi pei. 

          Tuihni kan siarmi Bible a voikhatnak kan zoh sal tikah “Cun Pathian ih thil tuahmi hmuahhmuah lakah rulpi cu a hrokhrawl bikmi ramsa asi. Rulpi cu nunau hnenah ‘hmuan sungih thingkung hmuahhmuah lakih thingkung pakhatkhat ih rah nan ei lo pei tiah Pathian in a lo ti ngaingai maw?’ tiah a sut. Nunau in cun ‘Hmuan sungih thingrah hmuahhmuah kan ei thei ko; asinain hmuan laifang ih a ummi thingrah cu kan ei thei lo, ziangahtile a cuih thingrah cu ‘nan ei lo pei; a tham khal nan thamlo pei, nan ei asile nan thi ding’ tiah Pathian in in ti” tiah rulpi cu a ti. Rulpi cun ‘cutin asilo, nan thi hrimhrim lo ding. Nan ei asile nan ei ni in nan mit a vang dingih amah Pathian vekin a ttha le a sia theithiamnak nan nei ding, ti kha Pathian in a thei cia ruangah a lo khamnak asi’ tiah nunau cu a ti. Cutin cu nunau in hmuan lai fangih thingkung a mawizia le a rah a thawt dingzia a hmu ih fim cu ziangtluk duhnungza so asi ding, tiin a ruat. Curuangah thingrah cu a lo ih a ei. Cuih hnu ah a pasal khal a pekih anih khalin a ei ve. Thingrah a ei ttheh ve tein an mit an vaangih theihtheinak an nei ruangah lawngte ih um ansi kha an thei aw. Curuangah theipi hnah an tthit khawmih an hup aw” tiah Semtirnak 3:1-7 ah kan siar thei.  

          Tuih kan siarmi Pathian ttongkam ahhin mibumtu cu rulpi timi khawsia le bumnak tuartu cu nunau hmaisabik Eva asi. Ziangruangahso rulpi in Ava cu a va bum ti kha ruat tlang uhsi. Pathian in vancungmi pawl cu amah Pathian vekin ruangpumpi neilo thlarau taktak thawn a serhsiam asi. Thuphuan 12:7-9 “Cule van ah raldo awknak a um. Michael le a vancungmi pawlin rulhreng cu an do. Rulhreng le a vancungmi pawl khalin an do ve. Asinain rulhreng cu a sun ruangah a vancungmi pawl thawn vancung ah an um thei nawnlo. Rulhreng tumpi, khuahlan rulpi, khuasia asilole Satan tiih kawhmi cu leilung pumpuluk ah mibumtu cu van ihsin hlon asi zo. A vancungmi pawl thawn leilung ah an vun thlak” tiah kan hmu thei. Cun hlon thlaknak a tuartu, vancungmi pawl cu Pathian ih serhsiammi vancungmi zate ih tthen thum tthen khat ansi tiah Thuphuan 12:4 ah kan hmu thei. Lucifer cu Pathian vekin huham cahnak famkim a nei duh, a co duh ve ruangah Pathian a dodalnak asi. Ziangtinso serhsiammi in serhsiamtu cu a do thei? Ziangtinso a sunlawinak le a thiltitheinak cu a cuh ngam? Lucifer le a vancungmi pawl cu vancung ah an um thei nawnlo ruangah hlon an tuar. Annih in Pathian ih fa le sinak siseh, Pathian thawn um khat a nuam zia hi an tep ngah zo ruangah siseh, iksiknak tumpi thawn Pathian ih hmuihmel vekin serhsiammi milai pawl cu an bumnak hi asi. Satan ih hnattuan tumbik cu mibumnak asi. Hi leitlun ah Bawipa Jesuh Khrih a rung ttum sannak cu Satan ih hnattuan pawl siatbal ttheh rori dingah asi tiah 1John 3:8 ah in zirh asi. Cun Pilatus in Bawipa Jesuh thu a suh tikah Jesuh in “Leilung ih ka suah sanmi le ka rat sanmi cu thutak sim ding hi asi. Thutak sungih a nungtu hmuahhmuah cu ka thusimmi an ngai asi” tiah ati ti in John 18:37 ah in sim asi. 

          Pathian ih thukam number 8 nak ah “Thuphan na per lo pei” asi. Himi thukham thawn pehpar in kannih Christian pawlin thil hmuahhmuah ah a dik zawngin sim dingah ttuanvo kan nei asi. A bikbik ahcun midang ih hmin tthatnak sim dingah le midang upat ding thu pawl sim ding kan si asi. Cun Pathian ih Thukham number 8 in “lie timi thuphan pernak, rash judgment timi ruat ciamciam ta lo in zamrang zetin relcatnak, detraction timi minautat zawngin sim siatnak, calumny timi mi thangsiatnak, mirelsiatnak le kan hnenih a thup teih tuahmi thukamnak phuan saknak pawl tuah lo dingah, hrial dingah Catholic Kohhran ih Pathian thuzirnak cauk ihsin Catholic Kohhran in in zirh asi. Cuhlei ah thil diklo hnattuan hmuahhmuah tla in kham asi. Sumdawngnak ah thudiklo relnak, uktu bawi pawl hmai ah thudik sim ngamlonak, mi sualpuhnak, thil zuarnak ah mibumnak, hrokhrawl hnattuannak a phunphun, kyanphannak hnattuan a phunphun, depdetnak a phunphun, cazin tuahnak ah a diklo zawngin tuahnak, voucher pawl duhduh in remnak, mihrek khat cu thil lei lai ihsin voucher diklo zawngin nganternak pawl, dingfellonak a phunphun tuahnak pawl hrial ding rori kan si asi. Kan hriallo ih cuvek thil diklo, dinglo, hmanlo in kan tuah tikah Satan ih fa le rori ah kan cang thei asi. Satan ih hnattuan cu mibum ding, thuphan per ding, thil siatsuah ding, mirel sia ding, mithangsiat ding, mi sualpuh ding rori hi asi. 

          Tuihni ih kan siarmi Semtirnak kan zoh sal tikah Satan in Ava cu a bum asi. Satan in Pathian ih fa cu a bum ngah tariei ih Eva timi Pathian ih fanu khal cu Satan ih fanu ah a cang asi. Satan ih fanu Eva in a pasal Adam tla khammi thingrah a pekih Adam in tla a ei ih anih tla Satan ih fapa ah a cang ta asi. Kannih tla Pathian ih khammi sualnak kan tuah tikah Pathian ih fale sinak ihsin Satan ih fa le ah kan cang asi. Ralring uhsi, ziangahtile kan ral Satan cu kiosa vekin huk celcel ih mi hmuahhmuah deh ttheh ding bangin a um ttheu asi. Kan ralring lo canah thang bangin in awk thluh ding asi. Curuangah 1John 3:7-9 “Ka fale pawl, zohmanin lo bum hlah hai seh. Khrih cu miding asi bangin zokhal dingnak a tuahtu poh cu miding asi ve. Zokhal sualnak a tuah ringringtu cu Satan ih ta asi. Ziangahtile Satan cu a hram thok ihsin sual a tuahtu asi. Pathian ih Fapa a langnak cu Satan ih hnattuannak siatsuah ttheh ding rori ahhin asi. Pathian ih fa asimi poh in sualnak cu a tuah rero nawnlo, ziangahtile Pathian ih nunzia cu thlaici bangin a sungah a nung asi” tiah in zirh asi. Baptism kan ngahnak thawngin Pathian ih fa le ah kan cang zo, sualnak ihsin kan luat. Cumi cu kilkhawi suak ringring uhsi. Kan hnenah kan Bawipa Jesuh Khrih thawngin vancung thluasuah hmuahhmuah cu in toih zo asi ih sual neh theinak thazaang tla Pathian nih in pek zo asi. 

          A ngaitu nan za tein Pa le Fapa le Thiang Thlarau in thluasuahnak lo pe hram seh. Amen.